Jeremías 36 - A Txꞌan Biblia Yin Kꞌanjobal 1989

A tx'an un max awtelay yuj Baruc yul templo

¹ A yet is can abil yoc Joacim, is c'ajol Josías yin reyal bay Judá, max yal Jehová bay Jeremías axca ti':

² Itek junok un bay chach tz'ibli, cax cha tz'iben masanil tzet yetal max wal yin Israel, yin Judá, c'al yin masanil nacionlak, yettaxc'al max in c'oli walon ayach yul is tiempoal Josías masantac'al tinani'.

³ Awtej yab eb aj Judá, talaj a yet ok yaben eb juntzan yailal chin na' wak'on yiban eb, ok bekcan eb is yob beybalil; axca tu xin ok wak' tanil is yobtakil eb yiban, ẍi Cham.

⁴ Max awtelay Baruc, is c'ajol Nerías yuj cham Jeremías. Max yal masanil tzet yetal max yal Jehová bay, yuj tz'iben yin tx'an un.

⁵ Cax max yalon cham bay axca ti': Ilwal ocok tzetbil wal wayji; axca tol chin tenlay oc wanaj in toj bay templo.

⁶ Yuj wal tu xin, a yet ok jay c'ual c'ajbanc'ulal junelxa, a yet tu' ok awtej aj tx'an un max wak' a tz'ibej, yet watx' a masanil eb conob ti', yetokc'al masanil eb anima cajan yul yet Judá chi jayoc cayti', ok yab eb is k'anej Jehová,

⁷ talaj c'uxan ok tewok eb anima ti' bay Cham, cax ok bekoncan eb is yob beybalil. Yujtol caw wal yelxac'al ay is may is yowal c'ul Cham, max na yaon oc yiban jun conob ti', ẍi cham Jeremías.

⁸ Cax max yunen Baruc masanil tzet yetal max yal cham Jeremías. Max toj bay templo, cax max yawten aj is k'anej Jehová tz'ibbil oc yin tx'an un tu'.

⁹ A yet balonebxa xajaw, yet is so' abilxa yoc cham Joacim, is c'ajol Josías yin reyal bay Judá, cax max naoni tol a eb anima cajan bay Jerusalén, yetokc'al eb max tit bay juntzanxa conoblak yul yet Judá, tol chi oc eb masanil yin c'ajbanc'ulal satak Jehová.

¹⁰ Max yawtej Baruc yab eb anima masanil is k'anej cham Jeremías, tz'ibbil yin tx'an un. Atac'al bay is cuarto cham Gemarías, cham ajtz'ib, is c'ajol Safán, max yawtej ajok. A bay jun amak' can ayaj bay templo, cawilal jun ac' puerta ay is cuarto Gemarías tu'.

A eb cham mimek yopiso max yab eb tx'an un

¹¹ A Micaías, is c'ajol Gemarías, is yitxiquin Safán, max yab masanil is k'anej Jehová max yawtej Baruc yul tx'an un tu',

¹² cax max toj bay is despacho cham rey, bay is cuarto cham ajtz'ib, bay wajan ec' eb cham caw wal mimek yopiso: a ton Elisama cham ajtz'ib, Delaía is c'ajol Semaías; Elnatán, is c'ajol Acbor; Gemarías is c'ajol Safán; Sedequías, is c'ajol Hananías, c'al yetok juntzanxa eb ayoc yin yikbej tu'.

¹³ Max yalon Micaías masanil tzet max yab yalon cham Baruc yet max yawten aj tx'an un bay satak conob.

¹⁴ A eb cham mimek yopiso tu' max chekon Jehudí, a ton is c'ajol Netanías, is yitxiquin Selemías yinatil Cus, yet chi yal bay Baruc tol chi ilaytek tx'an un max awtelay aj satak eb conob. Max yiontok cham Baruc tx'an un tu' satak eb.

¹⁵ Max yalon eb axca ti': —Ayan chotanok, cax chawten tx'an un tu' jabej, ẍi eb. Cax max yawtenc'al cham Baruc tx'an un tu'.

¹⁶ A wal yet max yaben eb tu', jun wal bek max xiwaj eb, max meltzoj oc t'anjab eb yin junjun, cax max yalon eb axca ti': —Yowalil ok jal masanil juntzan ti' bay cham rey, ẍi eb.

¹⁷ Max yalon eb bay cham Baruc axca ti': —Al ayon, tzet max ot a tz'iben masanil juntzan ti'. ¿A mi wal Jeremías max alon ayach? ẍi eb.

¹⁸ Max tak'wi cham bay eb axca ti': —A ton wal caw Jeremías max alon ayin, cax max in tz'iben yetok tinta yin tx'an un ti', ẍi.

¹⁹ Cax max yalon eb bay cham axca ti': —¡Chi toj a c'ubaj el a ba yetok Jeremías, cax c'amokab mac chi ojtaknen el baytal chex apni ocok! ẍi eb.

A tzet max yut cham rey Joacim tx'an un

²⁰ Max yak'oncan eb cham mimek yopiso tu' tx'an un bay is cuarto cham Elisama, cham ajtz'ib, cax max toj eb yalon masanil juntzan ti' bay cham rey bay yamak'il despacho.

²¹ Cax max cheklaytok Jehudí yuj cham rey yet chi toj yitek tx'an un aycan bay is cuarto cham Elisama. A yet max jayoc yetok tx'an un tu', cax max yawten aj satak cham rey c'al satak masanil eb ayoc yopiso tu', oyan ec' eb yabeni.

²² Balonebxa xajaw yet tu', xan ayic' cham rey bay is cuarto chi k'an yet tiempoal sic. Ayoc jun k'ak' yul netal tzak'ak' bay is satak.

²³ A yet max lajwi yawten Jehudí oxeb, ma caneb makan yul tx'an, cax max coc' c'upnentok cham rey janic' tx'an max awtelay tu' yetok jun cuchillo chi k'an eb ajtz'ib, cax max yaon octok bay xol k'ak' tu'. Caytu' max yun yak'on tz'a masanil tx'an un tu'.

²⁴ Caxc'al max yab cham rey, c'al eb ayic' yetok tu', tzet max yal tx'an un tu', maj xiwaj eb tamwal max tx'oxil eb tatol ya' yoc chi yab eb.

²⁵ A Elnatán, Delaía c'al Gemarías max tewi oc eb bay cham rey yet c'am chi tz'a tx'an un tu', palta majxac'al cha yab tzet max yal eb.

²⁶ Palta max yal bay Jerameel is yinatil eb rey, c'al bay Seraías is c'ajol Azriel, c'al bay Selemías is c'ajol Abdeel, yet chi c'al-laytek cham Jeremías yetok is yajtz'ib, a ton cham Baruc. Axa Jehová max c'uban el eb.

Junxa tx'an un max tz'ibelayi

²⁷ Yet mayal ak'lay tz'a tx'an un yuj cham rey, tx'an bay ayay juntzan k'anej max yal cham Jeremías bay Baruc, max k'anjab pax Jehová bay cham Jeremías, max yalon axca ti':

²⁸ Itek junokxa tx'an un cax cha tz'iben juntzan k'anej max a tz'ibej yul tx'an yet babelal tu', tx'an max yak' tz'a Joacim is reyal Judá.

²⁹ Al c'apax juntzan k'anej ti' bay Joacim: Axca wal ti' yalon Jehová: Ach ti', tol max ak' tz'a tx'an un, cax max a tzuon Jeremías, yujtol max tz'ibej yul tx'an, tol ok jayoc reyal Babilonia ul yak'on lajwok nación ti', cax c'amxa junok anima ok canok, tamwal junok no no'.

³⁰ Yuj tu xin, ayin wal caw Jehová in chi wal ayach Joacim, ach reyal Judá, tol c'amc'al junok enatil ok ayjok ec' bay is trono David. A a mimanil ok elcantok telan xol yakan c'u, c'al xol sic yet ak'balil.

³¹ Ach ti', yetokc'al enatil yetok c'apax eb ayoc yikbej etok, ok waoc yailal e yiban yuj e mul. Ok ayc'ay yiban Jerusalén, c'al yiban Judá juntzan yailal mayal walcan el ti', a ton juntzan k'anej maj e cha e yabej, ẍi Jehová, cachi, ẍi Cham.

³² Lajwi tu xin, max yiaj cham Jeremías junxa chulan tx'an un cax max yak'on bay Baruc, is yajtz'ib. A' max tz'iben masanil tzet max yal cham Jeremías tu', chi yal elapnok, a ton juntzan k'anej tz'ibbil yul tx'an max nil tz'a cham rey Joacim. Ayto tz'akil tzet max yal Jeremías max oqui.