Jn 7 - A Txꞌan Biblia Yin Kꞌanjobal 1989

A eb yuẍtak Jesús maj yaoc c'ul yin Cham

¹ Max lajwi tu', max c'oli yec'jab Jesús yulak yet Galilea; a pax yulak yet Judea xin, maj yal c'ul max eq'ui, yujtol a eb yajaw bay Judea tu', chi yochej eb chi yak' camok.

² Palta c'uxanc'al tol lanan bey jay pax jun k'in eb israel chi yik k'inal Chinama.

³ Yuj tu' xan max yal eb yuẍtak Jesús bay axca ti': —Manchak ach ayji ec' cayti'. Asi' bay Judea, yet watx' chi yil c'apax eb a cuywom aj lugar bay tu' juntzan milagro cha tx'oxo'.

⁴ Ta ay junok mac chi yochej c'ul chi ojtaknelay el yuj anima, manak bay ewantak chi yunej. Yuj tu', cayokab tu' chot a ba. Ta yel ay milagro chi el oneni, yowalil cha tx'oxil a ba satak anima, ẍi eb bay.

⁵ Caytu' max tz'ak yal eb yuẍtak tu' bay, toltax ajun eb c'am chi yaoc c'ul yin Cham.

⁶ Axa yalon Jesús bay eb tu' axca ti': —Manto c'ualok in tx'oxon el in ba. Axa ayex xin, tzanc'al mi tzet c'ual chi je' e naoni.

⁷ A eb e yet aj yulyibank'inal ti', c'am chi je' chichonbi oc c'ul eb e yin, palta ayin ti' chi chichonbi oc c'ul eb win, yujtol chin tx'oxocok tol yob tzet chi el yunen eb.

⁸ Asek e tx'oklil bay jun k'in tu' ayex ti'. Ayin ti', maj into tok, yujtol manto c'ualok in tx'oxon el in ba, ẍi Jesús bay eb.

⁹ Cax max canc'alta' bay Galilea tu' yet max lajwi yalon axca tu'.

Yet ayxa ec' Jesús bay jun k'inal Chinama

¹⁰ Axa yet mayal toj eb yuẍtak tu' bay jun k'in tu', max toj Jesús c'apaxok, palta yin ewantakil max yun yapni.

¹¹ Caw wal max saylay ec' yuj eb yajaw bay Judea bay jun k'in tu': —¿Baytal laj ay jun winak tu'? ẍi eb, chi ec' eb.

¹² Xiwil tzet chi al-lay yin Cham xol anima. Ay eb chi aloni: Caw wal watx' jun winak ti', ẍi eb; palta ay pax eb chi aloni: C'amak, yob, chi ilay aytek sat eb anima yuj, ẍi eb.

¹³ Ewantakil chi yal eb axca tu' yin sajwal tiejal, yujtol chi xiw eb, talaj chi yabaj eb yajaw bay Judea tu'.

¹⁴ Nan wal ayoc jun k'in tu', cax max oc Jesús yul yamak'il templo Dios. Axa c'oli cuywaj xol anima tu'.

¹⁵ Caw wal max c'ayaj c'ul eb israel ayoctok yul tu' yabxalwi, cax max yalon eb axca ti': —¿Tzet laj max yut yojtaknen el jun ti' juntzan chi yal ti', ti pax wal man cuywinakok? ẍixac'al eb.

¹⁶ Yuj tu xan max yal bay eb axca ti': —A juntzan cuybanilej chi wal ayex ti', man wetok, palta yet Cham max in chekontek.

¹⁷ Ta ay mac chi yal c'ul chi yun yochwan Dios, ok nachaj el yuj ta yet Dios juntzan cuybanilej chi wal ti', ma tol yulc'al wet chi waloni.

¹⁸ A mac tol yulc'al yet chi k'anjabi, chi yochej tol chi yi can ba, yet watx' mimanxac'al yelapnok naoni. Palta ayin ti', chi wochej tol a Cham max in chekontek, aokab Cham miman yelapnok yul e sat. Yuj tu' xan caw yel chi wala'. C'amc'al lek'tial chi wunej.

¹⁹ Ak'bilcan ley Dios ayex yuj Moisés, palta ilab c'am junok ex che yikej tzet chi yal jun ley tu'. ¿Tzet xan che yochej chin e yak' camok? ẍi Jesús bay eb.

²⁰ Axa tak'wi eb anima bulan ec' tu' bay: —Ach ti' tekan ay junok espíritu yob ayoc en. ¿Mactxel junok chi ochen chach yak' cam tu' chela'? ẍi eb bay.

²¹ Yuj tu' xan max yal pax bay eb: —Asan yuj jun tzet max el wunen yet c'ual xewilal, xan caw wal max c'ayaj e c'ul yuj.

²² Atax eb jichmam yet payxa, a eb inejcan el yich jun beybalej chi yik circuncisión. Axa Moisés alnejcanok tol yowalil chi co beybalnej jun tu'. Yuj tu', caxc'al c'ual xewilal, che yak' circuncidar eb unin chi alji.

²³ Yet watx' c'am che ten tzet chi yal ley Moisés tu', xan che yak' circuncidar eb unin tu' yet c'ual xewilal. ¿Tzet yuj xan chi tit pax e yowal win, yuj max wak' jaycan c'ul nak winak tu' sic'libil yet c'ual xewilal?

²⁴ Manokab comonok chex beyc'ulnewi. Ta ay mac che beyc'ulnej, watx'okab che yut e beyc'ulneni, ẍi Jesús bay eb.

Max yaltek Jesús baytal titnak

²⁵ Yuj tu' xan ay jaywan eb aj Jerusalén max alon axca ti': —¿Manminak jun winak ti' chi saylay ec' yuj eb chi ochen chi ak'on camok?

²⁶ Palta tix ayic' ti', lanan k'anjab co xol, c'amc'al tzet chi al-lay pax bay. ¿Chi mi na eb yajaw ti' tol a ton Cham Cristo?

²⁷ Palta man cayok tu' axca tu', yujtol yet ok jay Cham Cristo tu', c'am mac ojtaknen bay ok ca titocok, palta jun winak ti', jojtak baytal max ca tita, ẍi eb.

²⁸ A yet max yaben Jesús juntzan tu', lanan yak'on juntzan cuybanilej nan xol eb ayoctok yul yamak'il templo Dios, max yaliltek xol eb axca ti': —Yel toni, e yojtak in, cax e yojtak c'apax bay titnak in, palta man yulok wet max in jayi. A Cham acaw yel, a Cham max in chekontek, palta man e yojtakok Cham tu'.

²⁹ A pax in xin, wojtak Cham, yujtol a tu' max in tita. A Cham cheknejintek, ẍi Jesús bay eb.

³⁰ Lanan wal yalon juntzan ti', ay eb max ochen max aon oc preso, palta c'am junok mac max oc lacnaj yin Cham, yujtol manto c'ualok cam Cham.

³¹ Xiwil eb anima max yaoc c'ul yin, cax max yalon eb axca ti': —A yet ok jay Cham Cristo, ¿tom ec'ban milagro ok tx'ox yintak jun ti'? ẍi eb.

Max chek eb fariseo eb policía toj yilay Jesús

³² A yet max yaben eb fariseo tzet chi yal eb anima yin Jesús, tol ajun eb yetok eb yajawil eb sacerdote, max chekontok eb policía taynemal templo, yuj toj tit Jesús preso yalon eb.

³³ Axa yalon Jesús axca ti': —Jayebxanej c'ual ayin ec' e yetok. Ok lajwok tu xin, ok in paxaj bay ay Cham max in chekontek.

³⁴ Ayex ti' okto in e sayic'ok, palta man ok inxa ilchaj e yuj, yujtol man ok je' e yapni bay ok in apnok tu', ẍi bay eb.

³⁵ Axa yalubtanen eb aj Judea tu' xol axca ti': —¿Baytal laj ok tok jun ti' xan chi yala' tol man ok ilchaj juj naoni? ¿A mi bay eb jet conob ayic' xol eb griego? Tekan chi yochej a tu' ok tok xol eb, cax chi toj cuywaj xol eb griego tu' naoni.

³⁶ Ilab tol max yal ayon axca ti': Ayex ti', okto in e sayic'ok, palta man ok inxa ilchaj e yuj, yujtol man ok je' e yapni oc bay ok in apnok tu', ẍi ayon. ¿Tzet laj chi yal elapnok juntzan max yal ayon tu' tinani' xin? ẍi eb.

Jun axca aej chi ajol nuk' yin janimail

³⁷ Axa jun c'ual yet lajub k'in, xiwil anima chi wajnaji. Yuj tu' xan ato yet lajub c'ual k'in tu' max aj wan Jesús nan xol eb, cax max yalon yin ipejal axca ti': —Ta ay ex ayex ti' caw wal che yochej Dios, axca tol ay e takintial yin, sebaxek ayin, cax che chaon tzet chi yochej e c'ul tu'.

³⁸ Ta ayex che yaoc e c'ul win, axca wal tol ay junok aej ok ajol nuk' yin e yanimail, cax ok el yakan. A ton jun tu' ok ak'on e k'inal tol ayc'al yin tojbalk'inal, yujtol axca tu' yaloncan tx'an Un Tz'ibbilcanok, ẍi Jesús bay eb.

³⁹ Caytu' max yut yalon axca tu', yujtol a eb chi yaoc c'ul yin Cham, chi cajbaj oc Cham Espíritu yin eb. A yet jun tiempoal tu', c'amto chi ak'lay Espíritu bay eb anima, yujtol manto paxaj Jesús bay satcan.

Max teyelej aj ba eb anima yujc'al Jesús

⁴⁰ Lajwic'al yaben eb anima tu' tzet max yal Jesús, max yalon eb axca ti': —Wal yel, a ton jun chekbej Dios echbanebil jay juj ti', ẍi eb.

⁴¹ Ay pax eb max aloni: —A jun ti', a ton Cham Cristo, ẍi eb. —A jun Cristo tu', ¿tom aj Galilea axca jun ti' che na'?

⁴² Chi yal tx'an Un Tz'ibbilcanok, tol a Cham Cristo tu', a bay conob Belén yowalil chi alji, bay ec'nak David yet payxa, yujtol yinatil David, ẍi juntzanxa eb tu'.

⁴³ Xan max teyelej ton aj ba eb anima tu' yujc'al Jesús.

⁴⁴ Ay jaywan eb max ochen max aon oc Cham preso, palta c'am junok mactxel max oc lacan yin Cham.

Maj yaoc eb yajaw c'ul yin Jesús

⁴⁵ Asan eb policía, eb taynemal templo Dios max apni oc tx'oklil bay eb fariseo, yetok bay eb yajawil eb sacerdote, tutun a eb tu' cheknej eb. Axa k'anlelay el bay eb tu': —¿Tzet yuj xan maj e yitek Jesús tu'? ẍi eb bay eb.

⁴⁶ —Yujtol c'am wal junok mac chi apni k'anjab axca jun tu', ẍi eb policía tu'.

⁴⁷ Axa yalon eb fariseo tu' bay eb axca ti': —¿Tom che yak' c'apax e ba etnelay ayex ti'?

⁴⁸ ¿Ay mi junok eb co yajawil ti' chi yaoc c'ul yin? Ac'ala' ayon fariseo on ti', c'am junok on chi jaoc co c'ul yin.

⁴⁹ Asan eb comon anima, eb man yojtakok jabok ley Moisés, asan eb chi yaoc c'ul yin, palta ay yowal c'ul Dios yiban eb tu', ẍi eb fariseo tu'.

⁵⁰ Ay jun yet fariseoal eb tu' chi yik Nicodemo, jun betnak ec' k'anjab yetok Jesús yet yalantok. A jun tu' max alon bay eb axca ti':

⁵¹ —A yalon co ley, tol c'am leyal chi jaoc yailal yiban junok mactxel, ta manchak jab bay tzet is mul, ẍi bay eb.

⁵² Yuj tu' xan max yal pax eb bay axca ti': —¿Tom aj Galilea ach yetok jun winak tu'? Il yul tx'an Un Tz'ibbilcanok; a tu' ok ela', tol c'am junok chekbej Dios chi tit bay Galilea, ẍi eb bay.

Is yabixal jun ix ajmul ix

⁵³ (Cax max paxcan junjun eb bay yatut.