Josué 7 - A Txꞌan Biblia Yin Kꞌanjobal 1989

Is mul Acán

¹ Ay jun winak chi yik Acán titnak yin is tribual Judá, is c'ajol Carmi, yitxiquin Zabdi, yinatil Zara yayji, max yitok janic'ok tzet yetal max al-layi tol chi c'aylay elok. Yuj wal tu xin, masanil eb conob Israel max tzakaytok yuj is mul jun winak tu', cax max tit yowal c'ul Jehová yin conob Israel.

Yayc'aybal eb israel bay Hai

² A yet ayic' cham Josué yetok eb israel bay Jericó, max yaontok jaywan eb winak yet chi toj beytzej eb tzetbil yayji oc conob Hai. A tu' ay bay sataktek Betel bay is cawilal Bet-avén. Cax max toj eb yiloni tzetbil wal yayji jun lugar tu'.

³ Max lajwi tu' max meltzoj eb nak, cax max yalon eb bay cham Josué: C'am chi ajtok masanil eb conob, palta tol c'uxan oxebok mil eb nak chi toji cax chi yak'on owal yetok conob Hai tu', yet watx' man toc'alok chi yetnej eb c'ul masanil, yujtol txennej eb chi taynen conob tu', ẍi eb.

⁴ Yuj tu' xan asan mi oxebok mil eb soldado max toj yin owal yin eb Hai tu'. Palta axa max yun xin, max ayc'ay eb nak soldado israel yuj eb aj Hai tu'.

⁵ Max uktelay eb tac'al bay puertail conob masantac'al bay juntzan lugar bay chi ilay eltek ch'en ch'en chi joslayi. Max mak'lay cam 36 soldado israel yuj eb bay sat witz yalan conob tu', yuj tu' max xiwaj c'ul eb israel; sicxac'al max yuncan el eb.

⁶ Yuj wal tu xin, axa cham Josué yetok eb yajawil conob, max nic'tok eb ti' is pichil yuj somc'ulal, cax max yaon ajtok eb pokok yiban is jolom, max lajwi tu', max ay jajnaj eb bay satak caẍail is trato Jehová, max ayc'ay nan sat eb bay sat tx'otx' masantac'al max ay c'u.

⁷ Max yalon cham Josué: —Ay Mamin Jehová, ¿tzet yuj xan max eic'tek a conob ti' bay k'axepal ec'tek a' Jordán ti'? ¿Tom asan yuj on aon oc yul k'ab eb amorreo, cax chon is c'ayon el eb, xan axca tu' max otej? Yelxac'al mi watx', ta max on cancan bay k'axepal ec'tok a' Jordán.

⁸ Ay Mamin, ¿tzetto wal ok wala'? A tinani' mayal ayc'ay a conob, ilab tol mayal el eb bay eb ajc'ul.

⁹ Masanil eb cananeo, c'al masanil eb conoblak cajan bay juntzan lugar ti', ok yab eb tzetbil max yun yayc'ay a conob ti', axa wajban ba eb tu', axa tit eb jin tu', cax c'amxa bay ok on binaj canok. Ta axca tu' chi yunej, ¿tzetto wal ok yun a binaji? ẍi cham.

¹⁰ Max tak'wi Jehová: —Ajan wanok, ¿tzet chon bay tu'?

¹¹ A eb e yet israelal max oc is mul, yujtol maj yikej eb tzet max wal ayex. Max yelk'anejtek eb tzet yetal tol max wala' tol chi c'ayil masanil. Max elk'an eb, max yiontok eb yin ewantakil, cax max c'uban el eb bay cajan ec'ok.

¹² Yuj wal tu' xan c'amxa chi je' e tec'ban e ba bay eb e yajc'ul tu', palta asan tol chex eli. Yuj tu' xan a tinani' moj wal tol ok ex c'aylay elok. Tatol man ok e c'ayil masanil tzet yetal max wala' tol chi c'ayilok, wal yel manxa ok in oc e yetok.

¹³ A tinani' xin, ajan wanok, cax cha sakbanej masanil conob ti'. Al bay eb tol chi watx'nej ba eb, yujtol a yet yecal yet puch k'inibalil, chi jayoc eb masanil in satak. Ayin Jehová e Diosal in chi wala': E xol ayex israel ex ti', ay tzet yetal max wala' tol chi c'aylay elok, xan tatol ok e c'ubajc'al ec'ok, wal yel majxa je' e tec'ban e ba bay satak eb ajc'ul tu'.

¹⁴ A yet k'inibalil yecal, yin junjun tribual chi yun e jayoc in satak. A jun tribual chin tx'ox ocok, a xol jun tu' chi oc in satak yin junjun makan is yinatil, axa junok makan yinatil chin tx'ox oc tu', chi jayoc in satak yin junjun familiail, axa jun familia chin tx'ox oc tu', chi jayoc masanil eb winak ay xol yin junjunal in satak.

¹⁵ A mac chi ilchaj elok tol ay tzet yetal bay, tol max wala' tol chi c'aylay elok, a jun tu' chi ak'lay tz'aok yetokc'al yetbi, c'al yuninal, c'al yetok masanil tzet yetal ay bay, yujtol max yun tzet yetal tol man is mojok; maj yikej in trato, ẍi Jehová.

Is camichal Acán

¹⁶ Axa yet junxa c'ual xin, max pet aj wan cham Josué, max yalon cham tol chi wajbajtek ba eb anima yin junjun tribual, yin aymanil max tx'ox oc Jehová tribual Judá.

¹⁷ Max yalon cham Josué tol chi eltek eb yajawil junjun makan yinatil jun tribu tu', max tx'oxon eltek Jehová eb yinatil Zara, cax max tx'oxon eltek is familia Zabdi.

¹⁸ Yin junjunal max yun jitzontek ba eb familia Zabdi, max tx'oxon eltek Jehová Acán c'ajol Carmi, yitxiquin Zabdi yet is yinatil Zara, yin is tribual Judá.

¹⁹ Max lajwi tu' max yalon cham Josué bay Acán: —Ach wet conob, satak Jehová co Diosal, jichanc'al chi yun alon tzet yobtakil max onej, c'amc'al cha c'ubaj elok, ẍi cham bay.

²⁰ Max tak'wi Acán: —Wal yel, max oc in mul satak Jehová co Diosal. Ay ton tzet yetal max welk'anej.

²¹ A xol masanil tzet yetal ay bay Jericó, max witek jun k'ap titnak bay Babilonia caw wal watx' yili, yetok c'apax 200 siclos ch'en plata, yetok jun bijan naba oro 50 siclos yalil. Caw wal max wiloc in c'ulok yin, xan max witek wetok. A tu' mukan wuj bay nan yul in mantiado. A yalan jun k'ap tu', a tu' ayaytok ch'en oro, c'al ch'en palta tu' wuj, ẍi Acán.

²² Max lajwi tu xin, max yaontok cham Josué juntzan eb nak winak yilon bay yul mantiado Acán tu', max toj eb yin aymanil yin yion ajtek eb nak tzet yetal tu'. A bay yalan tu', a tu' ayaytok ch'en oro c'al ch'en plata tu'.

²³ Max yiontek eb juntzan tzet yetal tu' bay cham Josué bay satak masanil eb israel. Lajwi tu' max alay oc satak Jehová.

²⁴ Yet wal jun bek tu' max ilaytok Acán bay jun ac'al chi yik Acor, yetok masanil tzet yetal max c'ubaj el tu', yetokc'al is c'ajol, is cutz'in, is wacax, is burro, is calnel, yetok is mantiado, c'al yetok masanil tzetak yetal ay bay.

²⁵ Max yalon cham Josué axca ti': —¿Tzet yuj xan max etek jun yailal tu' jiban? A tinani' xin, yaokab cantok Jehová yailal eban, ẍi cham. Max lajwi yalon cham axca tu', cax max yion aj masanil eb israel ch'en ch'en, cax max k'okon cam eb Acán tu' yetokc'al is yuninal, max yak'on tz'a eb.

²⁶ Max lajwi tu', max tojcan bulan ch'en yiban Acán tu' yuj eb; bulantoc'al aj ch'en tinani', xan a tinani' ac'al Acor*fn* chi yik jun lugar tu'. Caytu' max yun sicbi yowal c'ul Jehová yiban conob Israel.