Lv 1 - A Txꞌan Biblia Yin Kꞌanjobal 1989

A juntzan xajanbal chi tz'a'i

¹ A ton juntzan ley ti' max yal Jehová bay Moisés yuj tzet chi yun yak'lay xajanbal. Atac'al bay yul mantiado bay chi co chalej co ba yetok Jehová max awtelayi. Max yalon Cham bay tol chi yal juntzan chekbanilej ti' bay eb yet israelal.

² Xan max yal cham Moisés axca ti': Ta ay junok chi yitek junok no no' yuj tz'aon masanil yin xajanbalil bay Jehová, a xol is wacax, xol is calnel, ma xol is chiwo chi yitek.

³ Ta wacax no' chi yak' tz'a yin xajanbalil*fn* tu', a wal junok no toro caw wal watx' chi yitek. A bay satak jun mantiado bay chi co chalej co ba yetok Jehová, a tu' chi yaoc satak Cham, yet watx' chi chalay bay.

⁴ Yowalil chi yaoc is k'ab yiban jolom no no' tu', caytu' chi yun chalay no no' tu', yuj yak'lay tan is mul.

⁵ A jun ay yet no no' tu', chi mak'on cam no' satak Jehová; axa eb c'ajol Aarón tol sacerdotexa yayji, a eb chi iontek is chiq'uil no'; lajwi tu' chi txijon oc eb yin canpaq'uil jun altar ayic' bay satak mantiado.

⁶ Lajwi tu' chi yion el is tz'umal no', cax chi coc' tzoc'nentok no chibej tu'.

⁷ Axa eb sacerdote c'ajol Aarón tu', chi aon oc k'ak' k'ak' bay yiban altar, cax chi yaonc'al oc eb is sial.

⁸ Chi alay ajtok no chibej coc' tzoc' yayji tu' yiban te si' yetok no jolomej, c'al no sebo chi ilay el yin no yulc'ulej.

⁹ A mac chi ak'on no xajanbal tu', yowalil chi tx'aj no yulc'ulej, c'al no xubej yetok no yakanej, axa cham sacerdote chi ak'on tz'a jun xajanbal tu' yiban altar. Watx' jun xajanbal chi tz'a tu' chi yab Jehová.

¹⁰ Ta calnel ma chiwo no' chi ak'lay yin xajanbalil tu', yowalil tol icham no', c'am jabok is tacnakil.

¹¹ A bay yetc'ulal norte, a tu' chi ak'lay cam no' satak Jehová. Axa eb c'ajol Aarón chi txijon oc chiq'uil no' yin canpaq'uil jun altar tu'.

¹² Chi lajwi tu' cax chi coc' tzoc'nelaytok no', axa cham sacerdote chi aon ajtok no coc' tzoc'xa yayji tu' tz'a yiban k'ak' bay yiban altar, yetok no jolomej, c'al no sebo chi el yin no yulc'ulej.

¹³ Axa jun mac chi ak'on no xajanbal tu', yowalil a' chi tx'ajon no yulc'ulej, c'al no xubej yetok no yakanej, axa cham sacerdote chi ak'on tz'a masanil bay yiban altar. Watx' jun xajanbal chi tz'a tu' chi yab Jehová.

¹⁴ Ta tz'iquin no xajanbal chi ak'lay tz'a masanil satak Jehová, yowalil tol a junok no jobbejal paloma tzanc'al tzet makanil.

¹⁵ A cham sacerdote ok iontek no xajanbal tu' bay altar, chi tx'umlay el nuk' no' cax chi elxac'al is jolom, cax chi ak'lay tz'aok. Yowalil chi txijlay oc is chiq'uil no' yin jun pac' altar.

¹⁶ Chi ilay eltek masanil bay chi ec' is lobej no' yetok lobej no' ayoc yul, cax chi k'oklaycantok bay yetc'ulal altar bay chi ajol c'u, chi yal elapnok, a ton bay chi wajay tan.

¹⁷ Chi lajwi tu' cax chi mitx'lay xic' no' yuj jech'lay ay nan yichin no', palta c'am chi ayxac'al nan no' junelnej, axa yak'on tz'a jun sacerdote no' yiban te si' ayajtok yiban altar tu'. Watx' jun xajanbal chi tz'a tu' chi yab Jehová.