Josué 3 - A Txꞌan Biblia Yin Kꞌanjobal 1989

Max k'axpoj conob Israel yul a' Jordán

¹ Axa yet junxa c'ual yet puch k'inibalil, max oc beyil yuj cham Josué yetok conob Israel, max el eb bay Sitim, max apni oc eb bay is ti a' Jordán tu'; majto ec'tok eb, maxto cancan eb bay ti a' tu'.

² Axa yet cabjial max ec' eb yajawil conob bay masanil campamento,

³ max yalon eb bay masanil eb israel: A wal yet ok e yilon yec'tok te' is caẍail is trato Jehová co Diosal, yuj eb sacerdote, eb yinatil Leví, bay yul a' Jordán, cax chex tzakloj yintak.

⁴ Axca tu' ok yun e yojtaknen elok, baytal ok ca e toji, yujtol c'amto junok ex e yojtak jun be tu', asan xin, c'am chex ocxac'al tzakan yintak, najat tzunanc'al che yut e ba, axca mi junok kilómetro chex can yintak, ẍi eb.

⁵ Max yalon cham Josué bay eb conob: A tinani', sakbanejek e ba yujtol a yet yecal ok e yil yak'on Jehová milagro co xol, ẍi cham.

⁶ Max yalon c'apax cham bay eb sacerdote: Iek aj te caẍail trato, cax che yion ec'tok te' bay yul a' bay satak masanil eb anima ti', ẍi cham. Cax max yion aj eb te caẍail trato tu', cax max babji eb satak masanil anima.

⁷ Max lajwi tu xin, max yalon Jehová bay cham Josué: A tinani' ok in chael yich wion aj can ekbej bay satak eb conob ti', yet watx' chi yil eb tol ayinc'al oc etok, axca max wun yetok Moisés.

⁸ Cax chalon bay eb sacerdote chi iontok te caẍail trato ti': A yet ok ex apnok oc bay a' Jordán tu', ok ex oc lecan bay yul a' tu', cachi bay eb, ẍi Jehová.

⁹ Axa yalon cham Josué bay conob Israel tu' axca ti': Jitzektek e ba, cax ok e yaben tzet ok yal Jehová co Diosal.

¹⁰ A yuj tzet ok e yil tinani', a yin tu' ok nachaj el e yuj, tol ayic' Cham Dios iquis co xol. A Jehová ok ion el eb amorreo, eb heteo, eb heveo, eb ferezeo, eb gergeseo, eb cananeo, yetokc'al eb jebuseo co satak.

¹¹ Axa tinani xin, a te caẍail trato Cham Yajawil masanil tx'otx' tx'otx' ok babjok yaytok yul a' Jordán co satak.

¹² Yuj tu' che siq'uil lajcawanok eb yajawil conob ok oc yopiso, junjunc'al yet junjun tribu.

¹³ A yet ok yaon aytok eb sacerdote yakan bay yul a' tu', a ton eb inej oc te caẍail trato Jehová, Cham Yajawil masanil tx'otx' tx'otx', cax ok pojon ba a', a a' chi ayol bay yiban, ok oc wanajok, cax axca najab ok yutcan ba a', ẍi cham.

¹⁴ Lajwi tu xin, max yion aj eb is tzetak yetal, axa k'axpoj eb bay yul a' Jordán tu', cax babel eb sacerdote inej oc te caẍail trato.

¹⁵ Elnak wal yak'on a' yowal yet tu', caw wal chi pulil a' bay yul is be, a ton yet tu' tiempoal wal jolay ixim trigo. Asannejc'al yet max yaon aytok eb sacerdote tu' yakan bay yul a', ayman max oc wanaj bey a' yayolok, najatac'al max wajbajcan oc ba a' bay yetc'ulal conob Adam bay is cawilal fortaleza Saretán.

¹⁶ Axa pax a' bay yalan tu xin, max tojc'al a' masantac'al max lajwitok a' yul a' Mar Muerto, axca ton tu' max yut pojon ba a' Jordán tu', cax max ec'tok eb conob Israel yin takinal bay yul a' tu', bay satak conob Jericó.

¹⁷ Axa eb sacerdote inen oc te caẍail trato Jehová, max cancan waan eb bay nan yul beal a' aej tu', takin tx'otx' bay waancan oc eb, cax max ec'tok masanil conob Israel.