Job 30 - A Txꞌan Biblia Yin Kꞌanjobal 1989

¹ Axa tinani' a eb ach'ejto wintak, chi tzewi eb win, majc'alta' in cha' yayji ec' is mam eb tu' yetok no' in tx'i' chi taynen in calnel.

² ¿Tzet wal yopiso is yip eb wuj, a eb tu' toxa chi lajwi yip eb?

³ Yuj wajil c'al yuj majilal max ec' eb bay tz'inan tx'otx' yet ak'balil; a bay tu' max jot ajtek eb takin xelak te';

⁴ max wajon aj eb c'a' itaj bay xolak te', toltax max jotajtek eb xe' te q'uisbal lo'.

⁵ A ton juntzan anima tu' intaknebil el eb yuj eb yet conob; chi el yaw eb chi yukten eb tu' axca chi yun yuktelay eb elk'om.

⁶ A yulak nach'en max ayji ec' eb, bay satlak jotx c'al bay satlak ch'en.

⁷ Max awji eb xolak ac'un, a tu' max wajbaj ba eb bay yalanlak yenel te q'uisbal.

⁸ C'am yelapnok eb, toc'alta' c'am yelapnok is mam eb, uktebilxac'alta' el eb xol conob.

⁹ Axa tinani' a yuninal eb chi buchwaj win c'al quin yejmach'nen eb.

¹⁰ Chin yajlay yuj eb, xan chi el eb in c'atan, toltax chi tzubli oc eb yin in sat.

¹¹ Palta a tinani', yak'ban tol max yiel Dios wikbej, axa yailal max yaoc wiban, c'amxa welapnok yul sat eb.

¹² A bay in tz'eyil ti', toxac'al chi jayoc bulan eb anima c'am yelapnok, chin yak' ayc'ay eb cax chi oc eb yak'on owal win, chi yochejxac'al eb chin yak' camok.

¹³ Chi makchej el eb in be yet chin yak' ayc'ay eb yaloni c'amxa mac chi tenon oc wanaj eb.

¹⁴ Axca tol jakan junok muralla bay chi octek lemnaj eb win, ma axca junok cak'ek' yax nab.

¹⁵ Caywal tu' max yun yayc'ay xiwc'ulal wiban; a in mimanbilal max toj elaj axca toj cak'ek'. A tzetak yetal ay ayin max c'aycan aj axca asun.

¹⁶ A tinani' lanan in cami, c'amxa chi oc wanaj jun in yailal ti'.

¹⁷ A wal yailal tu' max octac'al apnok yulak in bakil; c'am chi oc wanaj waben yailal yet chi ec' ak'bal.

¹⁸ Yuj yipalil Dios xan caw wal yobxac'al yoc in pichil win. Caw wal cawxac'al chi yun yoc lacan Cham win, axca tol sut'an oc nuk' in camiẍ win.

¹⁹ Max in k'oklay wal ay yuj bay xol tz'otz'ew; lajan inxac'al yul sat axca pokok ma tik'ak'il tan.

²⁰ Chin k'an a colwal ach in Diosal, palta c'am chach tak'wi ayin, chinto wal tewi ayach palta c'amxa cha cha abej.

²¹ Yobxac'al a c'ul win tinani', chach tzakloj wal wintak yetok a mayk'ak'al.

²² Axcaxac'al a cak'ek' chin xuon bey oj, cak'ek' nab wal chin tzicobtanen oj.

²³ Wojtakxa tol lananxa quin eontok bay camich; a ton bay t'inanc'alta' ok apnok masanil anima.

²⁴ Tokwal c'am chi jatok co k'ab yuj co colon co ba yet chon ayc'ayi, tok c'am chi el jaw co k'anon colwal yet ayon oc yin ay is mayil.

²⁵ Tokwal maj in ok' yuj eb chi yab yail; max cus in c'ul yuj eb ay is cawxinakil.

²⁶ Yuj tu' a tzalojc'ulal max wechbanej, axa max yun xin, max jayoc jun cusc'ulal ti' win. Max wechbanej sakk'inal, axa k'ekk'inal max jayoc win.

²⁷ Toxac'al chi t'ukxi aj in c'ul, c'am in xewilal; asanxanej yailal chin echbaneni.

²⁸ Max jaywal oc jun c'ual cusc'ulal win, c'amxa chi wil sakk'inalil yakan c'u; satak wal masanil anima max in aj wan yin in k'anon colwal.

²⁹ Cusiltakxac'al yel waw axca no ok ma no tonton.

³⁰ A in tz'umal ti', mayal k'ekbi elok, caw wal chi chiwaj in mimanil yuj k'ak'.

³¹ A yet yalantok, max wabc'al son yet tzalojc'ulal, axa tinani', asan ok'il c'al cusc'ulal chi wunej.