Jeremías 29 - A Txꞌan Biblia Yin Kꞌanjobal 1989

Carta cham Jeremías bay eb ibiltok yin presoal

¹ A cham Jeremías is chekbej Dios, max yatok jun carta bay eb yicham winakil conob iquisto ec'ok, c'al bay eb sacerdote, c'al eb chekbej Dios, yetok bay masanil anima aj Jerusalén ibiltok yuj Nabucodonosor bay Babilonia.

² Max tz'ibejtok jun carta ti' a yet mayal ilaytok cham rey Jeconías yin presoal, yetok xal reina is txutx, yetok eb ay yopiso bay despacho, yetok eb yajaw yayji bay Judá c'al bay Jerusalén, eb watx'nem tzetak yetal, c'al yetok eb tenom ch'en.

³ Max ilaytok jun carta ti' yuj Elasa is c'ajol Safán, yetok Gemarías, is c'ajol Hilcías, a ton eb ti' max cheklaytok yuj Sedequías, reyal Judá, bay Babilonia, bay cham rey Nabucodonosor. A tx'an carta tu' chi yal tx'an axca ti':

⁴ Axca wal ti' yalon Jehová, Cham Yajaw yin Masanil, a ton co Diosal ayon Israel on ti', bay masanil eb aj Jerusalén max yak' Cham ilaytok yin presoal bay Babilonia:

⁵ Watx'nejek e na, cajayanek, awek te awbejal te', che loon sat te'.

⁶ Iek e yetbi, cax chi el e yuninal; axa eb e yuninal tu', ocokab yetbi eb, cax chi elc'al yuninal eb, tol chex ajc'al can, c'amokabc'al chi aytek e bisil.

⁷ Colwajanek yuj is watx'ilok jun conob bay max ex watok tu'. K'anek in colwal yiban, yujtol ta caw wal watx' yayji jun conob tu', tuton wal watx' c'apax ok yun e yayji ec' ayex ti'.

⁸ Yujtol ayin Jehová, Yajaw in yin Masanil, e Diosal in, chi wal juntzan ti': Manchak e yak' e ba etnelay yuj juntzan eb lek'ti chekbej, c'al eb naom el k'anej yaloni. Manchak e cha e yab is wayich eb chi yala'.

⁹ A tzet chi yalil eb yin in bi tu', naba lek'tial. Ayin caw Jehová in chi wala', tol mayinnak max in chek yal eb.

¹⁰ Chi walon c'apaxok: A yet ok tz'aknaj 70 abil yikbej Babilonia tu', ok wak' in watx'c'ulal e yin, cax ok wak'on yun bay max wak' in ti' yuj ex wak'on meltzojtek cayti' junelxa.

¹¹ Ayin wal caw Jehová in chi wala', tol wojtak tzet yetal nabil wuj e yin. A tzet nabil wuj tu', man yujok e yaben yatakilal; palta yuj e watx'ilok, yet watx' ay wal tzet ayoc yipok e c'ul yet yajtok tu'.

¹² Lajwi tu xin, ok ex tewok ayin, ok ex jayoc ayin yetok e txaj, cax ok waben e txaj tu'.

¹³ Ayin wal caw Jehová in chi wala', tol ok ex jayoc ayin, ok in tx'ox in ba ayex, yujtol ok e yaoc e ba yul in k'ab yin masanil e c'ul.

¹⁴ Ok in tx'oxc'al in ba ayex; ayin wal caw Jehová in chi wala', tol ok in q'uex tzet yetal ayoc e yiban. Ok ex witek bay masanil yulak nación, c'al bay masanil bay max ex in saklemnejcantok. Ok ex in wajbaj ocok, ok ex wion meltzoj paxtek bay cajan ex ec' yet max ex ilaytok, quin chi.

¹⁵ Ayex ti' che yala': Ayxa eb chekbej Jehová ayon bay Babilonia ti', quex chi.

¹⁶ Palta chi yal Jehová axca ti' yin cham rey ayic' bay yul is trono David, c'al yin eb cajan bay jun conob ti', a ton juntzan e yicanto e ba yetok, tol maj ilaytok e yetok yin presoal:

¹⁷ Ayin Jehová, Yajaw in yin Masanil chi wala': Ok watok owal, wajil, c'al ilya' xol eb tu'. Lajanxac'al ok yuncan eb wuj axca juntzan higo tol k'ayilxa, yelxac'al yobxa, xan c'amxa chi je' chi lolayi.

¹⁸ Ok wuktej ec' eb yetok owal, yetok wajil, c'al yetok ilya'. Cax ok wak'on wal yun masanil nacionlak, tol ok yajlay eb yuj eb. Ok jay catab yiban eb, ok xiwaj eb anima yuj eb, yet ok yilon oc eb. Ok buchwaj eb yin eb, c'al bajlay eb yuj juntzan nacionlak bay ok in saklemnejcantok eb.

¹⁹ Ayin wal caw Jehová in chi wala', tol maj cha eb yab tzet yetal max in chek yal eb in chekbej yin xiwil elal. Ayin wal caw chi wala', tol maj c'apax wal e cha e yab ayex ti'.

²⁰ A ayex masanil ex aj Jerusalén, max ex wak' ilaytok yin presoal bay Babilonia, abek wal in k'anej chi wala'.

²¹ Ayin Jehová, Yajaw in yin Masanil, e Diosal in, chi wal yin Acab c'ajol Colaías, c'al yin Sedequías c'ajol Maasías, a ton eb chi alon juntzan lek'tial k'anej yin in bi: Ok wak'on ayc'ay eb yul k'ab Nabucodonosor, reyal Babilonia, a jun tu' ok mak'on cam eb e satak ayex ti'.

²² Yuj tu xin, ta ay junok ex aj Judá, ex max ex ilaytok bay Babilonia, che yochej che catabnej junokxa mactxel, ok e yaloni: Yunokab Jehová etok, axca wal max yun yetok Sedequías c'al Acab; a eb tu' max chek Nabucodonosor yak'lay tz'aok, quex chi mi.

²³ Axca wal tu' ok yun jayoc yiban eb, yujtol yelxac'al yob tzet max yun eb bay yul e conobal. Max yun eb mulej yetok yistzil eb yet conob. Max yalon eb juntzan lek'tial k'anej yin in bi, tol mayinnak max in chek yal eb. Ayin wal caw Jehová in chi wala', tol wojtak wal tzet yayji ocok, ẍi Jehová ẍitok Jeremías yul is carta.

Jun k'anej bay Semaías

^24-32 Ay jun winak aj Jerusalén ayic' bay Babilonia, a ton jun chi yik Semaías aj Nehelam. A jun tu', yulc'al yet max yaontek jun carta bay masanil eb anima cajan bay Jerusalén, c'al bay cham sacerdote Sofonías c'ajol Maasías, yetokc'al bay juntzanxa eb sacerdote. A bay yul jun carta tu' max yaltek bay Sofonías axca ti': A Jehová max ach aon oc yin sacerdoteal yin is q'uexelok Joiada, yet watx' tol sat ikbajwom ach bay templo. Tatol ay mac chi jayocok axca tol chabil oybinak sat yuj, cax chi c'oli k'anjab elok axca tol chekbej Dios yaloni, ach ti' yowalil chaoctok yul cepo, cax cha c'alban yetok cadena. ¿Tzet yuj xan tol maj a tenchanej Jeremías aj Anatot, tol max tec'baj ba k'anjab a satak axca wal tol chekbej Dios? Toltax max yatek jun carta ayon bay Babilonia ti'. Chi yalon yul tx'an axca ti': Mimantoc'al tiempoal ok ex ayjok bay tu'; watx'nejek e yatut, watx'nejek ay e ba, awek te awbejal te' cax che loon sat te', ẍitek Jeremías tu' ayon, ẍi is carta Semaías. A cham sacerdote Sofonías max awten aj tx'an carta tu' bay Jeremías. Lajwi tu xin, max k'anjab Jehová, Cham Yajaw yin Masanil, Cham Diosal Israel, bay Jeremías, max yalon axca ti': Altok bay Semaías aj Nehelam c'al bay masanil eb aytok yin presoal, tol ayin chi wala': A Semaías aj Nehelam max alon ayex, tol ayin max in chek yala', palta mayinnak max in cheka', max yaon oc nak jun lek'tial k'anej yipok e c'ul. Ayin wal caw Jehová in chi wala', tol ok wak' yailal Semaías tu', c'al yetok is yinatil. C'am junok yinatil ok ayjok ec' xol in conob. Ayin wal caw Jehová in chi wala', tol man ok yak' tzalojbok c'ul yin in watx'c'ulalil ok wak' ayex, yujtol a yuj is k'anej tu', xan a' max ex iptzen yin e pitnen e ba ayin, quin chi, cachitok, ẍi Jehová bay Jeremías.