Jeremías 33 - A Txꞌan Biblia Yin Kꞌanjobal 1989

Albenal yipc'ulej yayji

¹ A yet aytoc'al oc Jeremías yin presoal bay amak' bay ayic' eb taynemal despacho, max k'anjab pax Jehová bay junelxa, max yaloni:

² Ayin Jehová in max in watx'nej ay yich tx'otx' tx'otx' ti', watx' max yun cancan tx'otx'. Ayin chi wal ayach:

³ Awtej in, ok in tak'wok ayach, cax ok walon el tzet yetal tol ayxamay yayji ocok, c'ayubtakxac'al yoqui, tol man ojtakok.

⁴ Ayin Jehová e Diosal in, ay wal jun in k'anej yin yatut eb aj Jerusalén, yetokc'al yin yatut eb reyal Judá, tol lanan yuchlay ayok, yet chi k'anlay is ch'enal yin watx'jubal aj muralla can bay chi oc walubej, c'al bay yarma eb caldeo lanan yak'on owal e yin.

⁵ A juntzan na tu', toxac'al ok nojil yuj mimanil eb anima ok in mak'cam yuj yowal in c'ul tol ayxa may yayji ocok; yujtol mayal wiel in sat yin jun conob ti', yujc'al wal tol xiwilxa is yobtakilal eb mayal yaocok.

⁶ Palta ok wantej eb, ok wak'on is cawil eb junelxa, cax ok wak'on yun eb tol yin watx'ilal ok ayjok eb yin tol c'amxa tzet ok on eb.

⁷ Ok wi meltzojtek eb aj Judá, c'al eb aj Israel junelxa bay ayoc eb yin presoal, cax ok in ca watx'nen aj is conoblak eb junelxa, axca ta' yayji.

⁸ Ok wiel is yobtakil eb. Ok wak' tancan el is yobtakilal eb tu', yetokc'al jantak is tenomtakilal eb ayin.

⁹ Lajwi tu xin, caw wal ok tzalojbok in c'ul yuj Jerusalén ti'. A wal yet ok yaben masanil eb nacionlak yuj mimek tzet yetal ok wun yin in conob ti', ok yal wal eb watx' k'anej ayin c'al in mimanbilnen eb. Toxac'al ok c'ayaj c'ul eb c'al bilaj eb yuj xiwc'ulal yet ok yilon eb tol ayxamay ok yun yaj can Israel wuj, c'al junc'ulalil ok wak' bay, ẍi Cham.

¹⁰ Max yalon pax Jehová axca ti': Ayex ti' che yala', tol a jun makan tx'otx' ti', ayxacan yin tz'inanil, c'amxa anima tamwal no no' chito il-lay yin, quex chi. Caxc'al mi caytu' yayji, tol a bay calleal Jerusalén, c'al bay conoblak yul yet Judá, tz'ininixac'al yili, c'amxa anima tamwal no no' ayic'ok.

¹¹ Palta axa ok yunej, ok ablay yoc bit yet k'in, c'al yet tzalojc'ulal junelxa, c'al bit yet eb ach'ej c'al eb k'opoj yet lanan nupay eb. Ok ilaytek ofrenda yet aloj yuj diosal bay templo, cax ok ablay c'apax yalon eb: Alek yuj diosal bay Jehová Cham Yajaw yin Masanil, yujtol yelxac'al watx' Cham, yujtol a is camc'ulal ayc'al yin tojbalk'inal, ẍi eb ok yalon eb. Ayin wal caw Jehová in chi wala', tol ok wiaj can jun conob ti', yet watx' ok yun pax eb junelxa axca yayji eb yet yichbanil, ẍi Cham.

¹² A Jehová Cham Yajaw yin Masanil chi alon axca ti': A bay jun tx'otx' tol tz'inan yayjican oc ti', c'amxa anima, c'amxa no no' bay masanil; palta axa ok yunej, a yinlak juntzan conob ti' ok il-lay low no calnel yuj eb ilom calnel junelxa.

¹³ Ayin wal caw Jehová in chi wala', tol a bay conoblak bay siquilal tx'otx' c'al bay ac'al-lak, yetokc'al bay Néguev, c'al bay tx'otx' yet Benjamín, yetokc'al bay aldealak yinlak Jerusalén, c'al yetok bay juntzanxa conoblak bay yul yet Judá, ok il-lay yin eb ilom calnel junelxa, cax ok ablay bison eb is calnel, ẍi Cham.

¹⁴ A wal caw Jehová chi alon axca ti': Ok apnok c'ual, cax ok yunen axca bay max wak' in ti' wak'on yaxilal bay conob Israel c'al bay Judá.

¹⁵ A wal yet ok apnok oc jun tiempoal tu', ok waoc junok yinatil David yin reyal; a wal ok ion aj can tojolal c'al watx'ilal bay jun nación ti'.

¹⁶ A yet tu', a eb aj Judá ok colchajok; axa eb aj Jerusalén, c'amxac'al tzet ok on eb; caytu' ok yun yak'lay yik jun conob ti' axca ti': A Jehová chi watx'nen el co k'anej yin tojolal, ẍi eb.

¹⁷ Ayin Jehová in chi wala': C'am yechel tol ok c'ayaj yinatil David palta tol ac'al eb ok ay chotan bay trono bay Israel.

¹⁸ Man ok c'ay c'apax el eb sacerdote yetokc'al juntzanxa eb yinatil Leví; a eb tu' ok ak'on tz'a xajanbal ayin. Yin junjun c'u ok yak'on tz'a eb ixim trigo yin xajanbalil, c'al yak'on eb juntzanxa xajanbal ayin, ẍi Cham.

¹⁹ Max k'anjab Jehová bay Jeremías, max yalon axca ti':

²⁰ Ayin Jehová in chi wala': Ay jun in trato max wak'a' tol ay c'ualil c'al ak'balil yin is tiempoal. C'am chi je' q'uexchaj jun trato tu'.

²¹ Caywal tu' c'apaxok, c'am chi je' tol chi c'ayil in trato max wak' yetok in chekbej David, yin tol ayc'al is yinatil ok ayjok ec' yin yak'on yajawilal bay is trono. Tamwal chi je' c'ay c'apax in trato yetok eb yinatil Leví yin in yak'on serbil eb yin sacerdoteal.

²² A yinatil in chekbej David, c'al yinatil eb wak'omal serbil yin yinatil Leví, a eb tu' ok wi wal aj can is bisil eb axca waycan, ma axca wal yarenail ti a' mar, tol c'am mactxel chi bischaj yuj, ẍi Cham.

²³ Max k'anjab Jehová bay Jeremías; max yalon axca ti':

²⁴ ¿Tom c'am chi nachaj el oj tzet chi yal eb anima, tol max wintaknej el ca makan inatilej sic'bil el wuj, a ton Israel yetok Judá? Yuj tu' xan c'amxa yelapnok eb in conob tu' bay eb, tok wal nacionto yayji yul sat eb.

²⁵ Ayin Jehová in ti' max in watx'nej jun in trato yetok c'ualil c'al yetok ak'balil, cax chi wiloni, tzetbil chi yun bey satcan, c'al sat tx'otx' ti', cax c'am chi q'uexchaj jun trato tu'.

²⁶ Tamwal ay bak'in ok q'uexchaj in trato yetok eb yinatil Jacob, c'al yetok eb yet in chekbej David. Yowalil tol ok in siq'uiltek junok yinatil David tu', tol ok yajawbok yiban eb yinatil Abraham, Isaac c'al Jacob. Yujtol caw wal ay in yabenc'ulal yin eb, xan ok wiaj can eb junelxa, ẍi Cham.