Jeremías 41 - A Txꞌan Biblia Yin Kꞌanjobal 1989

Max mak'lay cam Gedalías

¹ A yet is suk xajaw max toj Ismael, c'ajol Netanías, yetok lajonwan is soldado bay Mizpa k'anjab yetok Gedalías; junej max low eb yetok. (A Ismael tu', yitxiquin c'apax Elisama, yinatil eb rey, cax miman yayji oc yopiso bay reyal Judá yet yalantok.)

² Yak'ban chi low eb, max aj wan Ismael yetok eb lajonwan ajun yetok tu', yin mak'on cam eb Gedalías, cham max alay oc yin gobernadoralok Judá yuj cham reyal Babilonia.

³ Max mak'on c'apax cam Ismael tu' masanil eb aj Judá, yetokc'al eb soldado aj Babilonia ayic' yetok Gedalías bay Mizpa tu'.

⁴ Axa yet junxa c'ual xin, yet mayal cam Gedalías, yet c'amto mactxel chi ojtaknen el tzet yetal max uj tu',

⁵ max apni oc 80 eb winak petoj bay Siquem, bay Silo, c'al bay Samaria. Mayal tzukil eb xil is ti', cax tzilquiẍtakxac'al pichil eb ayocok, yasquiltakxac'al is mimanil eb; ac'al oc eb max uten axca tu'. Ibil c'apax oc ixim trigo yuj eb, c'al incienso yet chi yak' eb yin xajanbalil bay Jehová bay templo.

⁶ Axa yet tu', max eltek Ismael bay Mizpa ul chaon eb, lanan teyen ok' ba; asan wal yet max chalen ba yetok eb, max yalon bay eb axca ti': —Titanek, ul ilek Gedalías c'ajol Ahicam, ẍi.

⁷ Palta asan wal yet max apni oc juntzan eb winak tu' bay nan xol conob, max mak'lay cam eb yuj Ismael yetok eb ajun yetok. Max k'oklay aytok eb bay yul jun olan yuj.

⁸ Palta xin, ay wal lajonwan eb xol eb lanan mak'lay cam tu' max alon bay Ismael: —Manchak on a mak' camok; ayon ti' ay co trigo, ay co cebada, ay aceite, ay c'apax no yalcab; a juntzan tu' c'uban el juj bay yinel conob, ẍi eb. Yuj tu xin, majxa mak'lay cam eb yuj Ismael yetokc'al eb ajun yetok tu'.

⁹ A jun olan bay max alay aytok is mimanil eb anima max mak'cam Ismael tu', a ton jun olan bay chi wajay aej max chek cham rey Asa jotlayok, yet max colba bay Baasa is reyal Israel. A jun olan tu' caw wal miman yayji, palta max noj wal yuj is mimanil eb anima max mak'cam Ismael.

¹⁰ Max yiontok Ismael tu' eb ix cutz'in cham rey, c'al yetok eb anima ayic' bay Mizpa tu', a ton eb max ak'lay ya'ilnej Gedalías yuj cham comandante Nabuzaradán. Max ilay bey eb yuj Ismael, yet chi tojcan eb bay yul is makbej Amón.

¹¹ Axa wal yet max yaben aj Johanán yetokc'al eb yajawil soldado ayic' yetok, yuj tzet mayal yun Ismael,

¹² max wajon eb masanil is soldado, max toj eb yak'on owal yetok. A tu' max ilchaj yuj eb bay jun miman wajbal aej ay bay Gabaón.

¹³ A yet max yilon oc eb lanan yilaytok preso yuj Ismael, yin Johanán yetokc'al eb yajawilal eb soldado ajun yetok, caw wal max tzalojbi aj eb.

¹⁴ Max meltzoj eb bay Johanán.

¹⁵ Palta a Ismael, yetok waxakwan eb ajun yetok max el eb, max tojcan eb bay conob Amón.

¹⁶ Axa Johanán yetokc'al eb yajawil eb soldado max ilon tzet max yuncan eb soldado, eb ix ix, eb unin yetokc'al juntzan eb mimek yikbej lanan yilaytok preso yuj Ismael. A tu' max ilaytek eb bay Mizpa yuj, yet mayal lajwi mak'lay cam Gedalías yuj. Axa Johanán max ion meltzoj eb bay Gabaón.

¹⁷ Caywal tu' max yun tojc'al eb xin, masantac'al max apni oc eb bay Gerut-quimam, junej ay jun tu' yetok Belén. A bay tu' max oc wanaj eb, a pax naonc'alta eb xin, tol t'inan chi apni oc eb bay Egipto.

¹⁸ Caytu' chi yun yel eb bay eb aj Babilonia yaloni; chi xiw eb, yujtol a Ismael max mak'on cam Gedalías, cham abil oc yin gobernadoral yuj cham reyal Babilonia.