Lv 23 - A Txꞌan Biblia Yin Kꞌanjobal 1989

K'in yet Jehová chi chalayi

¹ Max yalon Jehová bay Moisés,

² tol chi yal bay eb yet israelal axca ti': A juntzan k'in ti', albilcanok tol wet yayji, a ton yet che wajbaj e ba yet chex oc yin ayilal ayin.

³ A yin wakeb c'u, ilek e mulnajil, axa yet is suk c'ual xin, c'amxa junok tzet yetal che yunej. Tol chex xewi, c'al e wajban oc e ba yin ayilal ayin, tzanc'al bay ayex ec'ok.

⁴ A ton juntzan k'in ti' tol miman yelapnok yuj in e yion aj can yet che wajbaj e ba yin ayilal yet is c'ual albilcanok.

⁵ A k'in nabaniltek yet max in ec' tilak e na bay Egipto, chi el yich yet yayc'ualil yet 14 waay babel xajaw, a ton jun k'in tu' che cha' yuj wibanilok aj can.

⁶ Axa yet 15 waay jun xajaw tu xin, cax che chaon pax is k'inal ixim pan tol c'am yich, yuj in e yion can. Yin ukeb c'ual, asan ixim pan tol c'am yich che lo'.

⁷ A wal yet babel c'ual tu', che wajban oc e ba yin ayilal in satak. C'am junok mulnajil che yunej.

⁸ A yin ukeb c'ual tu', che yak'onc'al tz'a xajanbal ayin. A yet is suk c'ual che wajbaj oc e ba yin ayilal ayin. C'am junok makan mulnajil chi je' e yuneni, ẍi Jehová, cachi, ẍi Cham.

K'inal babel sat awoj

⁹ Max yalon pax Jehová bay Moisés:

¹⁰ Al bay eb et israelal axca ti': A yet ayexxa ec' bay sat tx'otx' tx'otx' ok wak' ayex ti', a yet ok e chaon el yich e joon e trigo, a jun babel topan che jo' tu', che yitek bay eb sacerdote.

¹¹ Axa yet junxa c'ual yet max lajwican ec' c'ual xewilal, cax chi yak'on eb sacerdote tu' yin ofrendail tzet che yak' tu', yin batxon octek in satak, yet watx' chin cha' ayex.

¹² A yet is c'ual che yak' jun e trigo tu' yin ofrendail ayin, a yet tu' che yak'on c'apax tz'a junok calnel yin xajanbalil in satak; no' jun abil is k'inal, c'amokab jabok is tacnakil.

¹³ Cax che yion c'apaxtek yetok no', lajonebok libra ixim harina caw wal watx', sombilxa yetok aceite, yet chi tz'a yin ofrendail tol watx' chi wabej. Cax che yak'on c'apax junok litro vino yin ofrendail chi seclay ay yiban juntzanxa ofrenda tu'.

¹⁴ A ixim ac' trigo chi jolay ti', c'am chi je' e loon ixim yin panil, tamwal yin k'anbinakil, tamwal yin yaxil, masantac'al yet jun c'ual ok e yak'on ixim babel topan yin ofrendail ayin. A jun ti' ley chi yuncan ayex yin tojbalk'inal, tzanc'al bay ayex ec'ok.

¹⁵ Axa yet c'ual domingo, yet mayal ec'can el is c'ual xewilal, yet che yiontek jun topan ixim trigo yin ofrendail, a ton yet jun c'ual tu' che bison ukeb semana,

¹⁶ ma 50 c'ual yin tz'akan. Axa junxa c'ual yet mayal tz'aknaj ukeb c'ual xewilal tu', a yet tu' cax che yak'on pax junokxa ofrenda yin ixim trigo ayin.

¹⁷ Che yitek cabok ixim pan yin ofrendail axcac'al ixim e yet che lo'. Waxakeb libra harina caw wal watx' chi oc yin junjun ixim, ayokab oc yich. A ixim tu' ok batxlay oc in satak yin ofrendail yin ixim babel chi elolok.

¹⁸ Yetok ixim pan tu', ok yak'on eb conob ukc'onok no ach'ej calnel junjun abil is k'inal, yetok jun no ach'ej wacax, yetok c'apax cac'on no icham calnel c'am wal jabok is tacnakil juntzan no no' ti'. A no' ti' chi ak'lay tz'a masanil in satak tol watx' chi wabej, cax che yak'on c'apax vino yetok.

¹⁹ Che yak'on c'apax junok no mam chiwo yin xajanbalil yuj tancan el e mul, yetokc'al cac'onok no calnel tol junjun abil is k'inal, yin ofrendail yuj e junc'ulalil wetok.

²⁰ A jun sacerdote chi batxban oc no calnel, c'al ixim pan yin xajanbalil in satak, tol wet yayji. Lajwi tu' chi cancan bay jun sacerdote tu'.

²¹ A yet is c'ual jun k'in ti', c'am junok makan mulnajil chi je' e yuneni. Che wajban e ba yin e yoc yin ayilal ayin. A jun ti' ley chi yuncan e xol, c'al xol e yinatil yin tojbalk'inal, tzanc'al baytal ayex ec'ok.

²² A yet chi apni tiempoal e c'upon e trigo, c'am che sic'aj ixim chi cancan bay xolak yakan, c'al ixim ay bay is tilak, yujtol a juntzan tu', yet eb meba', c'al yet eb tx'ok conobal ayic' e xol. Ayin Jehová e Diosal in chi wala', ẍi Jehová, cachi, ẍi Cham.

K'in yet ch'en trompeta

²³ Max yalon pax Jehová bay Moisés:

²⁴ Al bay eb et conob axca ti': A yet babel c'ual yet is suk xajaw chex xewi, che wajban oc e ba yin ayilal ayin, cax chi xulay ch'en trompeta yet che naontek in watx'c'ulalil.

²⁵ Yowalil che yak' tz'a junok no xajanbal ayin. C'am junok ex chex mulnaj yet jun c'ual tu', ẍi Jehová, cachi, ẍi Cham.

K'in yet chi ak'lay tan mulej

²⁶ Max yalon pax Jehová bay Moisés:

²⁷ A yet 10 c'ual waay yet is suk xajaw, a ton is c'ual yet chi ak'laycan tan mulej, che wajbaj oc e ba yin ayilal ayin, c'al yin c'ajbanc'ulal, cax che yak'on tz'a ofrenda yin xajanbalil.

²⁸ C'amc'al chex mulnaj yet jun c'ual tu', yujtol a wal yet jun c'ual tu' chi tancan el e mul in satak ayin Jehová e Diosal in ti'.

²⁹ Ta ay junok mactxel tol c'am chi iken yoc yin c'ajbanc'ulal yet jun c'ual tu', yowalil chi c'aylay el e xol.

³⁰ Yetok c'apaxok, tzanc'al mac chi mulnaj yet jun c'ual tu', chi wak' c'ayilok.

³¹ C'am junok mac chi je' mulnaj yin tzanc'al tzet mulnajilal yet jun c'ual tu'. A jun ti' ley chi yuncan e xol, c'al xol eb e yinatil tzanc'al bay ayex ec'ok yin tojbalk'inal.

³² A jun c'ual tu', a ton wal yet chex xewi, c'al yet chex oc yin c'ajbanc'ulal, chi chail yich yet wal 9 c'ual waay xajaw yet is k'ekbintakil, masantac'al yet is k'ekbintakil yet junxa c'ual, ẍi Cham bay Moisés.

K'in yet chinama

³³ Max yalon pax Jehová bay Moisés axca ti':

³⁴ Al bay eb et conob: A yet olajonebxa waay yet is suk xajaw cax che chaon ukeb c'ual k'inal chinama yuj in e yion aj can.

³⁵ Cax che wajban oc e ba yin ayilal yet babel c'ual; a yet jun c'ual tu', c'am junok mactxel chi mulnaji.

³⁶ A yin ukeb c'ual tu', junjunc'al c'u che yak'on tz'a xajanbal ayin; axa yet is waxakeb c'ual xin, che wajban oc e ba yin ayilal, c'al e yak'on tz'a xajanbal, yujtol in k'in yayji, c'am junok mactxel chi mulnaji.

³⁷ A ton yin juntzan k'in ti' chin e yi can ayin Jehová in ti'. Che wajban e ba yin ayilal, cax che yak'on tz'a xajanbal. Ay xajanbal chi ak'lay tz'aok, c'al ofrenda yin tzet chi loji. Ay c'apax xajanbal, c'al ofrenda chi ak'lay yin vino, junjun makan chi ak'lay yin atac'ala' is c'ual albilcanok.

³⁸ Tx'ok yel juntzan xajanbal ti', yintak juntzan xajanbal chi ak'lay yet c'ual xewilal albil wuj. Tx'ok yel juntzan xajanbal ti' yintak xajanbal chi ak'layc'alta'a. Tx'ok yel c'apax yintak e sabal tol max e yak' e ti' e yak'oni, yetokc'al e yofrenda tol chi el yin e c'ul e yak'on ayin.

³⁹ Axa yet olajonebxa c'ual waay yet is suk xajaw, yet mayal wajchaj aj sat awoj bay tx'otx', cax ok e chaon k'in in satak yin ukeb c'ual. A babel c'ual, c'ual xewilal, ac'ala' c'apax yet is waxakeb c'ual.

⁴⁰ A wal yet is babel c'ual tu', che yitek satlak te te' tol caw wal watx', is xaklak palma, c'al is k'ab te sauce ay bay tilak a' aej, c'al is k'ab juntzanxa te' xiwil xak. Axca tu' chi yun e yion aj can k'inal chinama. A yin waxakeb c'ual tu', tzalojc'ulal e yayji in satak.

⁴¹ Junjunc'al abil yet is suk xajaw, cax che chaon jun k'in ti' yin ukeb c'ual, yuj in e yion aj can. A jun ti' ley chi yuncan e xol, c'al xol eb e yinatil yin tojbalk'inal.

⁴² A yin ukeb c'ual tu', e masanil ayex israel ex ti', yowalil chex cajay bay yulak chinama,

⁴³ yet watx' chi yojtaknejc'al el eb e yinatil yet bak'in, tol a bay yulak chinama max ex ayji ec' yet max ex wion eltek bay Egipto. Ayin Jehová e Diosal in chi wala', ẍi Jehová, cachi, ẍi Cham.

⁴⁴ Axca wal tu' max yun yak'on Moisés yojtaknej el conob Israel is c'ual juntzan mimek k'in chi chalay yuj is yibanilok aj can Jehová.