Josué 24 - A Txꞌan Biblia Yin Kꞌanjobal 1989

Max k'anjabcan cham Josué

¹ Max wajbaj oc cham Josué masanil is tribual eb yet israelal bay Siquem, max yawtejtek eb yicham winakil conob, a ton eb juez, yetokc'al eb yajaw yayji, cax max oc eb satak Jehová.

² Cax max oc ijan cham yalon bay eb conob: —Axca ti' yalon Jehová co Diosal: A yet payxa, a tu' cajan Taré yetok cawan is c'ajol a ton Abraham c'al Nacor, bay sataktok ti a' miman aej Éufrates, max yak'on serbil eb comon dios,

³ max wiontek Abraham, max c'oli yec'jab bay yul yet tx'otx' Canaán. Max wak'on jun is c'ajol, a ton Isaac; max wion aj can bisil yinatil.

⁴ Max wak'on cawan is c'ajol Isaac tu', a ton Jacob yetok Esaú. Cax max wak'on tx'otx' Seir, siquilal tx'otx' bay Esaú tu'. Axa pax Jacob yetok yuninal max apnican oc bay Egipto.

⁵ Max lajwi tu' axa waontok Moisés, yetok Aarón bay Egipto tu', cax max waontek uchlejbail yiban eb aj Egipto tu', masantac'al max apni oc tiempoal yet max wion eltek eb e yichmam bay tu'.

⁶ A yet max el eb e yichmam bay Egipto tu', max tzakloj eb aj Egipto tu' yintak eb, yetok carruaje, yetok chej bay a' Cakyin Mar.

⁷ Max quin yawten eb e yichmam tu' yetok; yuj wal tu' xan max waoc jun k'ekk'inal nan xol eb e yichmam tu' yetok eb aj Egipto tu'. Axa in chekon junanen ba a' mar tu' junelxa yiban eb, max mukaycantok eb yuj a'. Ayex ti', e yabnakxa tzet max wut eb egipcio tu'. Lajwi tu' najatil max ec' eb e yichmam tu' bay takin tx'otx',

⁸ masantac'al max ex witek yetok eb bay is tx'otx'al eb amorreo ti' bay yichcanil a' Jordán. Max yak' eb owal e yetok, palta ayin max waoc eb yul e k'ab. Max ayc'ay eb e yuj, axa yoccan tx'otx' eb tu' e yetok tu'.

⁹ Max lajwi tu', axa pax Balac c'ajol Sipor, reyal eb moabita, max tit pax yak'on owal e yin. A Balac tu', max yatok is yiomal Balaam, is c'ajol Beor yuj ex catabnen yaloni.

¹⁰ Palta ayin maj ex in cha' catabnelay yuj, yuj tu xin, watx' k'anej max yalc'al el e yin. Axca wal tu' max yun ex in coloncan elok.

¹¹ Max lajwi tu' axa e yec'tok bay yul a' Jordán tu', max ex apni oc bay Jericó. A eb ay bay Jericó tu', c'al eb amorreo, eb ferezeo, eb cananeo, eb heteo, eb gergeseo, eb heveo yetokc'al eb jebuseo, max yak' eb owal e yetok, ayinxa max wak' e yipalil, max ayc'ay eb e yuj.

¹² Max ayc'ay cawan reyal eb amorreo, palta man yujok e yespada c'al e julbal, palta ayin max watok jun miman xiwc'ulalil yiban eb, xan max el eb ayex.

¹³ Ayin max wak' e tx'otx' bay chex ayji, mayexnak max e yaw awojal sat tx'otx' ti'. Max wak'on e yatut bay chex cajayi, palta mayexnak max e watx'nej ajok. A tinani', watx'xa e yayji, che lo' an uva, c'al aceituna, palta mayexnak max e yawa', ẍi Jehová.

¹⁴ —Yuj masanil juntzan ti', xan ayokab yelapnok Jehová yul e sat, cax yetok masanil e c'ul che yiken bay Cham. Iek el comon dios e xol, axca juntzan bay max yiay ba eb jichmam bay sataktok a' Éufrates, c'al bay Egipto, tol asan bay Jehová chex oc yin ayilal.

¹⁵ Palta ta c'am chi yal e c'ul che yak' serbil Jehová xin, siq'uek mac che yak' serbil, ta a juntzan dios max yak' serbil eb jichmam bay sataktok a' miman aej Éufrates, ma a is diosal eb amorreo cayti', axa pax ayin ti xin, a Jehová ok wak' serbil yetok masanil eb cajan wetok yul watut, ẍi cham Josué.

¹⁶ Max tak'wi eb conob axca ti': —C'amokab chi co bekcan Jehová co Diosal, cax ok jak'on serbil junokxa comon dios.

¹⁷ Yujtol a Cham max on ion eltek bay Egipto, bay ayoc eb jichmam yin mosejal. A max tx'ox ba ayon yin c'ayubtakxac'al yoqui. A max on tayneni, cax max on coloni, yet max on tit yulak be, c'al yet max on ec'tek bay xolak juntzan conoblak.

¹⁸ A Jehová max ion el masanil juntzan conoblak bay co satak, ma wal eb amorreo cajan ec' cayti' yet max on jayi. A yuj masanil juntzan tzet yetal max yun Cham, xan ok jak'c'al serbil Cham, yujtol co Diosal Cham, ẍi eb conob tu'.

¹⁹ Max yalon cham Josué axca ti': —Maj je' e yak'on serbil Jehová, yujtol a Cham c'am chi techaj yuj yet toc'al chi yiloc yobtakilal, yujtol caw wal chi tit yowal c'ul, tatol chon oc yin ayilal bay comon dios, caw wal c'am chi yak' mimanc'ulal yin co mul axca tu'.

²⁰ Ta che yiel e ba yintak Cham, cax che yak'on serbil juntzan tx'ok diosal, ok meltzoj Cham yetok yowal c'ul e yin, cax ok ex c'aylay el yuj, caxc'al xiwil tzet yetal watx' max yun e yin, ẍi cham Josué.

²¹ Max tak'wi masanil conob axca ti': —C'am chi jak' serbil juntzan tu', asan Jehová ok jak' serbil, ẍi eb.

²² Yuj tu' xan max yal cham Josué axca ti': —Ayexc'al oc che yaoc e ba testigoal e yin, tol a Jehová ok e yak' serbil, cax ac'al bay ok ex oc ayilal, ẍi cham. —Caw wal yel, ayon ton chi jala', ẍi eb conob tu'.

²³ Yuj tu' xan max yal cham Josué: —Ta axca tu', iek el masanil comon dios e xol, cax ocanek e yak'on serbil Jehová co Diosal, ẍi cham.

²⁴ Max tak'wi pax masanil eb conob axca ti': —Ayon ti', yetok wal masanil co c'ul cax chi jaloni, tol a Jehová co Diosal ok jak' serbil, ok jikej bay masanil tzet chi yala', ẍi eb.

²⁵ A yet jun c'ual tu' max watx'nej cham Josué jun trato yetok eb yet conob Israel bay Siquem, max yak'on cham Josué chekbanilej, c'al ley bay eb.

²⁶ Max tz'ibencan cham yul yunal ley yet Jehová. Max lajwi tu' max yak'on cham bal-laytek jun ch'en miman ch'en, max yaoncan octok cham ch'en bay yich jun te matx'ji bay yamak'il cajlobal Jehová.

²⁷ Max yalon cham bay masanil eb conob: —A ton jun ch'en ti' chi ak'on testigoal yin tzet max yal Jehová ayon. A ch'en chi ak'on testigoal, ta man ok e yikej tzet che yal bay co Diosal ti', ẍi cham.

²⁸ Lajwi tu xin, max chekontok cham junjun tribual eb yet israelal tu' bay is tx'otx' chabilxa yuj.

Is camichal cham Josué

²⁹ Max lajwi tu xin, max cam cham Josué is chekbej Jehová. 110 abil is k'inal cham Josué c'ajol Nun yet max cami.

³⁰ A tu' max muklay cham bay is tx'otx' bay Timnat-sera, bay siquilal tx'otx' yul yet Efraín bay satak ajtok witzal Gaas.

³¹ Manxa watx'ilok max yun yiken eb conob israel is ley Jehová yak'ban iquisto cham Josué, maxtoc'al yikej eb, yak'ban ayto ec' eb yicham winakil conob, eb max ilon masanil tzet max yun Jehová yetok eb.

Mukbanil is mimanil cham José

³² Max muklay c'apax is mimanil cham José max yitek eb israel bay Egipto. A tu' max muklay bay Siquem, bay tx'otx' manbil yuj cham Jacob yin cien bijan plata bay eb is c'ajol Hamor, is mam Siquem. A jun lugar tu' max occan yetok eb is yinatil cham José.

Camichal cham Eleazar

³³ Max cam c'apax cham Eleazar, is c'ajol cham Aarón. A tu' max mukay cham bay jun tzalan bay sat is tx'otx' Finees is c'ajol, a ton tx'otx' max ak'lay is satakok bay siquilal tx'otx' yul yet Efraín.