Lm 5 - A Txꞌan Biblia Yin Kꞌanjobal 1989

Txaj yuj k'anoj yabenc'ulal Jehová

¹ Natek Mamin Jehová jantak wal tzet yetal mayal ec'tok jiban on; ilawal chi yun jetax on.

² A co satak, axac'al yul k'ab eb tx'ok conobal ayic'ok; axa jatut, yet-xa eb tx'ok animail yayji ocok.

³ Meba' unin onxac'al, c'amxa co mam on, axa eb co txutx on, mayal can eb tx'oklil, cax c'amxa yichamil eb.

⁴ A a' aej chi juc' on, tolxac'al chi co man a', axa co si' on, tolxac'al chi co tojlanej.

⁵ Ayc'al oc eb ajc'ul jin con yukten ec'ok; caw wal chon c'unbi, palta c'amxa chi yal c'ul eb chon xewi.

⁶ Max toj batxan co k'ab bay eb aj Egipto c'al bay eb aj Asiria, yuj co chaon ch'an jabok co lobej.

⁷ A eb jichmam on max oc is mul, palta mayal cam eb, axa jiban on chi titcan yailal yuj is mul eb tu'.

⁸ A tinani' ayon oc yul k'ab eb mosejal yayji, c'amxa mactxel chon colon el yul k'ab eb.

⁹ A jabok co lobej, puralxac'al chi ji', yujtol ay is may yuj eb ak'om owal bay tz'inan tx'otx'.

¹⁰ Mayal k'ekbi el co tz'umal, yuj chi tit k'ak' jin yuj wajil.

¹¹ A bay Sión, c'al bay conoblak Judá, caw wal chi etnelay eb ix ix yetok eb ix k'opojtak ix.

¹² Max aj locan eb co yajawil yuj eb ajc'ul oc jin, cax c'amxa jabok yelapnok eb cham icham winak yul sat eb.

¹³ A eb winak tol caw wal tec'an waayi, chi alay oc eb yin ak'oj coj harina; axa eb nak ach'ej chi telc'ojtok eb nak yalan si'.

¹⁴ C'amxa eb icham winak ayic' bay puertail-lak conob yin beyc'ulnewi. C'amxa eb ach'ej chi oc nuk' bitni.

¹⁵ C'amxa co tzalojc'ulal. A co canal yin tzalojc'ulal, cusc'ulalxa max yutcan aj ba.

¹⁶ Tok ayto co corona ayajok; ok'bal on c'ul, yuj max jaoc co mul.

¹⁷ Yuj tu' xan caw wal ya' on ay chi jabej, lananxa c'apax k'ektanil chi jila'.

¹⁸ A bay tzalan Sión, mayal uchchaj ay nalak; axac'al bay tu' chi ayji ec' no wax.

¹⁹ A pax ach ti' ach Jehová, Yajaw achc'al; ayc'al ec' ekbej yin tojbalk'inal.

²⁰ ¿Tzet yuj xan chon tojcan c'ayc'ulal oj yin junelnej? ¿Tzet yuj xan caw wal najatilxa on a bekoncanok?

²¹ Mamin Jehová, ion meltzoj ayach junelxa, axa co meltzoj tu'. Matawal watx' chi yun yec' junelxa juj, axca jayji yet yalantok.

²² Akxa tinani' max on entaknejcan el yin junelnej. Yelxac'al max tit yowal a c'ul jin on Mamin Jehová.