Jeremías 49 - A Txꞌan Biblia Yin Kꞌanjobal 1989

K'anej max al-lay el yin conob Amón

¹ A is k'anej Jehová yin Amón: Tokwal c'am is yuninal Israel chi je' sataknen is tx'otx' xan ¿tzet yuj tol a juntzan anima ayilwom bay Milcom chi cajay bay tx'otx'al is tribual Gad? ¿Tzet yuj xan tol a eb amonita chi cajay bay juntzan conob tu'?

² Palta ayin Jehová in chi wala' tol ok apnok c'ual, tol ok ablay wal yel aw yet owal bay conob Rabá, is miman conob eb amonita. Toxac'al ok aj can bulan is pojilal, ok tz'atok masanil is yaldeail yuj k'ak'ej. Ayin wal caw Jehová in chi wala' tol caytu' ok yun yion pax ec' Israel is tx'otx' junelxa.

³ Ocanek yin cusc'ulal ex aj conob Hesbón, yujtol a Hai mayal lajwi ayok. Ex ix aj Rabá, ocanek yin cusc'ulal. Pichek e ba yetok el pichilej, cax ok'anek. Ec'anek xuyuyok yul e conob yuj e somc'ulal. Ak'ek yasjok e mimanil, yujtol a e diosal Milcom, ok ilaytok yin presoal, yetok eb ayoc yin sacerdoteal bay, c'al yetok eb anima tol mimek yikbej.

⁴ ¿Tzet yuj xan che maynej e ba yuj e yax jobe bay chi ch'ib xiwil awoj, ex anima tol tenomtak? Asan e beyomal wajbil ec' bulanok, a' ayoc yipok e c'ul, xan che yala': ¿Mac wal ok je' yak'on owal jin? quex chinaji.

⁵ Ayin Jehová, Yajaw in yin Masanil chi wala': Tol ok watok xiwc'ulal e yiban, yujtol masanil eb conob ayic' e cawilal ok oc eb yak'on owal e yin. Junjun exxac'al ayex ti', ok ex uktelay elok, c'amxa mactxel ok je' ex wajban ocok.

⁶ Palta ayin wal caw Jehová in chi wala': Tol axa yin lajubal xin ok wi' pax aj can conob Amón ti' junelxa, quin chi, ẍi Cham.

K'anej max al-lay yin conob Edom

⁷ A k'anej max yal Jehová, Cham Yajaw yin Masanil yin Edom: ¿Tom c'amxa jelanilal bay conob Temán? ¿C'amxa mi chi nachaj el tzet chi yut ba eb jelan? ¿Mayal mi c'ayil masanil is jelanilal eb tu'?

⁸ Ex aj Dedán, elanek ajok; asek, c'ubajek el e ba yulak na ch'en, yujtol ok wak' lajwok ay is conobal Esaú ti'. Mayal apni oc c'ual yet ok waonoc yailal yiban.

⁹ A yet chi wajlay an uva, ay bay chi cancan junjunxa chaan an. A yet chi apni oc eb elk'om yet ak'balil, asan tzet yetal yowalil chi oc yuj eb, chi yitok eb.

¹⁰ Palta c'amxa jabok tzet yetal okto wak'can bay conobal Esaú. Wojtak masanil, c'am bay ok je' e yeban el e ba. A masanil eb e yuninal, eb e yican, c'al yetok eb cajan e cawilal, ok lajwok ay eb. C'amxa mactxel okto canok.

¹¹ Canokab eb e yuninal yin mebail, ok in taynej eb; c'al eb xal camnakxa yichamil, chi je' quin yaon oc eb yipok is c'ul, ẍi Jehová.

¹² Max yalon Jehová axca ti': Ay eb man wal mojok chi yab yail, a tinani', yowalil ok yab yail eb yowal in c'ul, axca tol ok yuc' eb vino caw wal ow. Akxam ayex ti', ¿tom che na' tol man ok e yab yail? Palta yowalil ok e yab yail yowal in c'ul.

¹³ Yujtol ayin wal caw Jehová in chi wak' in ti': A conob Bosra ok cancan yin tz'inanil, toxac'al ok xiw eb anima yiloni, ok buchon eb, c'al catabnen eb. Axa juntzanxa conoblak yet Edom, ok uchchajcan ay c'apax yin junelnej, ẍi Cham.

¹⁴ Max jayoc jun k'anej ayin yuj Jehová: Lanan cheklaytek jun chekbej ul yalon el bay xolak nación: Wajbajek e ba, cax chex toj yin Edom, watx'nejek e ba yet chex toj yin owal, ẍi.

¹⁵ Ex aj Edom, yelxac'al yaynakil ok ex wut yintak masanil conob, c'amxa e yelapnok yul sat masanil anima.

¹⁶ Ayexc'al oc che yetnej e ba yuj e maynejbail; tok ay mac chi xiw ayex axca e naoni. A bay yulak pojilal ch'en mimek nach'en bay jolomlak witz, a tu' chex cajayi. Ayin wal caw Jehová in chi wala', tol caxc'al a tu' chex cajay bay yelxac'al can, axca chi yun no' tx'acbaj chi watx'nej wayub bay tu', yowalil ok ex wiaytek.

¹⁷ A masanil mactxel ok ec' bay Edom, toxac'al ok xiwcan ajok, c'al c'ayaj c'ul yuj jun miman yailal max jay yiban.

¹⁸ Ayin wal caw Jehová in chi wala': Lajanxac'al ok yun lajwi ay Edom, axca max yun lajwi ay Sodoma, c'al Gomorra, yetok juntzanxa conoblak ay is cawilal tu'. C'amxa mactxel ok meltzojtok cajay junelxa bay tu', tamwal ayto mactxel tol toc'al ok ec'jabok.

¹⁹ Axca wal junok no coj chi eltek bay xolak eltzab bay tilak a' Jordán, chi ajapnok lemnaj bay chi low no calnel, toxac'al chi saklemcantok no' yuj, axca wal tu' ok yun wapni oc bay conob Edom, axa yelaj eb anima bay is tx'otx'al tu', axa waon oc jun yajaw bay tu' tol sic'bil el wuj. ¿Mac wal txel chi je' lajlen ba yipalil wetok? ¿Mactxel chi je' teyelen ba wetok? ¿Mac yajawilal chi je' tec'ban ba in satak?

²⁰ Abek wal tzet yetal mayal in na' yiban Edom, ayin Jehová in ti'. A wal tzet yetal mayal in na' yin eb cajan bay Temán: Toltax a yuninal eb ok ilaytok, cax ok uchchaj ay is cajlobal yiban.

²¹ Caw wal ok bilaj tx'otx' tx'otx' yet ok ayc'ay Edom tu'. Ok el yaw eb k'anon colwal, ok apnoktac'al oc yel yaw bay a' Cakyin Mar.

²² A eb ajc'ul tu' ok apnok oc lemnaj eb yin Bosra, axca wal junok tx'acbaj chi apni oc jupnajok. A wal yet jun c'ual tu', a eb soldado bay Edom, toxac'al ok xiwaj eb axca junok ix ix tol lanan watx'ji c'ul yuj unin, ẍi Cham.

K'anej max al-lay yin Damasco

²³ K'anej max yal Jehová yin Damasco: A eb aj conob Hamat c'al Arfad, manxa animaok ay c'ul eb, yujtol yobxac'al abix max apni oc bay. Mayal aj can xiwc'ulal yin eb; c'amxa chi je' yayji ec' eb yin tzalojc'ulalil.

²⁴ A eb bay Damasco, c'amxa yip eb, lanan naon eb tol ok tok eb elajok. Asanxanej xiwc'ulal, bilc'ulal c'al yailal ay xol eb, axca junok ix ix lanan watx'ji c'ul yuj unin.

²⁵ A jun conob caw wal mimanbil tu', jun conob tol ayoc yin tzalojc'ulal, mayal cancan yin tz'inanil.

²⁶ Ayin wal caw Jehová Yajaw in yin Masanil chi wala': A yet jun c'ual tu', a eb ach'ej toxac'al ok aycan latz'an eb bay yulak calle; masanil eb is soldado ok cam eb.

²⁷ Ok waoc k'ak'al murallail Damasco, ok yak' lajwok jun k'ak' tu' juntzan is despacho Ben-adad, ẍi Cham.

K'anej max al-lay el yin conob Cedar c'al conob Hazor

²⁸ A k'anej max yal Jehová yin eb ay yul makbej Cedar, c'al yin eb yajawil conoblak Hazor, a ton juntzan max yak' ayc'ay Nabucodonosor reyal Babilonia. Ex aj Babilonia asek, ak'ek owal yin Cedar. Ak'ek lajwok jun makan anima bay yichcan tu'.

²⁹ Iek ec' is calnel eb, c'al is mantiado eb yetok jantak is mitx'k'ab eb. Iek ec' is camello eb, cax chi el e yaw: Tzanxac'al bay ay xiwc'ulalil, quex chi bay eb.

³⁰ Ayin wal caw Jehová in chi wala': Elanek ajok mac ex cajan ex bay conob Hazor. Asek, c'ubajek el e ba, yujtol a Nabucodonosor, reyal Babilonia mayal na' tzet yetal ok yun e yin.

³¹ Ayin Jehová in chi wal bay eb aj Babilonia: Asek ak'oj owal yin jun conob c'am tzet chi na', tol yin tzalojc'ulal ayic'ok, c'am puertail is conob, c'am jabok makan eb, caw wal asannej tx'oklil.

³² Asek, cax che yelk'anen is camello eb, c'al is wacax eb, quin chi. Tzanxac'al bay ok wak' tit yailal yiban eb chi tzukil xil bay tz'eyil jolom, xan ok saklemcantok eb.

³³ A conob Hazor ok cancan yin tz'inanil yin tojbalk'inal, asanxanej no ok ok cajay ec' bay tu'. C'amxa mactxel ok cajay bay tu', tamwal ayto mac ok ec'ok, ẍi Jehová.

K'anej max al-lay yin Elam

³⁴ A yet max chaon el yich Sedequías yak'on reyal bay Judá, a yet tu' max k'anjab Jehová bay Jeremías yin conob Elam:

³⁵ Ayin Jehová, Yajaw in yin Masanil chi wala': Ok in mak' k'aj is julbal eb soldado aj Elam, a ton yarma eb tol caw wal mimanbil.

³⁶ Ok witek junok owal yin jun conob ti', axca junok miman owal cak'ek', tzanxac'al bay chi tita. Tzanxac'al bay ok ilaytok eb; c'amxa junok nación bay man ok apnok oc eb c'uban el ba.

³⁷ Ayin wal caw Jehová in chi wala' tol toxac'al ok bilaj eb aj Elam satak eb ajc'ul ok ak'on camok. Ok watok yailal c'al uchlejbail yiban yuj yowal in c'ul. Ok apnok oc owal yin eb masantac'al ok yal lajwok ay eb.

³⁸ Ayin wal caw Jehová in chi wala', tol ok wak' Yajawilal bay tu'. Ok wak' ak'lay cam eb rey c'al eb yajawilal conob Elam tu'.

³⁹ Palta ayin wal caw Jehová in chi wala' tol a yin lajubal xin, ok wi' pax aj can conob Elam ti' junelxa, quin chi, ẍi Cham.