Lc 13 - A Txꞌan Biblia Yin Kꞌanjobal 1989

Yowalil chi co na co ba yin co yobtakil

¹ A yet jun tiempoal tu', ay juntzan eb max jayoc bay Jesús. Max yalontek eb yabixal tzetbil max yun yak'lay cam juntzan eb aj Galilea yuj Pilato, yet lanan yak'on eb juntzan is xajanbal bay Dios.

² Axa yalon Jesús bay eb tu' axca ti': ¿Tzet yuj xan caytu' max utlay eb aj Galilea tu' che na'? ¿Yuj mi tol yelxac'al yob is beybal eb yintak eb yet conob tu'?

³ Ayin chi wal ayex, c'amak. Palta ayex ti', ta c'am che na e ba yin e yobtakil, e masanil ok ex cam c'apaxok.

⁴ Naektek eb waxaklajonwan max cam bay Siloé, yet max ayc'ay te na miman is tel yiban eb. ¿Tzet yuj xan caytu' max yun eb che na'? ¿Yuj mi tol caw wal yob is beybal eb yintak eb yet aj Jerusalénal eb tu'?

⁵ Ayin chi wal ayex, c'amak. Palta ayex ti', ta c'am che na e ba yin e yobtakil, ok ex cam e masanil c'apaxok, ẍi Jesús bay eb.

Yabixal jun te higo c'am is sat

⁶ Max lajwi tu', max yalontek Jesús jun abix ti' bay eb: A junel, ay jun winak ay jun te higo awbil yuj sat is tx'otx'. Axa toj yilon tu' ta ay sat te'. Palta axa yet max apni ocok, tokc'al ay junok sat te' max ilchaj yuj.

⁷ Axa yalon bay nak chi mulnaj sat is tx'otx' tu' axca ti': Ilab oxebxa abilc'al c'oli ul wilon jun te' ti'. C'amc'al junok sat chi wila'. Yuj tu', tzoc'ajok. Nabac'al makbil el tx'otx' ti' yuj, ẍi bay nak.

⁸ Palta max yal nak ilom mulnajil tu' bay cham axca ti': Patrón, mata wal c'amto chi co tzoc'aj te' yet jun abil ti'. Ac'al wal chi wak'lej in t'ocon c'unbok tx'otx' yich, cax ok waon oc yabonoal.

⁹ Ta ok satnok, watx' chi yal tu'. Ta c'am chi satni xin, axa co tzoc'on aj axca alon tu', ẍi nak bay, ẍi jun abix tu', ẍi Jesús.

A ix ix watx'jinakcan yuj Jesús yet c'ual xewilal

¹⁰ A yet jun c'ual xewilal, max octok Jesús yul nail wajayil eb yet israelal yin culto. Axa c'oli cuywaj nan xol eb tu'.

¹¹ Ay jun ix ix ayic' bay tu', 18 abilxa yac'al ay yuj jun espíritu yob. Max coxloj ix yuj, max aycan nojan ix. C'amxa chi jichloj aj lecan ix.

¹² A yet max yilon Jesús tol ayic' ix, axa yawtentek Cham ix is c'atan tu', max yalon Cham bay ix axca ti': —Ach ix, ti wal chach watx'ji yin jun a yailal ti', ẍi bay ix.

¹³ Max lajwi tu', max matxban oc k'ab yiban ix. Yet jun bek tu', max jichlojcan nan ix. Max c'oli yalon ix is watx' k'anej bay Dios.

¹⁴ A cham yajaw nail wajayil tu', max tit yowal cham, yujtol a yet c'ual xewilal max watx'jican ix yuj Jesús, xan max yal bay eb anima wajan ec' tu' axca ti': —Wakebnej c'u moj co mulnaj yul semana. A yin wakeb c'ual tu', tzanc'al tzet c'ual chi je' ul e yak'on yak'lay watx'jokcan e c'ul yin e yailal, palta man mojok chi ak'laycan watx'jok e c'ul yet c'ual xewilal ti', ẍi cham bay eb masanil.

¹⁵ Axa yalon Cham Jajawil bay cham tu' axca ti': —A ex ti', caw wal cabsat ex. Ta ay junok e wacax, ma junok e burro c'alan yet c'ual xewilal, ¿tom c'am che xuyilok, cax chi toj e yak'on yuc'a'?

¹⁶ A pax jun ix ix ti', yinatil Abraham ix; 18 abilxa michchaj ix yuj Satanás, axca wal tol c'alan ix yuj. ¿Tom man mojok colchajcan el ix yin is yailal yet c'ual xewilal ti' cha na'? ẍi bay.

¹⁷ A yet max yalon axca tu', masanil eb ajc'ul oc yin Cham, max q'uixwi aj eb; palta masanil eb anima xin, caw wal max tzaloj eb yilon juntzan tzet c'ayubtak chi el yunen Cham.

Yabixal an bak' mostaza

¹⁸ Axa yalon c'apax Jesús axca ti': ¿Tzetbil chi yun ch'ib bisil eb anima chi oc yul k'ab Dios che na'? Ok waltek jun abix ti' e yabej.

¹⁹ A chi yun ch'ib bisil eb anima tu', lajan eb axca junok inat mostaza chi yaw junok anima sat is tx'otx'. A jun inat tu', chi ajolok, chi ch'ibi. Lajan chi yun yucay axca te te' mimektak. A no tz'iquin, chi ton je' way no' xol is k'ab an, ẍi Cham.

Yabixal yich pan

²⁰ Max yalon c'apax Jesús junxa ti': Ok waltek junxa abix ti' ayex, tzetbil chi yun ch'ib is bisil eb anima chi oc yul k'ab Dios.

²¹ A jun tu', lajan axca jabok yich pan chi yatok junok ix xol oxebok echbal harina. Echc'al chi pajbitok ixim yuj jab yich pan tu', ẍi Jesús.

Jun yaliẍ puerta

²² A Jesús ac'ala' max beytoj yul beal Jerusalén. Ay juntzan conoblak, c'al juntzan aldealak bay chi ec' cuywajok.

²³ Axa yet junel, ay jun mactxel max k'anlen bay axca ti': —Mamin, ¿jaywannej mi eb ok colchajok? ẍi bay Cham. Max yalon Cham bay:

²⁴ —Ak'ek e yip e yoc bay jun axca yaliẍ puerta, yujtol chi wal ayex, xiwil eb chi yak'lej yoqui, palta maj je' yoc eb.

²⁵ Yujtol a Dios, lajan axca junok aj na chi makchej yatut. Ok lajwok tu', axa ayex chex can lecan ti' na tu', okto e yak'lej e yawji octok axca ti': Mamin, jakon octok etok, quex chito wali. Man ex wojtakok, tamwal bay cajan ex, ẍi eltek, yet ok tak'wok.

²⁶ Palta ilab lownak on etok, cuywinak on yul calle oj, quex chi, ok e yalon bay.

²⁷ Palta ok ex tak'welay yuj axca ti': Mayal wal ayex tol may ex wojtakok, tamwal bay ayex. Elanek e masanil ex che yun yobtakil, ẍi ayex.

²⁸ A bay tu' caw wal ok jichchaj e c'ul e yok'i. Yuj ok e yila' tol ayic' Abraham, Isaac, yetok Jacob c'al masanil eb chekbej Dios ayoc yul k'ab, xan ayex paxok, yina ayex canok.

²⁹ Ay eb ok tit bay junjun lugar, ay eb ok tit bay chi ajol c'u, c'al bay chi tojcan c'u, ay eb ok tit bay norte c'al bay sur, cax ok ay chotan eb low yin meẍa bay ayoc Dios Yajawil.

³⁰ Ay mac c'amxac'al jabok yelapnok co xol tinani'; palta a yet jun tiempoal tu', a eb ti', caw miman yelapnok bay tu'. Ay pax mac caw wal miman yelapnok co xol tinani'; palta a yet jun tiempoal tu', ay pax eb c'amxa jabok yelok apnok bay tu', ẍi Jesús.

Is cusc'ulal Jesús yuj eb aj Jerusalén

³¹ Ac'al oc yet jun c'ual tu' max jayoc juntzan eb fariseo, axa yalon eb bay Jesús axca ti': —Asi', elan bay jun lugar ti', yujtol chi yochej Herodes chach yak' camok, ẍi eb bay.

³² Axa yalon Jesús bay eb axca ti': —A jun winak tu', lajan axca no wax, tok ay yelapnok. Asek cax ok e yalon bay tol a tinani' c'al yecal cabej chi wiil eb espíritu yob yin anima, cax chi wak'on c'apax watx'jok c'ul eb ya'ay. Axa yet chi lajwi tu', chin lajonxac'al in mulnajil ti', ẍi Jesús, quex chi bay.

³³ Palta ayin ti', ok in tokc'al yul in be tinani', c'al yecal cabej, yujtol yowalil asan bay Jerusalén chon ak'lay cam ayon chekbej on Dios ti'.

³⁴ A wal ayex ti' ex aj Jerusalén, che mak' wal cam eb chekbej Dios. Axa juntzanxa eb chekbiltek yuj Dios e xol, che k'okch'ennej eb. Xiwilxa el max wochej max quex wawtejtek ayin, axca junok no caẍlan chi k'uttejtek yune', cax chi mojoni, palta maj yal e c'ul.

³⁵ Abek. A jun e conob ti', ok tz'inayok.*fn* Chi wal ayex, c'amxa bay ok e yil win, masantac'al yet ok e yalon axca ti': Al-layokab watx' k'anej bay Cham chekbiltek yuj Cham Jajawil, quex chi, ẍi Jesús bay eb.