Job 14 - A Txꞌan Biblia Yin Kꞌanjobal 1989

¹ Ayon anima on ti' txennej co k'inal, cax yinc'al yatakilal chi yun yec' juj.

² Axca wal junok an xumac toltoc'al chi pojilok cax chi taknaj elok, axca tu' jayji; jun bek chi eq'uel co k'inal cax chon c'ayajok axcac'al junok enelej.

³ Mamin, ¿tom chawal oc a sat win naba anima in, axcac'al juntzan tu' wayji? ¿tom chito ochej chach oc yin beyc'ulal wetok?

⁴ ¿Tok ay mactxel chi je' yion el junok tojol xol eb man tojolok?

⁵ Txequelxa yayji jayeb xajaw chon ec' junjun on, ach max a nabalnej elok, ¿macto wal ok je' q'uexoni?

⁶ Iel a sat jin xin, cax chon cancan yin junc'ulalil, masantac'al chi lajwi co c'ual axca junok majan.

⁷ A yet chi tzoc'lay aj junok te te', chito wal je' wolji.

⁸ Caxc'al mi caw wal ichamxa te' xeej tu', caxc'al lananxa k'atok te' k'ojal tu' sat tx'otx',

⁹ a yet ok ayapnok sical a' aej yin, axa yaxbi aj tu'; axa yajol is wol tu' axca wal junok moc'an awoj tolto chi awlayi.

¹⁰ Axa ayon anima on ti xin, chon camc'alta'a, chon aycan telanok; axa yet chi el co c'ul tu', ¿baytal chi ca co tojcanok?

¹¹ Axca chi yun tanaj a' najab, ma a' aej,

¹² caytu' chi yun co cam ayon anima on ti', c'amxa yechel chon aj wan. A yet aytoc'al ec' jun satcan ti', c'amtoc'al mac ok eltek bay is mukbanil, c'amtoc'al mactxel ok eltek bay is wayub tu'.

¹³ Matawal chin a c'ubaj el bay cambal, yak'ban chi ec'tok yowal a c'ul; axa a naon c'ual in a naontek tu'.

¹⁴ Ta chi cam junok anima ¿ok mi ictzoj aj junelxa? Axa ayin ti' ok mi wechbanejc'al bay tu' axca junok soldado ayoc yin yopiso lanan yechbanen yet ok q'uexlayok, axa bekchaj el tu'.

¹⁵ Ach mi ok ach awjok ayin, cax ok mi in tak'wok ayach; yin wal tzalojc'ulalil ok mi in elocok, yujtol ach max quin a watx'nej.

¹⁶ A tinani', t'anan achc'al oc yin in beybal. Axa yet tu xin, manxam ok e a cuenta yin in yobtakil.

¹⁷ Ok mi tojcan in yobtakil tu' c'ayc'ulal oj, cax mi ok ak' tancan el in mul.

¹⁸ A junok witz chi pojtok, chi lajwi ayok, a yet tu' toltax ch'en mimek ch'en chi el ch'en bay is lugar.

¹⁹ Ac'ala' c'apax a' aej, chi uljitok ch'en ch'en yuj, cax chi ilaytok tx'otx' tx'otx' yuj a'. Caywal tu' chi yun ak'on lajwok ay co yipc'ulal ayon anima on ti'.

²⁰ Ach chon ak' ayc'ay yin junelnej, cax chon toji, cha q'uex tzetbil jili, cax chon a chekontok.

²¹ Ta a juninal, binajbil ok yun eb, manxa jojtakok; tatol yaynakil chi utlay eb xin, majxa al-lay jabej.

²² Asannej co yailal yul jet jojtak, asan yuj co bilc'ulal yul jet chon ok'i, ẍi cham Job.