Lv 9 - A Txꞌan Biblia Yin Kꞌanjobal 1989

Max chail yich cham Aarón yopiso

¹ Yewial lajwi ukeb c'ual yoccan cham Aarón yin yopiso tu', max awtelay cham yetok eb is c'ajol, c'al yetok eb yicham winakil conob Israel yuj cham Moisés.

² Max yalon bay cham Aarón: Itek junok no ach'ej wacax yet chi oc no' yin xajanbalil yuj yak'lay tan a mul, yetokc'al junok no icham calnel chak' tz'a yin xajanbalil oj ach ti', a ton no' c'am jabok is tacnakil, aoc no' tu' satak Jehová.

³ Al c'apax bay eb jet israelal tol chi yitek eb junok no mam chiwo yin xajanbalil yuj yak'lay tan mulej, cax chi yion c'apaxtek eb junok no ach'ej wacax c'al junok no calnel jun abil is k'inal, tol c'amc'al jabok is tacnakil, yuj yak'lay tz'a masanil yin xajanbalil,

⁴ yetokc'al jun no wacax c'al jun no icham calnel chi mak'lay cam satak Jehová yin xajanbalil yet junc'ulalil yetok Cham. Cax chi yion c'apaxtek eb junok ofrenda yin tzet chi loji, sombil yetok aceite, yujtol a Jehová ok tx'ox ba ayex tinani', ẍi cham Moisés.

⁵ Max yitek eb satak mantiado masanil tzet max chek cham Moisés yitek eb; masanil conob max jayoc wajan xin, max oc lecan eb satak Jehová.

⁶ Axa yalon cham Moisés bay eb axca ti': A ton wal juntzan ti' max chek Jehová e yunej; yet watx' ok tx'ox wal is mayk'ak'al ayex, ẍi.

⁷ Lajwi tu', max yalon cham Moisés bay cham Aarón: Jitztek a ba bay cawilal altar ti', cax chak'on no no' a xajanbalok yuj tancan el a mul c'al no xajanbal chi tz'a'i. Axca tu' ok yun yak'lay tan a mul. Cax chaon c'apax oc no xajanbal yuj yak'lay tan co mul ayon israel on ti', axca wal max yun yalon Jehová, ẍi Moisés.

⁸ Cax max jayoc Aarón cawilal altar, max yak'on cam no ach'ej wacax max yak' yin xajanbalil yuj is mul.

⁹ Lajwi tu' max jay c'apax oc eb is c'ajol yetok chiq'uil no xajanbal tu', cax max yaon aytok cham Aarón yiximal k'ab xol chic' tu', max bonon oc yin yuc'a' altar, axa janic'okxa chic' tu xin, max seccan ay bay yakantak altar.

¹⁰ Max lajwi tu' max yak'on tz'a masanil is seboal no' bay yiban altar yetok c'apax yubal no', yetokc'al sebo ayoc yin is tx'ix no', a ton no xajanbal yuj yak'lay tan mulej, axca max yun yalon Jehová bay cham Moisés.

¹¹ Axa pax chibejal no', yetokc'al tz'umal, max ak'lay tz'a bay yinel campamento.

¹² Max yak'on c'apax cam cham Aarón no xajanbal tol chi ak'lay tz'a masanil, axa eb is c'ajol max iontek is chiq'uil no', cax max txijon oc cham yin canpaq'uil altar.

¹³ Lajwi tu', max yion c'apaxtek eb is jolom no', c'al bijquiltakil no xajanbal tu', axa yak'on tz'a cham Aarón bay yiban altar tu'.

¹⁴ Max tx'ajlay no yulc'ulej, c'al no xubej yetok yakan, axa yak'lay c'apax tz'a bay altar tu', yiban no' lanan tz'a'i.

¹⁵ Lajwi tu', cax max yak'on xajanbal yuj conob Israel. Max yiontek no chiwo, a ton no xajanbal yuj yak'lay tan mul eb conob, max yak'on camok, axa yak'on yin xajanbalil axca max yun yak'on xajanbal yuj yet yin babelal.

¹⁶ Lajwi tu', max yak'on junxa no xajanbal tol chi tz'a masanil axcac'alta' yayji is leyalil.

¹⁷ Max yak'on c'apax ofrenda yin tzet chi loji, max yitok junok betxan ixim harina max yak'on tz'a bay yiban altar, yetok xajanbal chi ak'lay tz'a yet junjun k'inibalil.

¹⁸ Max yak'on c'apax cham Aarón no wacax c'al no icham calnel max yitek eb conob Israel tz'a yin xajanbalil yuj junc'ulalil. A eb is c'ajol cham max iontek is chiq'uil no', axa cham max txijon oc yin canpaq'uil altar tu'.

¹⁹ Max yak'on c'apax eb seboal no wacax c'al no calnel tu', a ton sebo yin ne no', c'al yin yul c'ul no', c'al yubal no', c'al sebo ay c'apax oc yin tx'ix no'.

²⁰ Junnej max yak' sebo tu' yetokc'al no txamc'ulej. Axa cham Aarón max ak'on tz'a seboal bay yiban altar.

²¹ Axa pax no txamc'ulej xin, c'al no xubej bay is watx', toc'al max batxlay ec' satak Jehová, axca max yun yalon Cham bay cham Moisés.

²² Max lajwi tu' max yion aj cham Aarón is k'ab, max yalon watx' k'anej yiban conob Israel. Yet mayal lajwi yak'on tz'a xajanbal yuj mulej, yetok xajanbal tol chi tz'a masanil, c'al xajanbal yet junc'ulalil, axa yaytek bay altar tu'.

²³ Lajwi tu' max octok cham Moisés yetok cham Aarón bay mantiado bay chi co chalej co ba yetok Jehová, axa yet max eltek eb max yalon eb watx' k'anej yiban conob Israel. Lajwi tu' max tx'oxon Jehová is miman mayk'ak'al bay masanil eb conob tu'.

²⁴ Max eltek k'ak'ej satak Jehová, max yak'on tz'a no xajanbal yetokc'al seboal no' ayajtok yiban altar, max tz'atok masanil. A yet max yilon masanil conob Israel jun ti', max el yaw eb yin tzalojc'ulalil, max ay nojan eb sat tx'otx'.