Job 42 - A Txꞌan Biblia Yin Kꞌanjobal 1989

¹ Lajwi tu' max yalon cham Job bay Jehová axca ti':

² Wojtak tol masanil chi je' oj, chi yun oj tzanc'al tzet chi yochej a c'ul.

³ Ach max al ayin: ¿Mac ach txel xan tol cha c'ubaj el in jelanil yetok a k'anej c'am yelapnok? cachi. Ayin ti' a tzet yetal c'ayubtak tol c'am chi nachaj el wuj, a' max wala'.

⁴ Ach max al ayin: Ab tzet ok wala', chi wochej ok in k'anlej ayach, tak'wan ayin, paktzej juntzan in k'anlebal ti', cachi.

⁵ A yet yalantok asan a k'umal max wabej, palta a tinani' chach wil wal ocok.

⁶ Yuj tu' chi nachaj el wuj tol c'am welapnok, chin ayxac'al chotan xol pokok c'al xol tik'ak'il tan ti' yuj naon ba in c'ul, ẍi cham Job.

Is watx'c'ulalil Dios bay cham Job

⁷ Max lajwi k'anjab Jehová bay cham Job, max yalon c'apax bay cham Elifaz aj Temán axca ti': Caw wal aytek wowal en ach ti' yetokc'al yin cawanxa eb ajun etok tu', yujtol man watx'ok tzet max e yal win, axca wal max yal in chekbej Job.

⁸ A tinani', iektok ukc'onok no wacax c'al ukc'onok no icham calnel, cax chex toj e yilon in chekbej Job. A juntzan no' tu' che yak' tz'a yin xajanbalil e yuj ayex ti'. Axa in chekbej Job tu' ok txajlok e yuj. Axca tu' xin ok in cha' is txaj tu', cax c'amxa tzet ok ex wutej, caxc'al tol e moj wal e chaon junok yailal, yujtol man yelok max yun e k'anjab win, axca wal max yun in chekbej Job, ẍi Jehová.

⁹ Catatu' max toj cham Elifaz, cham Bildad c'al cham Zofar, axca wal max yun cheklay eb yuj Jehová; caytu' max yun chaon Cham is txaj cham Job tu'.

¹⁰ A yet max lajwi txajli cham Job yuj eb yamigo tu', catatu' max yak'on pax meltzoj Jehová yaxilal bay axca yet yalantok, toltax ca makanxa max yun yak'on bay.

¹¹ Axca tu xin max toj il-lay cham Job yuj eb yuẍtak c'al yuj eb yanab, c'al yuj eb yamigo, yetokc'al masanil eb anima ojtaknej yet yalantok. Masanil eb tu' max watx'nej eb jun miman loj bay yatut. Max mimanc'ulnen eb, c'al yalon eb tol max cus c'apax c'ul eb yuj yailal max eq'uel yiban yuj Jehová. Junjunc'al eb tu' max yak' eb tumin c'al junjun colk'abej tol oro.

¹² Max yak' wal Dios mimek yaxilal bay cham Job yin tzunanil ti' yintak yet yalantok. Max ajapnok bisil is calnel yin 14,000; 6,000 max yun no camello, 1,000 mojan no buey c'al 1,000 no burro.

¹³ Maxto jay ukwan is c'ajol yetok oxwan is cutz'in.

¹⁴ A ix babel, max yak' cham yik ix Jemima, axa ix yet is cab, max yik ix Cesia, axa ix yet is yox, max yik ix Keren-hapuc.*fn*

¹⁵ C'amxa junokxa ix caw wal watx' yili bay yulyibank'inal ti' axca yili eb ix cutz'in cham Job. Max yi' eb ix satak yuj is mam tu' axca eb nak nuej eb ix tu'.

¹⁶ Max lajwi jun tiempoal tu', maxto ec' cham Job yin 140 abil. Watx'toc'al max yun yilon yuninal eb yitxiquin eb is c'ajol.

¹⁷ Yinxac'al ichamil max yun cami.