Lv 14 - A Txꞌan Biblia Yin Kꞌanjobal 1989

Chekbanilej yin eb max ec'lej lepra yin.

¹ Max chek Jehová Moisés yal juntzan ley ti', xan max yala':

² A ton wal jun ley ti' chi yikej junok anima tol max ec'lej lepra yin, a yet jun c'ual yet chi yilon junok sacerdote, cax chi yaloni tol watx'xa c'ul.

³ Chi eltok jun sacerdote tu' bay yinel campamento. Ata bay tu' chi yila' ta a jun ilya' tu' mayal watx'ji.

⁴ Ta mayal el jun ilya' tu', chi chekon yilaytek cac'onok no tz'iquin yin yiquisal, a ton no' watx' atac'ala' yalon ley. Chi tit c'apax te c'ute', an cak k'ap, c'al an hisopo.

⁵ Chi lajwi tu', cax chi cheklay mak'lay cam junok no tz'iquin tu' yiban junok tx'otx' xij bay ayaytok aej, tol chi tit bay junok aej chi ajol nuk', yet watx' chi aytok chiq'uil no' xol a'.

⁶ Chi ilaytek junxa no tz'iquin tu' yin yiquisal, yetok te c'ute', yetok an cak k'ap, c'al yetok an hisopo, cax chi lalay aytok xol chiq'uil no camnakxa tu' soman yetok aej.

⁷ Ukel chi txijlay oc yin jun mac max ec'lej jun ilya' tu' yin, cax chi yalon jun sacerdote tu' tol watx'xa jun anima tu'. Axa no tz'iquin tol iquisto tu', chi beklaycan el no'.

⁸ A jun mac chi il-lay tol watx'xa tu', yowalil chi tx'ajil is pichil, cax chi achinwi, c'al tzukon el ba masanil, yet watx' watx'xac'al chi yuncanok. Catatu' chi je' yoctok bay yul campamento, palta c'amto chi je' yoc bay yul is cajlobal yin ukebokxa c'ual.

⁹ Axa yet is suk c'ual tu', watx' chi yun tzuklay el is jolom. Watx' chi yun tzukon el xil is ti' c'al txow sat, yetokc'al masanil xil ay yinlak is mimanil, chi tx'ajon el is pichil c'al yachinwi. Caytu' chi yun watx'jican elok.

¹⁰ Axa yet is waxak c'ual xin, cax chi yiontek cac'onok no ach'ej calnel, yetok junok no k'opoj calnel jun abil is k'inal, tol c'amc'al jabok is tacnakilal no'. Cax chi tit c'apax nan suk libra harina caw wal watx', sombil yetok aceite, chi ak'lay yin ofrendail, yetok c'apax oxebok octavo aceite.

¹¹ Axa jun sacerdote tu' chi chekon oc waan jun anima yetok is yofrenda tu' satak Jehová bay satak mantiado bay chi co chalej co ba yetok Cham.

¹² Chi lajwi tu', cax chi ilaytek junok no ach'ej calnel tu' yetok aceite, cax chi batxlay ec' juntzan tu' satak Jehová yin xajanbalil, yuj tojlanelay mulej.

¹³ A bay chi camc'alta' no' chi ak'lay yin xajanbalil yuj tancan el mulej, c'al no xajanbal chi tz'a masanil, a tu' chi ak'lay cam no ach'ej calnel tu', yujtol a no' chi ak'lay yuj tojlanelay mulej; yet jun sacerdote chi yuncan no', axca ton no' chi ak'lay yuj tancan el mulej, tol yet Jehová yayji ocok.

¹⁴ Chi lajwi tu' cax chi yiontek jun sacerdote janic'ok is chiq'uil no xajanbal yuj tojlanelay mulej, cax chi bonon oc yin mac lanan yil-lay tu', a yin xaxojal txiquin bay is watx', c'al yin txutxal yiximal is k'ab bay is watx', c'al yin txutxal yiximal yakan bay is watx'.

¹⁵ Cax chi yion c'apax aj jun sacerdote tu' janic'ok aceite, chi secon ay yul is q'uexan k'ab,

¹⁶ cax chi laon aytok jun yiximal k'ab bay is watx' xol aceite. A yetok jun is k'ab chi laaytok xol aceite tu', chi txijay ukelok aceite tu' satak Jehová.

¹⁷ A aceite chito cancan yin is k'ab jun sacerdote tu', chi jo oc yin jun anima lanan yil-lay tu', ac'ala' yin xaxojal is txiquin bay is watx', c'al yin txutxal yiximal k'ab bay is watx', c'al yin txutxal yiximal yakan bay is watx', a ton bay ayxa oc is chiq'uil no xajanbal yuj tojlanelay mulej.

¹⁸ Axa janic'okxa aceite chi alaycan ajtok yiban jolom jun anima lanan yil-lay tu'. Caytu' chi yun tancan is mul jun anima tu' satak Jehová.

¹⁹ Chi lajwi tu' cax chi yak'on pax jun sacerdote tu' no xajanbal yuj yak'lay tan mulej. Caytu' chi yun tancan el is mul junok mactxel lanan yil-lay tu'. Chi lajwi tu xin, cax chi mak'lay cam no calnel ok tz'a masanil yin xajanbalil;

²⁰ junej chi yun yak'lay yiban altar yetok ofrenda chi ak'lay yin tzet chi loji. Caywal tu' chi yun tancan el is mul jun anima tu' satak Jehová, cax chi watx'jican elok.

²¹ Tatol meba' jun anima max ec'lej jun ilya' tu' yin, c'am is tumin yet chi yak' xiwilok tzet yetal, asan chi yitek junok no ach'ej calnel yet chi batxlay oc satak Jehová yin xajanbalil, yuj tojlanelay mulej, cabnej libra ixim harina caw wal watx', sombil yetok aceite, chi yak' yetok oxebok octavo aceite.

²² Chi yi' c'apaxtek cac'onok no jobbejal paloma tzanc'al tzet makanil, atac'ala' jantak chi je' manchaj yuj. Jun no' chi ak'lay yin xajanbalil yuj yak'lay tan mulej, axa junxa no' xin, chi ak'lay tz'aok.

²³ A yet is waxak c'ual cax chi yiontek masanil juntzan ti' bay junok sacerdote yet is watx'jubal elok. A juntzan ti' chi alay oc satak Jehová bay satak mantiado bay chi co chalej co ba yetok Cham.

²⁴ Chi lajwi tu' cax chi yiontek jun sacerdote tu' no calnel yetok aceite tu', cax chi batxon ec' satak Jehová yin xajanbalil yuj tojlanelay mulej.

²⁵ Chi ak'lay cam no ach'ej calnel tu', chi yion aj janic'ok chiq'uil no xajanbal tu', cax chi bonon oc yin xaxojal is txiquin jun anima tu' bay is watx', c'al yin txutxal yiximal k'ab, c'al yin txutxal yiximal yakan, ac'al yin is watx' chi oqui.

²⁶ Chi lajwi tu' cax chi yaon ay janic'ok aceite bay yul is q'uexan k'ab.

²⁷ Yetok babel yiximal k'ab bay is watx', chi txijay ukelok aceite ayay yul is k'ab tu' satak Jehová.

²⁸ Cax chi alay c'apax oc janic'ok aceite tu' yin is txiquin jun anima tu' bay is watx', c'al yin txutxal yiximal k'ab, c'al yin txutxal yiximal yakan; a ton bay maxax alay oc chiq'uil no xajanbal tu'.

²⁹ Axa janic'okxa aceite tu', chi yacan ajtok jun sacerdote bay yiban is jolom jun anima tu', yet chi tancan is mul satak Jehová.

³⁰ Chi lajwi tu', cax chi mak'on cam jun sacerdote tu' no paloma tu' cac'onal.

³¹ A junok no paloma tu', chi ak'lay yin xajanbalil yuj yak'lay tan mulej, axa junxa no' xin, chi ak'lay tz'aok yetok c'apax ixim harina chi ak'lay c'apax yin ofrendail. Caytu' chi yun tancan is mul jun anima chi il-lay tu' satak Jehová.

³² A ton leyalil ti' yin junok mactxel max ec'lej lepra yin, yet chi al-layi tol watx'xa ta c'am chi tzakay yak'on juntzan xajanbal axca wal is leyalil, ẍi Cham.

Chekbanilej yuj sakbanelay yulak na

³³ Max yalon Jehová bay cham Moisés, c'al bay cham Aarón:

³⁴ A yet ayexxa ec' bay tx'otx' Canaán, a ton tx'otx' ok wak' ayex e satakok, talaj c'uxan ok watok junok tzet yetal k'uxtak yili ok el lebebok bay yul e na bay tu',

³⁵ a mac ay yet te na tu' yowalil chi tit bay eb sacerdote cax chi yaloni: Ay juntzan tol k'uxtak yili lanan yel lebebok bay yul watut, ẍiokab bay eb.

³⁶ A yet c'amto chi octok junok sacerdote tu' yul na tu', yowalil chi yala' tol chi eltek masanil tzet yetal ay yul te na tu', yet watx' c'am chi tzakaytok ta chi yal jun sacerdote tu' tol man watx'ok yayji te na. Catatu' chi octok yilon tzetbil yili jun chi el lebebok tu'.

³⁷ Ta a yet chi yilon octok, tol a bay satlak pared tu', ay mimek lepquiltak, yax yili ma cak yili, yelc'ulal tol chi toj yulak ch'en tu',

³⁸ axa yet chi eltek bay yul te na tu xin, cax chi yaloni tol chi makaycan te' yin ukebok c'ual.

³⁹ A yet chi lajwi ukeb c'ual tu', cax chi toj pax jun sacerdote tu' yilon junelxa. Tatol mayal aj can toj lebebok jun k'uxtakil bay satlak pared tu',

⁴⁰ yowalil chi yal jun sacerdote tu', tol yowalil chi liplay eltek masanil ch'en ch'en tol mayal oc juntzan lepquiltak tu' yin, cax chi toj k'oklaycan bay junok lugar man watx'ok bay tiel conob.

⁴¹ Cax chi yalon c'apaxok tol chi joslay el masanil satlak pared yul te na tu', axa masanil is pokokal chi el yul tu', chi toj cancan bay jun lugar tol man watx'ok, bay tiel conob.

⁴² Tx'okxa ch'en ch'en chi oc pax cantok is q'uexelok ch'en chi ilay eltek tu', tx'okxa tx'otx' tx'otx' chi oc pax yinlak sat pared tu'.

⁴³ Tatol chi txecloj pax aj juntzan lepquiltak tu' junelxa, yet mayal ilay eltek ch'en ch'en tu', c'al yet mayal joslay el satlak pared tu', mayal oc pax can is q'uexel,

⁴⁴ chi toj il-lay pax yuj jun sacerdote junelxa. Ta mayal aj can jun k'uxtakil chi el lebebok tu' junelxa, ta axca tu' manxa watx'ok chi yuncan jun na tu'.

⁴⁵ Yuj wal tu', a jun na tu' yowalil chi uchlay ayok; masanil te te', ch'en ch'en, c'al tx'otx' tx'otx' ayoc yin jun na tu', chi toj alaycan bay junok lugar tol man watx'ok, bay tiel conob.

⁴⁶ Tzanc'al mactxel chi octok yul jun na tu' yin ukeb c'ual yet mayal yal jun sacerdote tol chi makaycanok, a jun tu' man watx'ok chi yuncanok atac'ala' yalon ley, masantac'al yet chi k'ekbican ayok.

⁴⁷ Tzanc'al mactxel chi lowi, ma chi way bay jun na tu', yowalil chi tx'aj is pichil, catatu' chi watx'jicanok, atac'ala' yalon ley.

⁴⁸ Ta a yet chi octok jun sacerdote yilon jun na tu' cax chi yiloni tol a juntzan lepquiltak tu' c'am chi beytoji, yettaxc'al max watx'nelaycan yul te na tu', axa yalon tu', tol watx'xa jun na tu'.

⁴⁹ A yet chi watx'ji el te na tu' junelxa, chi ilaytek cac'onok no tz'iquin yetok te c'ute', yetok an cak k'ap c'al an hisopo.

⁵⁰ Axa yak'on cam jun sacerdote junok no coc' tz'iquin tu' yiban jun tx'otx' xij tol ayaytok aej yul, a' tol chi tit bay chi ajol nuk' junok aej.

⁵¹ Chi lajwi tu' cax chi yiontok te c'ute' tu', c'al an hisopo yetok an cak k'ap yetok no tz'iquin tol iquisto, cax chi laon aytok xol chiq'uil no camnakxa tu', somanxa yetok a' aej ay yul tx'otx' xij tu'. Ukel chi txij oc yin te na tu'.

⁵² Axca tu' chi yun watx'jican el jun te na tu' yuj is chiq'uil no tz'iquin tu', c'al yetok a' aej chi ajol nuk', yetok c'apax no tz'iquin iquisto yetok te c'ute', yetok an hisopo, c'al yetok an cak k'ap.

⁵³ Chi lajwi tu xin, cax chi beklaycan tok jun tz'iquin tol iquis tu' bay tiel conob. Caytu' chi yun yikelay is leyalil yin junok na, cax watx' chi yuncanok, ẍi Jehová.

^54-57 A ton juntzan chekbanilej ti' yin lepra yin tol chi malajok, ma tol yin yaxk'ayil, ma yin lepquiltak sak yili, c'al yin juntzan k'uxtakil yin pichilej, c'al yinlak te na. Caytu' chi yun nachaj elok tzet yetal tol man watx'ok yayji, c'al tzet yetal tol watx'. A ton cayti' chi lajwican chekbanilej yin juntzan ti'.