Lc 24 - A Txꞌan Biblia Yin Kꞌanjobal 1989

Yictzojbail Jesús

¹ A yet lananto sakbi yet domingo, jun babel c'u yul semana, max toj eb xal bay max bet mukaycan octok mimanil Jesús tu'. Yetbi eb juntzan ambal suk'uk'i jab max watx'nej eb.

² Max apni oc eb, max yilon eb, elnakxa ch'en is makil jun ch'en bay max mukayi.

³ Max octok eb yul ch'en, axa yilon eb, c'amxa mimanil Cham Jajawil Jesús ayic' bay tu'.

⁴ Caw wal max c'ayaj c'ul eb yiloni. Axa yilon eb, ayic' cawan ángel axca yili winak, waan oc eb bay is c'atan eb. Chi tzekeki yili is pichil eb ángel tu',

⁵ xan caw wal max xiwaj eb xal cax yay t'anan eb sat tx'otx'. Axa yalon eb ángel tu' bay eb xal axca ti': —¿Tzet yuj xan a bay chi mukay eb camnak ti' che say Cham tol iquisxa?

⁶ C'amxa Cham ayic' cayti'. Mayal ictzonelay aj Cham. Naektek tzet max yalcan ayex, yet ayto ec' e yetok bay Galilea.

⁷ Max yalcanok tol a' Chekbiltek yuj Dios xol eb e yet animail, palta yowalil ok alay oc yul k'ab eb yobtakwom, cax ok alay oc yin curus. Axa yet cabjial tu', cax ok ictzonelay ajok, ẍi, max yaloncan ayex, ẍi eb bay eb xal.

⁸ Catatu' max naontek eb tzet albilcan bay eb yuj Jesús.

⁹ Max lajwi tu', axa pax eb tu'. Max toj yalon eb jun abix ti' bay eb is chekbej Jesús yusluc'wanil, c'al bay eb is cuywom masanil.

¹⁰ A xal María aj Magdala, xal Juana, yetok xal María txutx Jacobo, a eb max bet alon juntzan abix tu'. Ay c'apax jun cawanxa eb xal ix ajun yetok eb.

¹¹ Palta a eb is cuywom Jesús tu', maj cha eb yabej; toc'al chi yal eb xal, wal naon eb.

¹² Axa yaj wan Pedro tu', max yak'on yanej toj bay ch'en ch'en tu'. Max apni, max ay nojan yilon octok yul ch'en tu'. Asanxanej an pichilej tx'ok tx'okxac'al lanan canok. Caw wal max c'ayaj c'ul yin juntzan max yil tu'. Axa pax tu'.

Max tx'oxaj ba Jesús bay yul be

¹³ A yet jun c'ual tu', ay cawan eb is cuywom Jesús lanan toj yul be chi apni Emaús. A jun conob tu', ay mi oxebok legua xol ba yetok Jerusalén.

¹⁴ A yet lanan bey eb tu', chi yalon eb yuj tzet max uji.

¹⁵ Yak'banc'al a jun tu' chi yalubtanejtek eb, max jayoc Jesús c'atan eb, cax junnejxac'al bey Cham yetok eb.

¹⁶ Chi moyi aj sat eb yuj, yet watx' c'am chi yojtaknej el eb tatol a Cham.

¹⁷ Axa k'anlen Jesús bay eb: —¿Tzet yetal che yala' chex bey ti'? ẍi bay eb. Max oc waan eb, cusiltakxac'al yili sat eb.

¹⁸ Axa tak'wi jun chi yik Cleofas bay yin aymanil: —Toltax yojtak masanil anima tzet max uj bay Jerusalén yet cabji oxji ti'. Axa ach ti', ¿tom c'am chab jabok? Palta ilab max ach ec' pax bay tu', ẍi bay.

¹⁹ —¿Tzet max uj bay tu xin? ẍi Jesús bay. —Ay jun aj Nazaret chi yik Jesús, caw wal chekbej Dios yayji. A tzet max el watx'neni c'al tzet max el yaloni, caw wal miman yelapnok yul sat Dios c'al yul sat eb anima masanil.

²⁰ Palta a eb yajawil eb sacerdote, yetok eb yajaw yayji co xol, max aon oc yul k'ab camich. Yuj tu' max alay oc yin curus.

²¹ A ton Cham tu' max jaoc yipok co c'ul, tol ok on colchaj el ayon israel on ti' yuj. Palta tinani', cabjitaxxa yunen juntzan tu'.

²² Ay juntzan eb xal tol jetbeyom on, max c'ayaj co c'ul yuj, yet max jabeni, yujtol a yet max sakbi, max bet yilon eb ch'en ch'en bay max bet alay octok mimanil Cham,

²³ palta c'amxa is mimanil tu'. Max toj eb yalon ayon tol max yilon eb juntzan ángel. Max yalon eb ángel tu' bay eb, tol iquis Cham.

²⁴ Maxc'al lajwi tu', ay juntzan eb jetbeyom max bet ilonok. Axcac'al yalon eb xal ix tu', caytu' max yut yilon eb, palta maj yil eb yin Jesús, ẍi eb bay.

²⁵ Yuj tu' xan max yal Jesús bay eb; —Ayex ti', axca wal tol c'am jabok e nabal. Caw ya' puralil che yaoc yin e c'ul jantak tzet albilcan yuj eb chekbej Dios payxa.

²⁶ A Cham Cristo, yowalil tol t'inan yaben yail juntzan tu' yet manto oc Yajawilal, ẍi bay eb.

²⁷ Max lajwi tu', max chaon el yich yalon bay eb, baytakc'al ayay yabixal yul tx'an Un Tz'ibbilcanok. Max chaontek yich yalon tzetak tz'ibbilcan yuj Moisés. Max yalon c'apaxtek tzet tz'ibbilcan yuj eb chekbej Dios yet payxa.

²⁸ Axa yet max apni eb bay jun conob bay lanan toj eb tu', ijan palanc'al yeq'uel Jesús.

²⁹ Palta max yak' pural eb mitx'on waayok. Max yalon eb bay axca ti': —Canan jetok, ilab lanan yay c'u, lananxa k'ekbi, ẍi eb bay. Axa yoc yul na tu', max can bay tu' yetok eb.

³⁰ Axa yet max oc chotan yin meẍa yetok eb, max yion aj jun ixim pan, max yalon yuj diosalil bay Dios yuj. Lajwi tu', axa bijon ec' xol eb tu'.

³¹ A yet jun bek tu' axca wal tol max jakchaj sat eb. Catatu' bian max yilon oc eb, tol a Jesús. Lajwi tu', max yesnen c'ay ba. Axa yilontek eb, c'amxa mactxel.

³² Max yalon eb axca ti': —Yel toni, caw wal max jay co nabal, yet max yalon ayon yul be, yet max yak'on nachaj el juj tzetak chi yal tx'an Un Tz'ibbilcanok, ẍi eb.

³³ Max meltzojxac'al eb bay Jerusalén yet jun bek tu', max yil eb yin eb chekbej Jesús yusluc'wanil bay tu', yetok juntzanxa eb yetbi eb. Wajan ec' eb bay tu'.

³⁴ Axa yalon eb wajan ec' tu' bay eb cawan tu' axca ti': —Wal yel max ictzoj aj Cham Jajawil junelxa. Max tx'oxaj ba bay Simón ti', ẍi eb.

³⁵ Max lajwi tu', max yalontek eb cawan tu' tzet max yun eb yulak be. Max yalon c'apaxtek eb tzet max yun nachaj el Jesús yuj eb, yet max bijon ec' ixim pan.

Max tx'oxaj ba Jesús bay eb is cuywom

³⁶ Lananto yalon eb juntzan tu', axa yilontek eb, ayxa ec' Jesús nan xol eb. Max yalon axca ti': —Junc'ulalokab ayex, ẍi bay eb.

³⁷ Axa eb, toc'al max xiwaj eb, cax max c'ayaj c'ul eb. A naon eb tol lab jun chi yil eb tu'.

³⁸ Palta max yal Cham bay eb axca ti': —¿Tzet yuj xan toc'al chi somchaj el e c'ul yet chin e yiloni? ¿Tzet yuj xan cabtak e c'ul win?

³⁹ Ilek in k'ab ti', c'al wakan ti'. Ayin toni; mitx'ek in wali. Chi cam e yoc t'anan win. A junok lab, tok ay is chibejal, tok ay is bakil bay watx' e yoc lacan axca wet ti', ẍi bay eb.

⁴⁰ Max lajwi yalon jun tu', axa tx'oxon k'ab bay eb tu', c'al yakan.

⁴¹ Caxc'al max tzaloj aj eb, palta ac'ala' ijan maj yaoc eb yin c'ul, yujtol toc'al max c'ayaj c'ul eb, xan max yal pax bay eb axca ti': —¿C'am mi jabok tzet watx' chin lo' cayti'? ẍi bay eb.

⁴² Yuj tu' xan max yak' eb jab bolbil txay bay.*fn*

⁴³ Axa chaon tu', max chion satak eb.

⁴⁴ Lajwi chioni, max yalon pax bay eb axca ti': —A tinani', mayal wal yun axca walon ayex yet max quin ec' e yetok. Ilab max wal ayex tol yowalil ok yun jantak wabixal tz'ibbilcan yul ley Moisés, yetok tzet tz'ibbilcan yuj eb chekbej Dios, yetok juntzan wabixal yul libro Salmo, ẍi bay eb.

⁴⁵ Max lajwi tu', max yak'on jakchaj nabal eb, yet watx' chi nachaj el yuj eb, tzet tz'ibbilcan yul tx'an Un Tz'ibbilcan tu'.

⁴⁶ Xan max yal bay eb junelxa: —A yul tx'an Un tz'ibbilcan wabixal ayin Cristo in ti', tol yowalil ok in camok, cax chin ictzoj pax aj xol eb camnak yet cabjial.

⁴⁷ Yetok c'apaxok, yowalil tol yetok wikbej ok al-lay el k'anej Dios xol anima bay junjun nación. Ok al-lay el xol eb tol yowalil chi na ba eb yin is yobtakil, yet watx' chi jolay c'ay yobtakil eb tu' yiban. A bay Jerusalén ti' ok babjok yal-lay el wabixal; catatu' ok pukaxtok bay junjun conob.

⁴⁸ Ayex ti', ok e yak' e ba testigoal yin juntzan ti'.

⁴⁹ Max yak'can Dios is ti' tol a Yespíritu ok ayol ayex. A ton Cham ok tok in chektek, palta echbanejek bay Jerusalén ti', masantac'al che cha' e yikbej ok alay aytek satcan, ẍi Jesús bay eb.

Max paxaj Jesús bay satcan

⁵⁰ Catatu' max yiontok eb is cuywom bay cawilal conob Betania. Max yiaj is k'ab can bay tu', max k'anon watx'c'ulalil Dios yiban eb.

⁵¹ Lananto wal k'anon watx'c'ulal Dios tu', max ilay ajtok satcan, axa can eb yuj tu'.

⁵² Lajwi yion ay ba eb bay, max meltzoj eb yin tzalojc'ulalil bay Jerusalén.

⁵³ Junjunc'al c'u chi bet eb bay templo Dios yuj bet yalon eb is watx' k'anej bay Cham.