Josué 13 - A Txꞌan Biblia Yin Kꞌanjobal 1989

Juntzanxa tx'otx' tolto ok ayc'ayok

¹ A yet caw wal icham winakxa cham Josué, max yalon Jehová bay: Ach ti' ayxa a k'inal, palta tec'anto pax e yion ec' tx'otx' tx'otx' bay eb anima ti'.

² C'amtoc'al che yi' tx'otx' yet eb filisteo, yetokc'al tx'otx' yet eb gesureo,

³ a ton tx'otx' chi tojtac'al bay a' aej Sihor, bay yetc'ulal yichcan bay Egipto, masantac'al chi apni oc bay mojonal yet Ecrón bay norte, a ton juntzan tu' is tx'otx' eb cananeo. A bay jun makan tu' ay owan yajawil eb filisteo, a ton eb yajaw yayji bay Gaza, bay Asdod, bay Ascalón, bay Gat, c'al bay Ecrón. Chi can c'apax is makbej eb aveo

⁴ bay sur, yetok masanil is tx'otx' eb cananeo. Chi tojtac'al bay Mehara yul yet Sidón, masantac'al chi apni oc bay Afec, bay is mojonal yetok yet eb amorreo.

⁵ Chitoc'al can pax tx'otx' yet eb giblita, yetok masanil tx'otx' Líbano bay yetc'ulal bay chi ajol c'u, chi tojtac'al bay Baal-gad, bay yich witz Hermón, masantac'al bay chi ocapnok bay Hamat.

⁶ Ok wiel masanil juntzan eb ti' e satak: a ton eb sidonio, yetok masanil eb cajan bay siquilal tx'otx', chi tojtac'al bay Líbano, masantac'al bay Misrefot-maim. Ach ok a pojcan ec' tx'otx', c'al ak'on is satakok eb et israelal, axca wal max yun walon ayach.

⁷ Ok a pojcan ec' masanil juntzan tx'otx' ti' bay baloneb tribual, c'al bay nanxa tribual Manasés, ẍi Jehová bay Josué.

Tx'otx' yet Manasés, Rubén c'al Gad

⁸ A eb tribual Rubén, yetok yet Gad, yetokc'al nanxa yet Manasés, max chacan eb is satak yet max yak'oncan cham Moisés, is chekbej Jehová is tx'otx' eb bay yetc'ulal yichcan bay a' Jordán.

⁹ Max yi' eb tx'otx' chi tojtac'al bay conob Aroer, bay is ti a' aej chi yik Arnón, yetokc'al jun conob ay bay nan yul jobeal Arnón tu', yetokc'al masanil pananil yet Medeba, masantac'al bay Dibón.

¹⁰ Max oc tz'akilok masanil conob makbil yuj Sehón is reyal eb amorreo bay Hesbón yet yalantok, masantac'al chi apni oc bay is mojonal yet eb amonita.

¹¹ Max yion eb tx'otx' Galaad, tx'otx' yet eb gesureo, yetokc'al yet eb maacateo, yetokc'al masanil witz Hermón, yetok masanil tx'otx' yet Basán, chi tac'al apni oc bay Salca.

¹² Max yion c'apax eb masanil is makbej Og, is reyal Basán, cham max yajawbi bay Astarot, c'al bay Edrei, a ton cham is lajubal eb refaíta. A eb ti' max yak' lajwok cham Moisés, c'al yuktelaycan el eb bay is lugar.

¹³ A pax eb aj Gesur, c'al eb aj Maaca maj uktelay el eb bay tu', palta tol chi ayjic'al ec' eb xol conob israel masantac'al tinani'.

¹⁴ A pax bay eb tribual Leví xin, maj yak'can cham Moisés is satak eb, yujtol yet eb yayji masanil xajanbal chi ak'lay tz'a bay Jehová is Diosal israel, atac'ala' max yun yalon Cham.

¹⁵ Max pojon ec' cham Moisés tx'otx' xol eb is tribual Rubén, atac'ala' jayeb makanil yayji eb.

¹⁶ Yuj tu xin, xan chi tojtac'al is tx'otx' eb tu' bay conob Aroer bay is ti a' Arnón, yetokc'al jun conob ay nan yul jobeal Arnón tu', yetokc'al masanil pananil yet Medeba,

¹⁷ masantac'al chi apni oc bay Hesbón yetokc'al masanil conoblak ay bay panan tu': a ton Dibón, Bamot-baal, Bet-baal-meón,

¹⁸ Jahasa, Cademot, Mefaat,

¹⁹ Quiriataim, Sibma, Saret-sahar. A jun tu', a tu' ay bay tzalanil yul jun jobe tu',

²⁰ yetok Bet-peor, c'al Bet-jesimot, yetokc'al masanil is k'eanil jolom witz Pisga,

²¹ a ton conoblak ay bay panan, yetok masanil is makbej Sehón, a ton reyal eb amorreo bay Hesbón. Maxax ayc'aycan Sehón tu' yuj cham Moisés, yetok eb yajaw yayji bay Madián, a ton eb ayoc yalan yikbej Sehón: A ton Evi, Requem, Zur, Hur, c'al Reba.

²² Max mak'lay cam c'apax cham naom el k'anej, a ton cham Balaam, is c'ajol Beor; xiwiltoc'al juntzanxa max cam yetok.

²³ A is tx'otx' eb tribual Rubén, atac'ala' jayeb makanil yayji eb, chi occ'al juntzan conoblak tu', c'al juntzan aldealak is tz'akilok, cax chi apnitac'al oc bay a' Jordán.

²⁴ Yetok c'apax bay eb is tribual Gad, max pojlaycan ec' is tx'otx' eb yuj cham Moisés, atac'ala' jayeb makanil yayji eb.

²⁵ Max yion eb conob Jaser yetok masanil conoblak Galaad, yetok nan tx'otx' yet eb amonita, masantac'al bay Aroer, a tu' ay sataktek Rabá.

²⁶ A ton jun makan lugar ay bay nan xol Hesbón, yetok Ramat-mizpa, c'al Betonim, ay bay nan xol Mahanaim, c'al bay mojonail yet Debir.

²⁷ A bay jobe max yi' c'apax eb Bet-aram, c'al Bet-nimra, c'al Sucot, yetok Safón, asanxanej juntzan tu' max cancan yul makbej Sehón is reyal Hesbón. Caytu' max yun beyc'al toj is tx'otx' eb bay yichcanil a' Jordán, max apnitac'al bay sur yul yet a' najab Cineret.

²⁸ A ton masanil juntzan conoblak tu' yetok yaldeail max yi' eb is tribual Gad atac'ala' jayeb makanil yayji.

²⁹ Yetok c'apaxok, max ak'laycan tx'otx' bay nanxa eb is tribual Manasés yuj cham Moisés, atac'ala' jayeb makanil yayji oc eb, caytu' max yun pojlay ec'ok.

³⁰ A eb max ion masanil is tx'otx' cham Og, is reyal Basán yet yalantok, a ton masanil tx'otx' Basán chi tojtac'al bay Mahanaim, yetok 60 conob ay yul is makbej Jair.

³¹ Max yi c'apax eb nan tx'otx' Galaad, yetok conob Astarot, c'al Edrei is conobben cham Og. A masanil juntzan tu' max yi' nan eb yinatil Maquir, is c'ajol Manasés, atac'ala' jayeb makanil yayji oc eb.

³² A ton juntzan tx'otx' ti' max yak'can cham Moisés sataknej eb yet ayic' eb bay yac'alil Moab, bay yichcanil a' Jordán, bay satak Jericó.

³³ A pax eb tribual Leví xin, c'amc'al tx'otx' max ak'lay sataknej eb, palta tol max al-lay bay eb, tol a Jehová Diosal Israel ayoc is satakok eb.