Jeremías 37 - A Txꞌan Biblia Yin Kꞌanjobal 1989

Is tewilal Sedequías bay Jeremías

¹ Max alay oc Sedequías reyalok Judá yuj Nabucodonosor, reyal Babilonia. A Sedequías tu' is c'ajol Josías, max occan is q'uexelok Jeconías, is c'ajol Joacim.

² Palta majc'al cha yab Sedequías tu', yetok eb ayoc yin yajawilal yetok, tamwal eb yet conob max chaon yab is k'anej Jehová max chek Jeremías is chekbej yalon bay eb.

³ A cham rey Sedequías tu', max chektok Jucal is c'ajol Selemías yetok cham sacerdote Sofonías, is c'ajol Maasías, yet chi toj il-lay Jeremías is chekbej Dios, cax chi yalon eb bay: Txajlan bay Jehová co Diosal juj on, ẍi eb.

⁴ A yet tu' c'amto chi alay oc Jeremías preso, xan chito ec'jab xol conob.

⁵ Ac'ala' yet tu', max tit eb soldado cham reyal Egipto bay is conob. A yet max yabentek eb aj Babilonia oyan ec' yinlak Jerusalén k'umal eb, max el eb bay tu'.

⁶ Max k'anjab Jehová bay Jeremías, max chekon yal bay eb chekbiltok axca ti':

⁷ Alek bay reyal Judá, jun max ex chekontek ul e k'anlej ayin, tol a eb soldado yet reyal Egipto max tit colwaj e yetok yaloni, mayal meltzoj eb bay Egipto.

⁸ Yuj tu', ok meltzoj pax oc eb aj Babilonia yin Jerusalén ti' junelxa; ok ayc'ay jun conob ti' yuj eb, cax ok yaon oc eb is k'ak'al.

⁹ Axca wal ti' yalon Jehová: Manchak e yet k'anenej e ba, cax che yaloni tol mayal el eb soldado aj Babilonia co xol, man quex chiok. Man cayok tu' ok yunej.

¹⁰ Caxc'al mi ok je' e yuj e yak'on ayc'ay eb soldado lanan yak'on owal e yin tu', xan asan mi eb yasjinak ok cancan bay campamento eb tu', palta a eb, ok mi aj wan eb cax ok yak'on tz'a eb e conob ti', ẍi Jehová, cachi bay eb, ẍi Cham.

Ocnak Jeremías yul preso

¹¹ A yet max el eb soldado aj Babilonia bay Jerusalén, yujtol max yab eb tol lananxa jayoc eb soldado cham reyal Egipto,

¹² lanan yeltok cham Jeremías bay yul conobal tu', yet chi toj cha is satak yin tx'otx' tx'otx' yetok eb yican bay tx'otx' yul yet Benjamín yaloni.

¹³ A wal yet max apni oc bay puertail yet Benjamín xin, ay jun winak chi yik Irías is c'ajol Selemías, is yitxiquin Hananías, tol is yajawilal eb taynem puerta tu'. A jun tu' max mitx'on Jeremías, max yalon axca ti': —¡Ok ach oc yetok eb aj Babilonia tu'! ẍi nak.

¹⁴ Axa tak'wi Jeremías tu' axca ti': —¡C'amak, man ok in oc yetok eb aj Babilonia tu'! ẍi. Palta maj cha yab cham Irías tu'; a ti' yet, tol max ilaytok Jeremías yuj satak eb yajaw.

¹⁵ Max tit yowal eb tu' yin Jeremías, max chekon eb mak'layi, cax max toj yaon octok eb yul preso bay yatut Jonatán, cham ajtz'ib. A yatut tu' max oc yin presoal yuj eb.

¹⁶ Yuj tu xin, max tojcan Jeremías yul preso bay jun olan. Caw wal miman tiempo max ayji ec' cham bay tu'.

¹⁷ Axa cham rey Sedequías max ak'on orden, tol chi ilaytok Jeremías bay despacho. A yet max apni oc Jeremías bay satak cham rey tu xin, cax max k'anlen el bay yin ewantakil axca ti': —¿Ay mi junok is k'anej Jehová? ẍi bay. Max tak'wi Jeremías bay axca ti': —Ay toni. Caywal ti' yoc axca ti', mamin rey; ok ach ayc'ay yul is k'ab cham reyal Babilonia, ẍi Cham.

¹⁸ A wal yet jun bek tu' max k'anlen cham Jeremías bay cham rey Sedequías axca ti': —¿Tzet wal yetal yob max wun en, mamin rey, c'al yin eb et yajawilal, c'al yin conob, xan max quin a wal aytok yul preso?

¹⁹ ¿Tzet max yun yelapnok is k'anej juntzan chekbej max tec'ban ba yaloni tol man ok oc cham reyal Babilonia yak'on owal yin jun conob ti', c'al jin ayon ti'?

²⁰ Ab wal tzet ok wal xin, mamin rey, ak' wal ayin tzet yetal ok in k'an ayach ti': C'am chin a chatok junelxa bay yatut Jonatán, cham ajtz'ib, axa talaj chi yunej, a bay tu' chin cami.

²¹ Yuj tu xin, max yal cham Sedequías tol a tu' chi can cham Jeremías bay amak' bay ayic' eb taynem despacho, cax junjunc'al c'u chi ak'lay jun junok is pan chi tit bay eb watx'nem pan. Axcac'al tu' max yunej, yak'ban ayto ixim pan bay yul conobal, xan max cancan cham Jeremías bay amak' tu'.