Lv 25 - A Txꞌan Biblia Yin Kꞌanjobal 1989

Abil yet bekbanilal

¹ Max yalon Jehová bay cham Moisés bay witzal Sinaí axca ti':

² Al masanil juntzan ti' bay eb et israelal: A yet ayexxa ec' bay sat tx'otx' tx'otx' ok wak' ayex tu', yowalil tol ok xew tx'otx', yuj wibanilal aj can, ayin Jehová in ti'.

³ Asannej wakeb abil chi je' chex mulnaj sat e tx'otx'. A yin wakeb abil tu' chi je' e pechen e yuva, c'al e wajon sat.

⁴ Axa yet is suk abil xin, yowalil chi can tx'otx' xewok, yuj wibanilok aj can. C'am wal jabok tzet che yaw yet jun abil tu', tamwal che pechej e yuva.

⁵ C'am chi je' e c'upon aj ixim trigo toc'al chi ajol yet mayal lajwi ec' tiempoal jooj trigo, tamwal chi je' e wajon sat an uva tol maj e pechej, yujtol chi xew tx'otx' tx'otx' yet jun abil tu'.

⁶ A masanil tzet yetal chi yak' tx'otx' tx'otx' yet jun abil chi xew tx'otx' tu', chi je' loon eb anima e yetok, a ton eb e chekbej c'al eb ix e chekbej yetok eb chi mulnaj e yetok, c'al yetok eb tx'ok conobal ayic' e xol,

⁷ yetok c'apax no e jobbejal no', c'al yetok no xolakteal no' ay bay jun lugar tu'. Yuj tu xin, xan a masanil tzet ok yak' tx'otx' tx'otx' yet jun abil tu', a' ok e lo', c'al yetok no no' tu'.

⁸ Chi bislay uk el yin ukuktak abil. A ukeb abil tu' chi bislay yin uk el, caytu' chi eloc yin 49 abil.

⁹ Axa yet lajonebxa c'ual waay yet is suk xajaw, a ton jun c'ual yet chi ak'lay tan mulej, a yet tu' chi xulay ch'en trompeta bay masanil yul e nación.

¹⁰ Axa abil 50 xin, yet-xa e bekbanilal yayji ocok. A yet jun abil tu' chi al-lay el bekbanilal bay masanil anima yul e nación ti', yet watx' chi meltzoj jayoc masanil anima bay xol yican, cax chi chaon pax is tx'otx' tol is satakta' yayji.

¹¹ Axa jun abil 50 tu' e yet yayji ayex ti', yuj e bekbanilal. A yet jun abil tu', c'am chex awwi, c'am che joaj ixim trigo toc'al chi ch'ibaj axca tu'. C'am che pechej an uva, tamwal e wajon sat an.

¹² Mimanokab yelapnok jun abil bekbanilal ti' yul e sat. A tzet yetal toc'al chi yak' tx'otx' axca tu' ok e lo'.

¹³ A yet jun abil bekbanilal ti', junjun exc'al che cha pax e tx'otx' tol e satakta' yayji.

¹⁴ Yuj tu', ta ay mactxel chi mana' ma chi txon is tx'otx' bay junokxa anima, man e na' e yion miman tumin.

¹⁵ A mac chi manon tu', yowalil chi tojlanej, atac'ala' jantak tiempoal max ec'tok yettax abil bekbanilal. Axa mac chi txonwaj tu', yowalil chi cha' tojol tx'otx', atac'ala' jantakto tiempoal ok wajlay sat awoj yet ok jay junxa abil bekbanilal.

¹⁶ Atac'ala' ta mimanto yabilal ok waj sat yawoj tu', caytu' ok yun tojlanelay sat yawoj tu' bay. Ta txenxanej yabilal xin, txennej c'apax tojol tx'otx' ok ak'lay bay, yujtol a sat awoj tu' chi txonlayi, atac'ala' jayelto chi wajlayi.

¹⁷ Manchak e sub e yion ec' is tzet yetal junokxa mactxel. A ti' e yet tol che tx'oxo tol ay welapnok yul e sat, yujtol ayin ton Jehová e Diosal in.

¹⁸ Chi cam wal e yiken in chekbanil, c'al e beybalnen in ley ti'. Tatol ok e yikej wali, ok ex ayjok ec' sat tx'otx' tx'otx' yin masanc'ulal.

¹⁹ Caw wal watx' ok yun sat yawojal tx'otx', yinxac'al tzalojc'ulal ok ex lowok masantac'al ok yal noj e c'ul.

²⁰ Talaj c'uxan ok e yala': ¿Tzet ok co lo' yet is suk abil tu', ta man ok on awwok, cax man ok je' co wajon pax sat awoj tu'? ta quex chi.

²¹ Manchak ex oc il, yujtol ok in bekwal ay yaxilal yiban e yawoj yet is wak abil. Xiwil ok yun sat e yawoj, xan a jun tu' k'okbil wal ok yab e lo' yin oxebokxa abil.

²² Yuj tu', ok e lo' sat e yawoj ok e wajcan tu', yak'ban ok ex awwok pax yet ok ayol yet is waxak abil. Oktoc'al e lo' tzet wajan e yuj tu', yak'ban chi el pax ul sat e yawoj yet is baloneb abil.

²³ A tx'otx' tx'otx' tu', c'am chi je' e txonon el tx'otx' yin junelnej, yujtol wet tx'otx'. Ayex ti' toc'al ec'jabwom e yayji sat tx'otx' wuj.

²⁴ Ta ay junok chi txon is satak, chi je' manon pax el is tx'otx' tu' junelxa ta chi uj yuj.

²⁵ Ta ay junok e yet conob chi canxac'al can yin c'amxa jabok tzet ay, cax chi txononxac'al cantok is tx'otx' bay junok ex, axa junok is yican tol cawilto ay, a jun tu' chi je' manonpax el tx'otx' bay.

²⁶ Palta ta ay junok mactxel tol c'amxa junok is yican chi je' manon el is satak tu xin, ta chi wajnaj pax is tumin tx'oklil, chi je' manon el is tx'otx' tu' junelxa.

²⁷ Asan chi nalayi, jantakxa tiempoal txonon el tx'otx', cax chi yak'on meltzoj bay nak max manon tx'otx' tu', atac'ala' jantakto tiempoal yet ok jay junxa abil bekbanilal, cax chi yion pax is tx'otx' tu' junelxa.

²⁸ Palta ta c'am chi wajnaj aj ch'en tumin yuj, yuj manon pax el is satak tu xin, a jun tu' chi canc'al can yul is k'ab jun mac max manon el tu', masantac'al yet chi oc junxa abil yet bekbanilal. A yet tu' bekanxa tx'otx', cax chi yionpaxcan nak max txonon tx'otx' tu'.

²⁹ Ta ay mac chi txonon junok yatut bay yul miman conob tol ayoc is murallail, chi je' manon el junelxa, yet c'amto chi lajwi jun abil txonon elok, axcac'al is c'ual max txon tu'.

³⁰ Palta ta c'amto chi je' manon el jun na tu' yet c'amto chi tz'aknaj jun abil tu xin, a jun tu', chi canxac'al can yin junelnej bay nak max manon tu', c'al bay is yinatil. C'amxa chi je' beklay el yet abil bekbanilal.

³¹ A pax na bay c'am oc is murallail conob, lajanc'al axcac'al comon tx'otx'. Chi je' manlay el junelxa, ma beklay el yet abil bekbanilal.

³² Axa eb levita, chi je' manon pax el eb yatut junelxa yin tzanc'al tzet tiempoal caxc'al ay yul murallail is conob eb.

³³ Ta ay junok levita c'am chi je' ca manon el yatut yul makbej is conobal, axa yet chi jay abil bekbanilal chi je' yion yatut junelxa, yujtol a eb levita tu', asannej yatut eb ayoc is satakok bay yul e nación.

³⁴ A tx'otx' bay chi low is calnel eb levita bay yinlak conob tu', c'am chi je' txonon el eb, yujtol lobal is calnel eb yayjican yuj conobal.

³⁵ Ta ay junok eb e yet conob cajan e cawilal chi canxac'al can yin c'amxa jabok tzet ay, yowalil chex colwaj bay axca chi yun e colwaj bay junok tx'ok conobal chi ec'jab e xol, yet watx' ayc'al ec' e xol.

³⁶ C'am che k'an yuca' e tumin, ma e tzet yetal chi majanej. A ti' e yet, tol che tx'oxo' tol ay welapnok yul e sat, yet watx' chi ayjic'al ec' e yetok.

³⁷ Manchak e k'an yuca' ch'en tumin che yak' majanej, tamwal che yiaj can tojol is lobej che yak'a'.

³⁸ Yujtol ayin Jehová e Diosal in chi wala'; ayin max ex wieltek bay Egipto yet chi wak' tx'otx' Canaán ayex, yet chin oc e Diosalok.

³⁹ Ta ay junok e yet conob ayic' e yetok, c'amxac'al jabok tzet ay bay, cax chi txononxac'al ba ayex, manchak e yut axca junok e chekbej,

⁴⁰ palta che yut axca junok mulnajwom, ma axca junok toc'al ec'jabwom. Chi je' mulnaj e yetok, masantac'al yet chi jay abil yet bekbanilal.

⁴¹ Chi lajwi tu xin, chixa je' chi el yetok yuninal bay e yatut, cax chi meltzojtok bay xol is yican bay ayc'alta' is satak.

⁴² Yujtol ayex ti', in chekbej e yayji. Ayin max ex wieltek bay Egipto, xan man is mojok tol chex txonlay el yin chekbejal.

⁴³ Manchak ex yajawbixac'al yin eb e yet israelal chi txonxac'al ba ayex. A ti e yet, mimanokab welapnok ayin e Diosal in ti' yul e sat.

⁴⁴ Tatol che yochej che man e chekbej, winak ma ix, chi je' e manon bay xol juntzan nacionlak bay e cawilal ti'.

⁴⁵ Ma xin, chi je' e manon eb tx'ok conobal ayic' e xol ti', ma is yuninal eb tol max alji bay yul e nación ti', chi je' e manon eb e chekbejok,

⁴⁶ cax chi cancan eb axca junok satakej bay eb e yuninal yet chex cam ayex ti'. Chi je'c'al yoc eb tu' is chekbejok eb, palta c'am junok e yet israelal ti' chi je' e yajawbi yin, yujtol e yet conob eb.

⁴⁷ Ta ay junok tx'ok conobal ma junok ec'jabwom ayic' e xol ti' chi oc yin beyomal, axa pax junok e yet conob junej cajan yetok, chi ocxac'al mebail yin, cax chi txonon ba bay jun tx'ok conobal ayic' is cawilal tu', ma bay junokxa ayto yujba yetok jun tx'ok conobal tu',

⁴⁸ chi je' manon el ba nak tu' junelxa, ma chi manlay el yuj junok yican,

⁴⁹ ma yuj junok tol ac'alto oc yetok. Ta chi je' yuj xin, chi je' manon el ba tx'oklil.

⁵⁰ Chi beyc'ulnej eb yet abil yet max txonon el ba nak tu', masantac'al yet abil yet bekbanilal. A tojol chi ak'layi, atac'ala' jantakto yabilal tu', caytu' chi yun beyc'ulnelay c'apax elok jantak tumin chi yitok yin mulnajil, axca tojol is c'u eb mulnajwom.

⁵¹ Ta ayto yapni yabilal yet bekbanilal, cax chi ca manon el ba, chi yak' meltzoj janic'okxa ch'en tumin, atac'ala' jantak max cha' yet max txonon el ba tu'.

⁵² Palta ta txenxanej tiempoal yet chi ajapnok abil yet bekbanilal, asanxanej janic'xa tu' chi tojlanej.

⁵³ Ta a junok e yet conob chi txon ba bay junok tx'ok conobal, chi utlay axca junok mulnajwom tol chi mulnaj yin yabilal. C'am che cha' etax jun anima tu' e satak.

⁵⁴ Ta c'amto chi je' manon el ba, yet chi ajapnok abil yet bekbanilal, a yet tu' chi beklay elok, yetokc'al yuninal.

⁵⁵ Yujtol in chekbej e yayji ayex israel ex ti', ayin wal max ex wieltek bay Egipto. Ayin ton Jehová e Diosal in chi wala', ẍi Jehová, cachi bay eb, ẍi Cham.