Jeremías 34 - A Txꞌan Biblia Yin Kꞌanjobal 1989

K'anej max al-lay bay rey Sedequías

¹ A Nabucodonosor, cham reyal Babilonia, max tit yetok masanil is soldado c'al eb titnak bay masanil nacionlak tol ayoc yul k'ab. A max yak' owal yin Jerusalén, c'al yin juntzanxa conoblak ay bay is cawilal tu'. A yet tu' max k'anjab Jehová bay Jeremías, max yalon axca ti':

² Ayin Jehová e Diosal in, chi wal ayach, tol chi toj al bay Sedequías reyal Judá: Axca wal ti' yalon Jehová: Ok waoc jun conob ti' yul k'ab reyal Babilonia, a' ok aon oc is k'ak'al.

³ Ach ti', manxa ok je' elajok; ok ach mitx'lay yuj eb, ok ach yaon oc eb yul k'ab Nabucodonosor tu'; a yet ok lajwok elon oc yin, cax ok k'anjab cham ayach, axa elaytok bay Babilonia tu'.

⁴ Axa ach Sedequías, ab wal tzet ok wal ayin Jehová in ti': Man ok ach mak'lay cam yuj espada,

⁵ yin masanc'ulalil ok yun a cami. Ayin wal caw Jehová in chi wak' in ti', tol axca max yun yak'on tz'a eb anima incienso yet max mukay eb echmam, a ton eb ocnak yin reyal yet c'amto chach oc ach ti', axca tu' ok yun yak'on tz'a eb incienso yet ok ach muklayok. Ok ok' eb oj, ok yalon eb axca ti': ¡Ay, mayal cam co reyal! ẍixac'al mi eb, ẍi Jehová, cachi, ẍi Cham.

⁶ A cham Jeremías, chekbej Dios, max yal masanil juntzan ti' bay cham rey Sedequías bay Jerusalén.

⁷ Yak'ban tu', a eb soldado yet Babilonia ayxa oc eb yak'on owal yin Jerusalén, yin Laquis c'al yin Azeca. Xol masanil conoblak watx' yoc is murallail yul yet Judá, asanxanej juntzan conob ti' c'amto chi ayc'ayi.

Jun trato yuj bekbanilal eb yet conob ayoc yin mosejal

⁸ Lajwi tu' max k'anjab pax Jehová bay Jeremías, yet mayal lajwi yak'on Sedequías jun trato yetok eb cajyom bay Jerusalén, yet chi beklay el eb eb ayoc yin mosejal.

⁹ A max yun jun trato tu', tol a masanil eb tol a yet israelal ayoc is mosook, tol chi beklay el eb, caxc'al winak, caxc'al ix, yet watx' c'amxa junok eb yet conob eb, chi occan is mosook.

¹⁰ Masanil eb yajaw, c'al yetok masanil eb conob, max cha c'ul jun trato tu'; caytu' max yun bekon el eb is moso. Majxa ak'lay pural eb mosejal tu' yin yak'lay serbil eb yuj eb.

¹¹ Lajwi tu' max naon pax ba c'ul eb yuj max bekil eb is moso, xan max yak' pax pural eb is moso tu' yin yoc pax eb ak'oj serbilal bay eb junelxa.

¹² Yuj tu xin, max k'anjab pax Jehová bay Jeremías, max yaloni:

¹³ Ayin Jehová e Diosal in, max wak' jun in trato yetok eb e yichmam ayex ti', yet max wion eltek eb bay Egipto, bay chi ak'wi serbil eb axca wal mosejal. A yet tu' max wala',

¹⁴ tol yin ukuktak abil cax chi bekon el eb is moso, a ton eb yet israelal, eb max txon ba bay eb, tol mayal ak'lay serbil eb yuj eb yin wakebok abil. Palta a eb e yichmam tu', maj cha' yab eb tzet max wala', tamwal max yikej eb.

¹⁵ Axca tu' max e yun pax ayex ti', palta che q'uex e beybal, yujtol lananxa e yunen tzet yetal chi cha' in c'ul, a ton yin e bekon el eb e yet conob ayoc e mosook. Max e yak'on e ti' yin jun trato max e watx'nej in satak, a ton bay yul templo tol wet yayji ocok.

¹⁶ Max lajwi tu', max e q'uexon pax e beybal junelxa, max in e yintaknej pax elok. Max e yak'on pax pural eb e moso tu' yin e yak'lay serbil yuj eb junelxa, caxc'al tol mayal e bekil eb.

¹⁷ Yuj tu xin, xan ayin wal Jehová in chi wala': Ayex ti', maj e yikej bay tzet chi wala'; ilab tol maj e bekil eb e yet conob yin bekanilal. Yuj tu xin, xan ayin wal caw Jehová in chi wala' tol ok in bektok owal, wajil, c'al ilya' e yiban; axa masanil nacionlak caw wal ok xiwajok yet ok yaben eb tzet ok ex wutej.

^18-19 A eb yajaw yayji bay Judá, c'al bay Jerusalén, yetokc'al eb chekbej yayji bay despacho, yetok eb sacerdote, c'al yetok masanil anima aj conob yayji bay tu', max yak' eb jun trato in satak. Ca makan max yut pojon ay eb jun no wacax, max ec'tok eb nan xol no ca makanil tu'. Palta yin wal aymanil max yintaknej el eb jun trato bay max yak' eb is ti' tu'. Xan caytu' ok wut eb, axca max yut eb no wacax tu'.

²⁰ Ayin wal ok wak' ayc'ay eb yul k'ab eb ajc'ul oc yin eb, tol ok ak'lay cam eb yuj eb, xan a no ostoc, c'al no chiwajwom no' ok chiontok is mimanil eb.

²¹ Ayin ok wak' c'apax yunej, xan a Sedequías reyal Judá c'al yetok eb ayoc yin yajawilal yetok, ok ayc'ay eb yul k'ab eb ajc'ul, eb chi yochej chi ak'on cam eb. Ok ayc'ay eb yul k'ab eb soldado yet Babilonia, caxc'al mayal ex beklaycan yuj eb.

²² Ayin wal caw Jehová in chi wala', tol ok wak' jay pax eb yin jun conob ti' junelxa, axa yak'on eb owal yin. Ok ayc'ay yuj eb, ok yaon oc eb k'ak'al. Cax ok wak'on wal yunej, tol a juntzanxa conoblak bay yul yet Judá, ok cancan yin tz'inanil; c'amxa junok anima ok cajay bay, ẍi Cham.