Job 11 - A Txꞌan Biblia Yin Kꞌanjobal 1989

¹ Max yalon cham Zofar aj Naamat:

² A masanil juntzan comon k'anej tu' moj wal tol chi paktzelayi; man yujok tol xiwil k'anej chi al-layi, xan watx'xac'al jun chi alon tu'.

³ ¿Chimlaj a na yujtol xiwil a k'anjabi cax ok on tz'injok ayok? ¿Chim a na tol c'amxa mactxel ok je' paktzen juntzan a buchwal k'anej chal tu'?

⁴ Ach ti' chal bay Dios: Tz'akan chi yun in nabalnen elok, c'am jabok in yobtakil a satak, cachi.

⁵ Tolok wal chi k'anjab aj Dios cax chi paktzen tzet chal tu'.

⁶ A Cham chi je' tx'oxon ayach jun jelanilal, tol ewanc'uan yayji yuj, a ton juntzan tol caw wal yatak nachaj elok. Catam wal tu' ok eloni tol a Dios c'amto chi yak' yailal eban axca wal is mojalil.

⁷ ¿Chi mi laj a na' tol tz'akan ok nachaj el oj is jelanil Dios, Cham chi je' yuj masanil?

⁸ ¿Tzet wal yetal ok je' oj, yujtol a jun jelanil tu' yelxac'al can ay yintak satcan, yelxac'al najat yich yintak xab olan?

⁹ Yelxac'al miman yayji oc yintak tx'otx' tx'otx', cax tol yelxac'al miman sat yintak a' mar.

¹⁰ Ta a Dios chach iontok bay satak beyc'ulal, ¿mac wal junok chi je' tenon oc wanaj Cham?

¹¹ A Cham yojtak mactxel lek'ti', chi yil Cham masanil yobtakilal, ¿ma cha na' ach ti' tol man yojtakok?

¹² Axca c'am chi je' yalji anima yin junok xolakteal burro, cay c'apax tu' c'am chi je' yoc jelanil junok c'am nabal.

¹³ Ta chaoc Dios yin a c'ul cax chach tewi bay,

¹⁴ ta cheil a yobtakil en, cax manchak a chaoctok yul atut,

¹⁵ catatu' ok je' oc satak Cham yin c'am q'uixawc'ulalil, cax chach ayji ec' yin tzalojc'ulal c'al yin c'amxa xiwc'ulalil.

¹⁶ Caytu' ok yun tojcan c'ayc'ulal masanil juntzan a yailal ti' oj, ok tokcan c'ayc'ulal oj axca chi yun tancan aj a' aej chi bey yakan.

¹⁷ Axca wal k'ekk'inalc'al max yun a beytok yuj a yatakilal, axa tinani' ok ach beytok yin tzalojc'ulal, axca wal chuman c'u ok ela'.

¹⁸ Ok ach ayjok yin junc'ulalil yujtol ay tzet ayoc yipok a c'ul. Ok el bay enlak, axa a xew yin c'amxa tzet ok a na'.

¹⁹ C'am mactxel ok ach xibten yet ok ach xewok. Xiwilxa mactxel ok jay ach ul yiloni, yuj yoc eb amigoal etok.

²⁰ Axa eb yobtakwom nabaxac'al ok sayic' eb colwal; majxa ilchaj yuj eb bay ok je' c'uban ba. Asanxanej camich ok yaoc eb yipok c'ul, ẍi cham Zofar tu'.