Job 21 - A Txꞌan Biblia Yin Kꞌanjobal 1989

¹ Max yalon cham Job:

² A wal junok bay chi wi' in mimanc'ulal e yin ayex ti', tol che taynej e yab in k'anej.

³ Ak'ek wal mimanc'ulal, yak'ban chin k'anjabi; chi lajwi tu xin, buchwajanekc'al.

⁴ A jun owal chi wun ti', manak yetok anima; yuj tu', ay tzet yuj xan jabxil chi wut in c'ul.

⁵ Ocanek t'anan win, c'ayokab aj e c'ul, tz'inc'al quex chi.

⁶ A yet chin naon yin juntzan ti', chin xiw c'apax ajok, a jun in mimanil ti', toxac'al chi bilcan ajok.

⁷ ¿Tzet yuj xan tol iquisc'al eb yobtakwom? Chi oc eb yin ichamil, chi ajc'al can eb.

⁸ Chi yil wal eb ch'ibaj is yuninal c'al yitxiquin, caw wal watx' yayji ec' eb bay is c'atan.

⁹ C'am tzet chi na eb, ayc'al oc eb yin junc'ulal. Tok chi ak'lay yailal yiban eb yuj Dios.

¹⁰ Caw wal watx'c'al no' is toro eb, tok ay bay toc'al chi camaj yune' wacax eb.

¹¹ A yuninal eb tol wal chi aj jirnaj eb yin sakach axca wal no yune' calnel.

¹² Caw wal yin tzalojc'ulal chi aj t'uklajbok eb yin canal, yet chi yaben eb yoc nuk' arpa, tambor c'al flauta.

¹³ Caw wal xiwilxa tzet yetal ay bay eb cax chi cam eb; yin wal tzalojc'ulal chi yun tojcan eb bay is mukbanil.

¹⁴ Chi yal eb bay Dios: Manchak on a teyej, c'am chi jochej chi co beybalnej a ley.

¹⁵ ¿Mactxel Cham chi je' yuj masanil tu'? ¿Tzet wal yuj xan ok on oc ayilal bay Cham? ¿Tzet wal chi ji yin, xan tol ok on txajlokc'al bay? ẍi eb.

¹⁶ Palta a watx'ilal ay bay eb c'am Dios yul sat tu', man yetok eb yul yet, yuj tu' xan c'amokab chin na axca chi na eb tu'.

¹⁷ ¿Tom comonxac'al chi lajwi is k'inal eb yobtakwom axca chi yun tan junok tzektebal? Tok comonxac'al chi ayc'ay eb yin yatakilal. Tok comonxac'al chi tit yowal c'ul Dios yin eb cax chi yaben wal eb yail.

¹⁸ Tok comonxac'al chi saklemcantok eb axca an ch'im, chi xulaytok yuj cak xuchum cak'ek'.

¹⁹ Chi mi e yala' tol a Dios ok ak'on tojlanej eb yuninal eb yuj masanil is yobtakilal is mam eb, quex chi mi. Palta ayin chi wala': Yaokab oc Dios yailal yiban eb yobtakwom tu', yet watx' ok nachaj el yuj eb tol a yuj is mul eb xan caytu' chi yun eb.

²⁰ A eb yobtakwom tu' yak'okab techaj eb yailal tu' a caw. Titokab yiban eb yowal c'ul Cham tol chi je' yuj masanil.

²¹ Tok ayto yalon yet eb yin tzet chi ec'tok yin is yuninal yet mayal cam eb, quin chi.

²² Palta xin, ¿mactxel chi je' cuyon Dios, Cham tol chi beyc'ulnen el eb cajyom bay satcan?

²³ Ay mactxel chi apni oc yin camich yin tol caw wal ay yip, chi tzaloji, watx'xac'al chi yabej,

²⁴ caw wal watx' chi lowi, cax ayc'al is cawil.

²⁵ Ay pax juntzanxa xin, yinxac'al ok'balc'ulal yayji cax chi camajok, c'am wal jabok tzet watx' max lo eb.

²⁶ Palta xin, a bay mukbal camnak tu' lajanc'al elok; c'am junok tol manak no patz ok chiontok.

²⁷ Wojtak ayin ti' tzet yetal che na win, c'al e yob nabalil win.

²⁸ Ta che k'anlej ayex junjun ex: ¿Baytal max cancan yatut jun yobtakwom tol yajawxac'al max yut ba ti'? quex chi.

²⁹ ¿Tom c'am bay chex k'anjab yetok eb anima chi ec'jabi? ¿Tom maj e yab tzet yetal chi yal eb?

³⁰ A yet chi tit yowal c'ul Dios cax chi yaontek junok yailal, axa eb yobtakwom, tok ay tzet chi on eb.

³¹ Tok ay mac chi alon oc is beybal eb tu' yin sat; c'am mactxel chi paktzen bay eb axca wal is mojalil.

³² Axa chi yun xin, chi ilaytok mukayok, cax chi taynen eb is mukbanil,

³³ toltax lababixac'al tx'otx' tx'otx' tu' ok yabej. A yintak jun ti' ok tok mukay masanil anima; xiwilxa mactxel mayal babjitoj toj mukayok.

³⁴ ¿Tzet ok yun in e mimanc'ulnen yetok juntzan e k'anej c'am yelapnok tu'? Lek'tialc'al che yal ayin, ẍi cham Job.