Josué 12 - A Txꞌan Biblia Yin Kꞌanjobal 1989

Eb rey max ayc'ay yuj cham Moisés

¹ Ay cawan rey max ayc'ay yuj eb israel bay yetc'ulal bay chi ajol c'u bay a' Jordán. A masanil tx'otx' max yican eb, chi tojtac'al tx'otx' bay a' aej chi yik Arnón, masantac'al chi apni oc bay jolom witz Hermón, yetok masanil yichcanil jobe bay a' Jordán.

² Max ayc'ay Sehón reyal eb amorreo, cajan ec' bay Hesbón. A is makbej chi tojtac'al bay Aroer, bay is ti a' Arnón, chi chailtac'al bay nan yul jobe masantac'al bay a' aej chi yik Jaboc, a ton bay chi chail yich is tx'otx' eb amonita, (chi yal elapnok a ton nanok tx'otx' Galaad.)

³ Cax max yion c'apax nanok jobeal yet a' Jordán chi chail yich bay a' najab Cineret cax chi apnitac'al bay a' Mar Muerto, bay yetc'ulal yet Bet-jesimot, axa bay yetc'ulal sur masantac'al bay yich witz Pisga.

⁴ Max ayc'ay c'apax Og reyal Basán, a ton jun lajubalxac'al xol eb refaíta, a tu' max ec'lej cajan bay Astarot c'al bay Edrei.

⁵ A is makbej max apnitac'al oc bay jolom witz Hermón, max apni c'apax bay Salca, masanil bay yul makbej Basán, masantac'al bay mojonal yet Gesur c'al yet Maaca, masantac'al bay nanxa yet Galaad, bay yettac'a Sehón, a ton reyal Hesbón.

⁶ Max ayc'ay juntzan rey tu' yuj is chekbej Jehová, a ton cham Moisés, yetok eb israel. Max ak'lay juntzan tx'otx' tu' bay eb yinatil Rubén, c'al bay eb yet Gad, c'al bay nanxa eb yinatil Manasés.

Listail eb rey max ayc'ay yuj cham Josué

⁷ A ton masanil juntzan rey max ayc'ay yuj cham Josué, yetok eb israel ti', bay yetc'ulal yayubc'u bay a' Jordán. Chi tit bay Baal-gad bay jobeal Líbano, masantac'al bay yich witz Halac, chi ajapnok cawilal Seir. Lajwi tu xin, max pojon ec' cham Josué masanil juntzan tx'otx' tu' xol is tribual eb israel, xan max ak'layxac'al sataknej eb yin junelnej.

⁸ Masanil tx'otx' siquilal tx'otx', c'al tx'otx' ac'al-lak, c'al tx'otx' jobeal a' Jordán, c'al tx'otx' k'ean, yetokc'al tx'otx' tz'inan tx'otx'lak, yetokc'al Néguev, a masanil juntzan tx'otx' tu' yet eb heteo, eb amorreo, eb cananeo, eb ferezeo, eb heveo c'al eb jebuseo.

⁹ Tixtak eb rey max ayc'ay ti': A ton reyal Jericó, reyal Hai, jun conob cawilal Betel,

¹⁰ reyal Jerusalén, reyal Hebrón,

¹¹ reyal Jarmut, reyal Laquis,

¹² reyal Eglón, reyal Gezer,

¹³ reyal Debir, reyal Geder,

¹⁴ reyal Horma, reyal Arad,

¹⁵ reyal Libna, reyal Adulam,

¹⁶ reyal Maceda, reyal Betel,

¹⁷ reyal Tapúa, reyal Hefer,

¹⁸ reyal Afec, reyal Sarón,

¹⁹ reyal Madón, reyal Hazor,

²⁰ reyal Simrom-merón, reyal Acsaf,

²¹ reyal Taanac, reyal Meguido,

²² reyal Cedes, reyal Jocneam yul yet Carmelo,

²³ reyal Dor, bay witzlak yul yet Dor tu', reyal Goim bay yul yet Gilgal,

²⁴ yetok reyal Tirsa, cax 31 eb rey tu' yin masanil.