Lv 21 - A Txꞌan Biblia Yin Kꞌanjobal 1989

Juntzan chekbanilej yin eb sacerdote

¹ Max yalon Jehová bay cham Moisés: Al bay eb sacerdote, eb is yinatil Aarón, tol c'amokab chi yetnejtok ba eb satak ley yuj yapni oc eb c'atan junok camnak, caxc'al yicanto ba yetok.

² Asan ta yuj is txutx, ma yuj is mam, ma yuj junok is c'ajol, ma yuj junok is cutz'in, ma yuj junok is yuẍtak,

³ ma yuj junok is yanab tol c'amto yetbi, tol cajan ec' yetok, a yuj juntzan tu', chi je' yetnentok ba satak ley.

⁴ Palta c'am chi je' yetnentok ba eb yujc'al is mimanil eb yican yetbi.

⁵ C'amokab chi tzukil eb xil is jolom, c'am c'apax chi tzukil eb xil is ti', tamwal yak'on yasjok eb is mimanil yuj camichal junok anima.

⁶ Palta tol chi watx'nej wal oc ba eb yul in k'ab, manokab yobok chi yun in binaj yuj eb, yujtol a eb, chi ak'on tz'a xajanbal, c'al yak'on eb ixim pan yin ofrendail ayin, xan yowalil tol watx'c'al yayji eb.

⁷ C'am c'apax chi je' yion eb junok ix ajmul ix, tamwal junok ix ix tol ayxa winak max ec' yin, tamwal junok ix tol pojlejnak ba yetok yichamil, yujtol sic'bil el eb yuj yoccan eb wetok.

⁸ Ayokab q'uexanil eb yul e sat, yujtol a eb, chi aon oc ixim pan yin ofrendail in satak. Q'uexanokab yel eb yul e sat, yujtol ayin Jehová in watx' inc'al, ayin max in sic'can el eb, yet watx' chi yuncan eb.

⁹ Ta a junok is cutz'in junok eb sacerdote tu' chi yetnejtok ba yin yoc yin ajmul ixal, a jun tu' chi yiel q'uixwil is mam, yowalil chi ak'lay tz'aok.

¹⁰ A jun sat sacerdote ay is yikbej yaon oc is pichil, tol txequel wal yayji ocok, yujtol max alay ajtok aceite yiban is jolom yet max sic'laycan elok, yuj tu' xan c'am chi je' tol toxac'al chi toj tzican xil is jolom, tamwal tzilontok ti' is pichil yuj tx'oxon el junok is cusc'ulal.

¹¹ C'am c'apax chi je' yetnentok ba yuj yoctok bay ayic' junok camnak, caxc'al is mam ma is txutx.

¹² A yuj camichal eb tu' c'am chi je' yel bay in cajlobal, tamwal yuten in cajlobal yin yaynakil, yujtol max alay ajtok aceite yiban is jolom, yujc'al sic'laycan el yuj yoccan wetok. Ayin Jehová in chi wala'.

¹³ A jun sat sacerdote, a wal junok ix k'opoj tol c'amtoc'al winak chi k'umej chi yi'.

¹⁴ C'am chi je' yion junok ix camnakxa yichamil, tamwal junok ix tol pojlejnak ba yetok yichamil, tamwal junok tol ayxa junok winak max ec' yin, tamwal junok ajmul ix chi je' yioni. Palta a junok ix chi yi', tol acaw k'opoj, tol yet conob c'apax ba yetok,

¹⁵ yet watx' man yaynakilok chi yun yeloc eb yuninal xol eb yet conob, yujtol ayin Jehová in max in sic'can elok, ẍi Jehová, cachi bay eb, ẍi Cham.

¹⁶ Max yalon Jehová bay cham Moisés axca ti':

¹⁷ Al bay Aarón: Tinani', c'al yet ok beyc'altok, c'am junok eb yin is yinatil, tol ay palta is mimanil ok je' yak'on yofrenda eb yet conob ayin.

¹⁸ Yuj tu' xan yel wal c'am junok tol man watx'ok yayji is mimanil tu' ok je' yunen jun opiso tu', ta c'am chi je' yilwi, ma chi ay beyi, ma man watx'ok yayji is txam ma txiquin,

¹⁹ ma tol k'ajil is xub, ma k'ajil is k'ab,

²⁰ ma tol nojan ayok chi beyi, ma junok tol man lajajiok yayji is mimanil, tamwal junok man watx'ok yilwani, ma ayiltek yabil yin, ma ay yaxk'ayil yin is mimanil; tamwal junok mak'bil poj yetbeyom is winakil.

²¹ C'am wal junok eb yinatil Aarón tol man watx'ok yayji is mimanil, chi je' yoc in satak yetok junok xajanbal tol chi ak'lay tz'aok. Ta man watx'ok yayji is mimanil tu', c'am chi je' yak'on ofrenda ayin.

²² Chi je' loon eb juntzan ofrenda tu', c'al yetok masanil juntzan tzet yetal tol wet yayji ocok,

²³ palta c'am chi je' yoctek bay yul in cajlobal, tamwal yoctek bay altar, yet watx' c'am chi yun yin yaynakilal in cajlobal, yujtol ayin Jehová in, wet yayji juntzan tzet yetal tu', ẍi Jehová, cachi bay Aarón, ẍi Cham.

²⁴ Xan max watx' alnej cham Moisés juntzan ti' bay cham Aarón c'al bay eb is c'ajol cham Aarón tu', c'al yetok bay masanil eb yet israelal tu'.