Jn 10 - A Txꞌan Biblia Yin Kꞌanjobal 1989

Is yabixal jun corral calnel

¹ Max yalon Jesús axca ti': Wal yel chi wal ayex, k'inalok ay junok corral calnel bay chi octok junok winak tinani',*fn* ta manak bay is ti' jun corral tu' chi ca yoctok, palta tx'ok bay chi ca yoctok, elk'om ton jun axca tu'.

² A pax mac a yul ti' corral chi octok xin, a ton nak yilomal no tu'.

³ A nak waynem corral,*fn* a chi jakon ti' corral bay nak ilom calnel. Yojtak no calnel yilomal. Yojtak nak ilom calnel tu' bi junjun is calnel. A chi ion eltek no'.

⁴ Chi xew yion eltek nak no' is calnel, cax chi babji satak no'. Chi oc tzakan no' yintak nak, yujtol yojtakxa no' yul is nuk'.

⁵ Palta k'inalok ay junokxa winak man k'aynakok no' yetok, man comonok chi oc tzakan no' yintak. Ta man k'aynakok no' yetok, chi el bulnaj no' bay, ẍi Jesús.

⁶ Max yaltek Cham jun abix ti' bay eb, palta maj nachaj el yuj eb tzet chi yal elapnok.

Lajan Jesús axca junok watx' ilom calnel

⁷ Cax max yalon pax Jesús bay eb axca ti': Wal yel chi wal ayex, axca ti' corral bay chi ec' oc no calnel, cay in tu'.

⁸ Ay eb babel jaynak in satak, max tz'ak yaloc ba eb chekbejok Dios. Axca wal junok elk'om chi oc yul corral, cay wal tu' eb masanil, palta eb yet-xa Dios, maj yaoc eb c'ul yin eb.

⁹ Ayin ti', lajan in axca junok ti' corral tu'. A eb a ayin chi ca yoqui, ok colchaj eb. Axca junok calnel chi octok, chi eltek yul is corral sayon low ba, caytu' ok yun eb.

¹⁰ Ay eb axca junok elk'om chi jayi, chi yelk'anentok, cax chi yak'on camok. Axa in ayin ti', max in jay yuj ul wak'on k'inal eb, tol tz'akan yin watx'ilal.

¹¹ Ayin ti' lajan in axca junok ilom calnel caw wal watx', cax bekan c'ul cam q'uexelok no'.

¹² Ay bay toc'al chi manlay junok mac chi ilwi calnel, palta man wal acaw aj calnelok. A yet chi yilon jay no ok, ayman chi bekcan bulan no calnel tu' tx'oklil, cax chi eli yujtol man yetok no'. Chi lajwi tu' chi uchlaycan saklem no calnel tu' yuj no ok.

¹³ A nak ilom calnel tu', chi el nak, yujtol asan yuj tojbil c'u nak xan chi ilwi calnel, man wal yujok tol ay yelapnok no' yul sat.

^14-15 Ayin ti', lajan in axca junok ilom calnel caw wal watx'. A eb wet, axca tol in calnel eb. Ojtakbil in yuj in Mam. Ac'ala' in, wojtak in Mam. Axca wal wojtaknen in ba yetok in Mam, caytu' wojtaknen in ba yetok eb wet-xa yayji. Ok wak' in ba cam q'uexelok eb wet tu'.

¹⁶ Ay juntzanxa eb tolto ok yaoc c'ul win, asan tol man jet conobok eb. Yowalil ok in wajbaj oc eb. Ok yiken eb ayin. Junxanej oyan ok yun eb wet tu' masanil, yujtol asannej in ok wil eb.

¹⁷ Chi camel c'ul in Mam win, yujtol ok wak' in ba camok, cax ok wiquisnen pax aj in ba junelxa.

¹⁸ Ayin ti', chi el yin in c'ul wak'on in ba camok. C'am mac chi je' in yak'on camok, ta c'am chi yal in c'ul. Ay wikbej wak'on in ba camok. Ay c'apax wikbej wiquisbi aj junelxa, yujtol caytu' max yut yak'oncan in Mam jun chekbanil ti' ayin, ẍi Jesús bay eb.

¹⁹ A yet max yalon juntzan ti', max teyelen aj ba eb aj Judea tu' yuj. Ca pojan max yut ba eb junelxa.

²⁰ Ay nan eb max alon axca ti': —¿Tzet xan che yab tzet chi yal jun winak ti'? Ilab tol ayoc espíritu yob yin. Chabil oybinak sat yuj, ẍi eb.

²¹ Palta ay pax nanxa eb chi alon axca ti': —Ta a espíritu yob ayoc yin, ¿xin ta chi je' yalon axca ti'? ¿Tom chi je' jakon espíritu yob tu' sat junok mac c'am chi je' yilwi? ẍi nanxa eb tu'.

C'am chi cha eb aj Judea Jesús

²² A yet tu' tiempoalxa nabil k'inal, c'ual c'apax chalay k'inal templo Dios bay Jerusalén.

²³ Lanan wal yec'jab Jesús bay templo tu', bay jun tenta chi yik tenta Salomón.

²⁴ Cax max oc oyan eb aj Judea ayic' bay tu' yin Cham, max yalon eb axca ti': —¿Bak'inc'al ok on a bekil yin cabc'ulal? Ta Cristo ach, bayc'al ijan chot alon ayon tinani', ẍi eb bay.

²⁵ Axa tak'wi bay eb tu' axca ti': —Mayal wal ayex, palta c'am che yaoc yin e c'ul. A juntzan milagro chin tx'oxo', asan yuj yikbej in Mam xan chi je' wuj in tx'oxoni, cax a ton juntzan tu' chi tx'oxk'abnen elok mac in txel.

²⁶ Palta ayex ti', caw wal c'am chin e yaoc yin e c'ul, yujtol man wetok e yayji.

²⁷ A eb wet, chi yacbaj eb is txiquin ayin, cax wojtak eb ayin ti'. Axca no calnel chi oc tzakan yintak yilomal, caytu' chi yun tzakloj eb wintak.

²⁸ Ayin chi wak' is k'inal eb, tol ayc'al yin tojbalk'inal. Yuj tu' xan c'am bak'in ok c'ayil eb. C'am junok mactxel chi je' yion ec' eb yul in k'ab.

²⁹ A in Mam, ec'ban yelapnok yintak masanil, a max ak'on eb ayin. C'am junok mactxel chi je' yion ec' eb yul k'ab in Mam.

³⁰ Ayin ti', junnej animail wayji yetok co Mam Dios, ẍi Jesús bay eb aj Judea tu'.

³¹ Yuj tu' xan max sic'aj eb ch'en, cax max yochej eb max k'okch'ennen camok.

³² Palta max yal Jesús bay eb: —Xiwil tzet yetal watx' max el wunen yuj is yikbej in Mam e nan e xol. ¿Mactet junok tu' tol yuj xan che yochej chin e k'okch'ennej camok? ẍi bay eb.

³³ —Man yujok junok watx' max el onen tu', xan chi jochej chach co k'ok camok, palta asan yuj cha buch Dios. Ach ti', comon anima ach, palta ilab chal pax oc a ba Diosal, ẍi eb bay.

³⁴ Yuj tu xan max yal bay eb axca ti': —A yul tx'an ley ayic' ayon, caytu' tz'ibelaycan ay axca ti': Max wala' tol dios ex ayex ti', ẍican Dios yul tx'an.*fn*

³⁵ Jojtak, a tzet tz'ibbilcan yul tx'an Un tu', maj je' toc'al ok co tena'. A Dios alnejcan bay eb chanakcan is k'anej tu', tol dios eb.

³⁶ Akxa ayin ti', a Dios sic'nej in elok, a' max in chekontek yulyibank'inal ti'. Yuj tu' ¿tzet xan che yala' tol chin buchwaj yin Dios, yet chi waloni tol C'ajol in Dios?

³⁷ Ta manak tzet chi yun in Mam chi wunej, manchak e yaoc e c'ul win.

³⁸ Palta ayin ti', lanan wunen tzet chi yun in Mam. Yuj tu' xan caxc'al mi c'am che yaoc e c'ul yin tzet chi wala', palta aek oc e c'ul win yuj juntzan tzet yetal chi wun tu'. Catatu' ok nachaj el e yuj, cax ok e yaon oc yin e c'ul tol ayoc co Mam Dios win, cax ayin c'apax oc yin, ẍi bay eb.

³⁹ Yuj tu' xan maxto yak'lej eb mitx'on junelxa, palta max col ba Cham yul k'ab eb.

⁴⁰ Lajwi tu xin, max k'axpoj ec' yul a' miman Jordán, axa yayji ec' bay yak'nak bautizar Juan eb anima tu'.

⁴¹ Xiwil anima max ul ilon Cham, cax chi yalon eb axca ti': —A cham Juan, c'am bay max tx'ox junok milagro, palta masanil tzet max yal yuj Jesús ti', yelc'al ton masanil, ẍi eb.

⁴² Xiwil mactxel max yaoc c'ul yin Jesús bay jun lugar tu'.