Lv 24 - A Txꞌan Biblia Yin Kꞌanjobal 1989

Aceite yet ch'en candil

¹ Max yalon pax Jehová bay Moisés:

² Al bay eb et israelal tol chi yitek eb aceite yet olivo ayach, aceite caw wal watx', yet watx' ayc'al oc k'ak'al candil.

³ Axa Aarón ok watx'nen oc is k'ak'al, yet watx' ayc'al oc k'ak'al masanil ak'bal in satak bay mantiado bay chin chalej in ba e yetok, bay satak eltek an cortina bay ay caẍail in trato. A jun ti' ley chi yuncan ayex yin tojbalk'inal.

⁴ Watx' chi yun watx'ji oc juntzan candil tu' in satak yiban is batxlubal tol oro.

Ixim pan ayoc satak Jehová

⁵ Ilayokabtek ixim harina caw wal watx', cax chi watx'ji lajcawebok ixim pan, tol axca mi nanok is so' libra harina chi oc yin junjun ixim,

⁶ cax latz'layokab ixim pan tu' bay yiban jun meẍa naba oro bay in satak; cab chi yun yaj latz'an yiban meẍa tu'; wakeb yin junjun latz'an.

⁷ A c'apax ay incienso caw wal watx' yiban junjun latz'an ixim pan tu'; a incienso tu' chi ak'lay tz'a in satak, a ton chi tx'oxoni, tol wet yayji oc ixim.

⁸ A juntzan ixim pan tu', yowalil tol a ixim k'axan chi alay ay in satak yet junjun c'ual xewilal, yuj yiken eb et conob Israel in trato e yetok yin tojbalk'inal.

⁹ Axa juntzan ixim pan chi ilay el tu' yet Aarón yayji yetok eb is yinatil yin tojbalk'inal. A eb tu' chi loon ixim pan tu' bay junok lugar tol wet yayji ocok, yujtol yelxac'al miman yelapnok xol juntzan tzet yetal yetc'alta' eb sacerdote tol chi ilay el yin juntzan ofrenda chi ak'lay tz'a in satak, ẍi Jehová.

Chi oc camich yiban eb comonc'al chi yak' binaj Dios

^10-11 A xol eb israel, ay jun winak aljinak xol eb tu', israel is txutx, axa is mam xin, aj Egipto. Selomit yoc bi is txutx tu', is cutz'in Dibri, titnak yin is tribual Dan. A jun winak tu' max teyelej ba yetok jun acaw israel bay campamento. A yin jun teyelejbail tu', a nak yune' ix israel tu' max oc is mul yujtol max bajwaj yin Jehová, xan max ilaytek bay satak cham Moisés.

¹² Max taynelay nak tu' masantac'al max yal Jehová tzet yetal yowalil chi utlayi.

¹³ Max yalon Jehová bay cham Moisés axca ti':

¹⁴ Iek eltek nak yob max alon tu' bay yul campamento, cax a masanil eb max aben tzet max yal tu', yaokab oc eb is k'ab yiban is jolom nak, axa masanil eb conob chi k'okon cam yetok ch'en.

^15-16 Al juntzan ti' bay eb et israelal: A mactxel chi oc is mul yalon yobal k'anej win, yowalil tol chi ak'lay cam yuj is mul tu'. A masanil eb yet conob chi k'okon camok. Caxc'al tol tx'ok conobal, ma aj conob bay tu', ta yob chi yal win, yowalil chi cami.

¹⁷ A mactxel chi mak'on cam junok yet animail, yowalil chi cami.

¹⁸ A mactxel chi mak'on cam is jobbejal no' junokxa mactxel, yowalil ac'ala' no no' tu' chi ak'lay pax is q'uexelok.

¹⁹ A mactxel ay tzet chi yut junok yet animail, ac'ala' axca tzet max yut tu', caytu' chi utlay c'apaxok.

²⁰ Tatol chi k'aj junok tu' yuj, yowalil chi mak'lay pax k'ajok. Ta chi eltek is bak' sat yuj, yowalil chi el c'apaxtek yet. Ta chi eltek ye junok mactxel tu' yuj, yowalil chi el c'apaxtek yet. Axca wal tzet chi utlay junok anima tu' yuj junok mactxel, caywal tu' chi utlay c'apax jun tu'.

²¹ A mactxel chi mak'cam is jobbejal no' junokxa anima, yowalil chi yak' is q'uexel no'. Palta a mactxel chi mak' cam junok yet animail, a jun tu' yowalil chi mak'lay c'apax camok.

²² Ac'ala' jun ley ti' chi oc yopiso yin eb tx'ok conobal, c'al yin eb aj conob Israel. Ayin Jehová e Diosal in chi wala', ẍi Jehová, cachi, ẍi Cham.

²³ Caytu' max yun yalon cham Moisés juntzan tu' bay eb yet israelal, xan max yieltok eb nak max alon yobal k'anej yin Jehová tu' bay yinel campamento. A bay tu' max k'oklay cam yetok ch'en. Max yikej eb yunen axca wal max yun yalon Jehová bay cham Moisés.