Jeremías 4 - A Txꞌan Biblia Yin Kꞌanjobal 1989

Tenchebalej yet chi oc naojbail

¹ A wal caw Jehová chi aloni: Ta chi yal e c'ul che bekcan e yobtakil ex israel, meltzojanektek ayin. Tatol che yiel masanil juntzan e diosal yajbejtak tu' in satak, cax chex tzaklojc'al wintak;

² tatol chin e yak' binaj yin yel, yin tojolal c'al yin jichanil, catatu' bian, ok cha' masanil nacionlak watx'c'ulal ayin, c'al in yion aj can eb, ẍi Cham.

³ Chi yalon pax Jehová bay eb anima aj Judá c'al eb aj Jerusalén: A tx'otx' tx'otx' c'amtoc'al bay chi ak'layi, a tx'otx' che yak'a'; c'amxa che yaw e yawoj bay xolak q'uix.

⁴ Ayex aj Judá ex ti' c'al ex aj Jerusalén, ikejek in trato. Aek wal oc yin e c'ul yechel in trato tu'. Ojtaknejek elok tol ayin ton e Yajawil in. Axa talaj chi yunajok, tol a yuj e yob beybal tu' chi ayc'ay yowal in c'ul e yiban axca k'ak'ej, c'amxa mactxel chito je' buton tanok.

Jun c'aywajwom chi jayoc yin Judá

⁵ Alek el juntzan ti' bay Judá, c'al bay Jerusalén; alek el yin nuk' trompetail bay masanil nación. Yin wal ipejal chi yun yel e yaw che yalon axca ti': Co wajbajek oc co ba bay juntzan mimek conob tol watx' yoc is murallail, quex chi.

⁶ Ak'ek tx'oxbanilej yet chi toj eb anima c'ubaj el ba bay Sión. Sayek bay che col e ba. Manchak ex oc waanok, yujtol a bay norte ok yitek Jehová jun miman yailal ok ak'on lajwok ay masanil.

⁷ Axca yeltek no coj yul is wayub, axca tu' chi yun tit jun mac ok ak'on lajwok ay nacionlak. Mayal el bay yul is conobal yet chi ul yak' lajwok ay co conoblak, yet chi uchlaycan ayok, cax chi cancan yin tz'inanil.

⁸ Yuj tu' xan jaek oc el pichilej, ok'okonek, k'akwokokonek yuj yail, yujtol a wal yowal c'ul Jehová c'amto chi tan co xol, quex chi, ẍi Jehová.

⁹ A wal caw Jehová chi aloni: A wal yet ok apnok oc jun c'ual tu', a rey yetok eb yajaw toxac'al ok bilaj eb yuj xiwilal. Toxac'al ok xiwcan aj eb sacerdote, c'al eb in chekbej, toxac'al ok ijican aj c'ul eb, ẍi Cham.

¹⁰ Max walon ayin ti': ¡Ay Mamin! ¿tzet yuj xan max etk'anenej eb anima aj Jerusalén? Max ak' a ti' ak'on junc'ulal bay eb, axa tinani' a jun cuchillo ijan oc yin nuk' eb oj, quin chi.

¹¹ A wal yet jun bek tu', ok al-lay bay eb anima bay Jerusalén yuj Jehová: Ay jun takin cak'ek' chi tit bay jolomlak witz bay tz'inan tx'otx'. Chi jayoc xuynaj yin yetc'ulal in conob, man axcaok cak'ek' chi oc yopiso yin co xuwi trigo.

¹² A jun cak'ek' chi wak' tit tu', yelxac'al ow yintak jun tu'. A jun cak'ek' chi binaj cayti', a ton yailal chi tit wuj yiban in conob, ẍi Jehová.

Ocnak oyan eb ajc'ul yin Judá

¹³ Max yalon Jehová: Ilek wal tit eb ajc'ul axca junok asun. A wal carruaje eb lajan wal tit axca junok owal cak'ek'. Caw wal jelan bey is chej eb tu' yintak no' tx'acbaj. Ok'bal on c'ul ayon ti', ti wal ok on c'ayilok, quex chi.

¹⁴ Ex aj Jerusalén, iek el masanil yobtakilal ayoc yin e nabal, caywal tu' ok yun e colchaj elok. ¿Bak'in ok e bek e naon yobtakilal?

¹⁵ Chi tittac'al yabixal owal bay Dan c'al bay siquilal tx'otx' yul yet Efraín:

¹⁶ Alek bay nacionlak c'al bay Jerusalén, tol a bay jun nación caw wal najat ay, a tu' chi tit eb ajc'ul. Caw wal chi el yaw eb yin ak'oj owal yin conoblak Judá.

¹⁷ Toxac'al oyan oc eb yin conob Jerusalén, axca mac chi taynen junok mulnajil. Ayin wal caw Jehová in chi wala' tol cayton tu' yayji, yujtol max oc eb yin tenomtakil ayin.

¹⁸ Yuj e beybal c'al tzetak che yunej, xan chi jayoc juntzan ti' e yiban. A yuj e yobtakilal xan caw wal yob max yun e yelocok, caw wal chi yab yail e c'ul yuj, ẍi Jehová.

Cusc'ulal Jeremías yuj is conob

¹⁹ Caw wal chin ec' tx'umumok yuj yail. Caw wal chi but-xi aj in c'ul yuj tzet chi uji. Caw wal c'amxa chi je' in tz'inji ayok. Mayal wab yoc jun nuk' trompeta, jun aw yet owal.

²⁰ Txololixac'al jayoc yabixal yailal chi uji. Masanil jun nación ti' mayal etaxtok. Jun bek max uchchaj ay in mantiado, cax max etaxtok bay cajan in.

²¹ ¿Jantakto wal tiempoal ok wilc'al bandera eb soldado c'al waben yoc nuk' trompeta?

²² Chi yal Jehová: A in conob, caw wal c'am is nabal, c'am chin yojtaknej elok. Lajan eb axca unin tol c'am jabok is nabal, c'am jabok chi nachaj el yuj eb. Caw wal jelan eb yin yunen yobtakilal, palta man yojtakok eb chi yun pax watx'il, ẍi Cham.

Tzet ok yun lajwok ay conob

²³ Max wil wal tx'otx' tx'otx', tz'inan tx'otx'xac'al max yuncanok. Max wilon c'apax ajtok satcan, c'amxa sakk'inal bay tu'.

²⁴ Max wilon witzlak, toxac'al chi k'exi, c'al tzalanlak chi yucxi.

²⁵ Max wiloni tol c'amxa anima, axa masanil no tz'iquin mayal toj no' elajok.

²⁶ Max wilon c'apaxok, tol a awojlak mayal can yin tz'inanil, cax masanil conoblak mayal uchchajtok. Yuj yowal c'ul Jehová, xan caytu' max yuncantok masanil juntzan tu'.

²⁷ Max yalon Jehová axca ti': Masanil tx'otx' tx'otx' ok uchchajtok, palta man ok wak' lajwok ay yin junelnej.

²⁸ Caw wal cusc'ulalxac'al ok yuncan tx'otx' tx'otx' ti'; cusiltakxac'al yili c'apax bay satcan. Axca tu' ok yunej yujtol ayin max in nabalnej c'al walon elok. Man ok q'uexchajok, tamwal ok bekc'al yuneni, ẍi Jehová.

²⁹ A yet chi yaben masanil anima bil tit eb ibil oc is julbal ayaj yiban chej, chi elaj eb, cax chi toj eb c'ubaj el ba xolak te' c'al satlak ch'en. Yuj tu' tz'ininixac'al chi yuncan conoblak. C'amxa mac cajan bay.

³⁰ A Jerusalén tol mayal etaxtok, lajanxa chi yut ba axca junok ix ix tol nabaxac'al chi pich ba yetok an púrpura, cax chi yaoc ch'en oro manxa watx'ilok yili yin, cax k'ekxac'al chi yut bonon yinlak bak' sat. C'amxa jabok yelapnok yuj watx'nen aj ba tu', yujtol a eb winak ochebil yuj ix tu', mayal yajlaycan el ix yuj eb nak. Asan chi na eb nak tzet ok yun yak'on camok. Caytu' yayji Jerusalén yetok juntzanxa nación.

³¹ A eb aj Sión chi el yaw tu'. Caw wal chi wab yel yaw eb axca yel yaw junok ix ix yet chi jay is babel unin. Chi k'akwi eb, chi jaban el eb is k'ab, chi yalon eb: ¡Ay ok'bal on c'ul! ¡Ok on mak'lay cam yuj eb mak'om cam anima! ẍi eb.