Jeremías 2 - A Txꞌan Biblia Yin Kꞌanjobal 1989

Is tenomtakil conob Israel

¹ Max yalon pax Jehová ayin:

² Asi', cax chalon el bay eb aj conob Jerusalén yet chi yab eb: Axca ti' yalon Jehová: Chin nawaltek e yikemal yet max ex wion oc in conobok. Caw wal ay e camc'ulal win, axca junok k'opoj tolto max nupayi, caw wal ay is camc'ulal yin yichamil. Max ex occ'al tzakan wintak bay takin tx'otx', bay jun makan tx'otx' tol c'am junok mac chi mulnaj bay.

³ A yet tu' wetc'al e yayji ayex israel ex ti', axca wal babel sat awoj. Ayin caw Jehová in chi wala' tol tzanc'al mac max low k'ab e yin, max oc is mul. Ayin max waoc yailal yiban, ẍi Jehová, cachi bay eb, ẍi Cham.

⁴ E masanil ayex ti' yinatil ex Jacob, tribual ex israel, abek wal tzet chi yal Jehová:

⁵ ¿Tzet yetal man watx'ok max yil eb e yichmam win, xan tol max elcan eb wintak? Max toj eb yintak juntzan dios c'am yelapnok, xan c'amxac'al jabok yelapnok max yuncan el eb.

⁶ C'amxa wal janic'ok max na' eb meltzojtek ayin, caxc'al ayin max wieltek eb bay Egipto, cax max wikban eb bay takin tx'otx', a ton bay takin tx'otx' jotx'lak yeq'ui, bay c'am aej, ayxa is may yeq'ui. C'am mac chi ec' bay tu', c'am mac cajan.

⁷ Ayin max witek eb bay jun tx'otx' caw wal yax sat ti', yet watx' chi lo eb sat awoj caw wal watx' chi el sat tx'otx'. Axa pax ayex yinatil ex eb tu', cajan ex bay sat in tx'otx' ti', cax max e yetnen elok. E yuj wali xan c'amxa chi cha' in c'ul jun in tx'otx' ti'.

⁸ A eb sacerdote, majxac'al jayoc eb ayin. A eb e cuyomal, majxa in yojtaknej el eb. A eb yajawil e conob, max oc eb ajc'ulal win, axa yin is bi Baal max k'anjab el eb in chekbej. Max tzakloj eb yintak comon dios tol c'am yopiso.

A tzet chi yal Jehová yin conob Israel

⁹ Ayin caw Jehová in chi wala' tol ok wak' owal e yetok, c'al yetok eb e yinatil.

¹⁰ Asek bay Chipre, bay yetc'ulal yayubc'u, cax chi cam e yiloni. Chekektok e chekbej bay Cedar, bay yichcan, cax chi toj wal yiloni ta ayxa bay max uj jun ti'.

¹¹ Ta ay junok comon nación mayal yiel ba yintak is diosal, caxc'al a juntzan is diosal eb tu' man yelok tol acaw Dios. Axa laj ayex ti', ex in conob, chin e bekcanok, tol e mimanbilal wayji. Yintakxa comon dios c'am yelapnok chex tojcanok.

¹² Yuj wal tu' ayin Jehová in chi wal bay satcan, tol c'ayokab aj c'ul yin yilon jun miman yobtakilal ti'.

¹³ A in conob ti' cab wal makan is mul max oqui: max in beklaycan yuj eb axca nuk' aej tol chi ajolok, caytu' wayji. Max watx'nej eb is dios tol axca c'ob aej tol jatilxa, c'am chi wajnaj a' yul, axca tu' yayji, quin chi bay satcan tu'.

A tzet max yun yeloc is tenomtakil conob Israel

¹⁴ A conob Israel tu' man mosejalok, man yinok mosejal max yun yalji. ¿Tzet yuj xan chi etnelay eb axca mosejal?

¹⁵ ¿Tzet yuj chi oc nacionlak yin, axca no coj? Chi el yaw eb yin. Caw wal chi etaxtok is conob eb yuj, chi nis tz'aok. C'amxa mac chito cani.

¹⁶ A eb winak aj Menfis, yetok eb aj Tafnes, max tzukil eb xil e jolom,*fn* ayex israel ex ti'.

¹⁷ A wal juntzan ti' max jayoc e yiban yujtol max in e bekcanok, ayin Jehová e Diosal in tol chex wikbaj yulak be.

¹⁸ A tinani' ¿tzet yetal ok e yi' yuj chex toj bay Egipto yuj e yuq'uen jabok a' Nilo? ¿Tzet yetal ok e yi', xan chex toj bay Asiria yuj e yuq'uen jabok a' Éufrates?

¹⁹ Ayin wal caw Jehová, Yajaw in yin Masanil chi wala', tol ac'al oc e mul ok aon oc yailal e yiban. A e tenomtakil ok ak'on low e yin. Ojtaknejek elok, tol caw wal yob yuj max in e bekcanok, ayin Jehová e Diosal in, tol chi waoc yatakilal e yiban yuj c'am wal jabok welapnok yul e sat.

Is tenomtakil conob Israel

²⁰ Ataxc'al yet yalantok max c'olic'al yoc e tenomtakil ayin. Maj yal e c'ul max e yikej ayin. Max e yaloni: C'am chi yal co c'ul chach jak' serbil, quex chi. Asanxanej yin ajmulal che yatok e ba bay tzalanlak, c'al bay yichlak te' tol caw wal ay yenel.

²¹ Axca wal uva caw wal watx' max yun ex wawoni, axca wal yinatil uva tol watx'. ¿Tzet yuj xan tol lajanxac'al chi yun e yeloc axca junok xolakteal uva?

²² Ayin wal caw Jehová in chi wala': Caxc'al che tx'aj e ba yetok yal tan, cax che k'anon mimanok xapon, palta a e mul tu', ayc'al ec' in satak; c'am yechel chi je' e sakbi elok.

²³ ¿Tzet wal ok yun e yaloni: C'amc'al chi jetnejtok co ba yin joc ayilal bay comon dios? quex chi mi laji. Chi cam e naoni, tzet max e yut e beybal bay jobe. Chi cam e naon tzet max e yunej. Toc'al chex ec'jabtok axca junok no txutx camello.

²⁴ Lajan ex wal axca junok no xolakteal txutx burro tol k'ajan yec' bay tz'inan tx'otx' tol chi suk'tej cak'ek'. A yet elnak no' sakchi, tok ay mac chi je' tenon oc wanajok. Tokwal okto c'unbok junok no mamej yec' yintak yet ayoc yin is tiempoal.

²⁵ Ex aj Israel, bekek e yec'jabtok yin e sayon ec' e diosal. Nabac'al chi lajwitok e yakan, c'al tak e ti' yin e yec'jabtok tu'. Palta ayex ti' che yala': C'amak; ayoc co nabal yin juntzan comon dios, xan ok on tokc'alta' yintak, quex chi.

Moj wal conob Israel yion yailal

²⁶ Axca wal q'uixwi aj junok elk'om yet chi ilchajtek, axca wal tu' ok yun q'uixwi aj conob Israel, a ton masanil eb conob tu', yetok eb rey, eb yajaw, eb sacerdote, yetokc'al eb in chekbej.

²⁷ Tol co mam ach, ẍi wal eb bay junok te te', cax chi yalon c'apax bay junok ch'en ch'en: Tol co txutx ach, ẍi wal eb. Axa pax ayin xin, a wal yichin eb chi yacbajcantek. C'amxa wal chi tit t'anan eb jabok win. Axa wal yet chi yilon eb tol ay tzet ok onok: Sebach, colwajan, ẍinaj pax eb ayin.

²⁸ Ex aj Judá, ¿baytal ayoc juntzan comon dios max e watx'nej? Axca wal bisil e conobal, caytu' yayji e diosal. Jayokab oc juntzan tu' ex ul yiloni, ta chi je' ex colon yet chi jayoc junok yailal e yiban.

²⁹ Ayin wal caw Jehová in chi wala': ¿Tzet yuj xan che yal win tol c'am chex in colo'? Ilab tol e masanil tenomtak ex ayin.

³⁰ Nabaxac'al chi waoc yailal e yiban, c'am chi yal e c'ul che yikej cuybanilej chi wak'a'. Lajan ex wal axca no coj yelxac'al ay is may, max e mak'cam eb in chekbej.

³¹ Ex aj Israel, taynejek e yab in k'anej. ¿Tom axca wal junok takin tx'otx' wayji ayex? ¿Ma axca wal junok tx'otx' tol ay is may? Ex in conob, ¿tzet wal yuj xan che yal axca ti': Jet co ba, c'amxa yechel ok on meltzoj ayach? quex chi wali.

³² ¿Chi mi wal toj c'ayc'ulal yuj junok ix ix is pichil chi ak'lay bay yuj is nupayil? Akxa wal ayex ti', chin tojxac'al can c'ayc'ulal e yuj.

³³ Axca eb ix ajmul ix yojtak eb beal bay chi toj eb sayic' winak, cay ex wal tu'. Meẍtol ex yin yobtakil.

³⁴ Tol chic'takxac'al e pichil yuj is chiq'uil eb meba' c'al eb c'am is mul. Manak eb lanan yelk'anwi che mak'camok.

³⁵ Caxc'al mi axca tu', palta chitoc'al e yala': Caw wal watx' on, c'am co mul, c'amxa yowal c'ul Dios jin, quex chi. Ayin Jehová in ti' ok waoc yailal e yiban, yujtol c'am che yojtaknej el e yobtakil.

³⁶ ¿Tzet yuj xan chex ocxac'al il e q'uexon eb chi colwaj e yetok? Axca wal max yun e q'uixwican aj yuj eb aj Asiria, yuj maj ex col eb, caywal tu' ok yun e q'uixwi pax can aj yuj eb aj Egipto.

³⁷ Q'uixawtak exxac'al cax ok ex meltzojtek bay Egipto, yujtol mayal wintaknej el eb che yaoc yipok e c'ul tu'. Tok ay tzet ok e yi' yuj watx'xac'al e yak'on yetok eb, ẍi Jehová, cachi, ẍi Cham.