Jeremías 19 - A Txꞌan Biblia Yin Kꞌanjobal 1989

Cuybanilej yin tx'otx' pojil moc

¹ Max yalon Jehová ayin axca ti': Chi toj a man junok tx'otx' moc, cax chawten c'apaxtek eb yicham winakil conob etok, c'al yetok eb sacerdote tol icham winakxa.

² Cax chach toj bay jobeal yet Ben-hinom, bay puerta bay chi eq'uel eb chi bet ak'oj k'alem; a bay tu' ok al masanil k'anej chi wal ayach ti'.

³ Al bay reyal Judá, c'al bay eb cajyom bay Jerusalén axca ti': Abek wal is k'anej Jehová e Diosal, Cham Yajaw yin Masanil: Abek, ok wawaltok jun miman yailal yiban jun e conob ti'; a masanil mac ok abenok, toxac'al ok c'aycan aj c'ul eb yuj.

⁴ Yujtol max in e bekcanok, cax max e yuten jun tx'otx' ti' axcaxac'al is tx'otx' tx'ok diosal; cax max e yak'on tz'a incienso bay juntzan comon dios tu', tol man e yojtakok, tamwal eb e yichmam max ojtakneni, tamwal eb e reyal yojtak. C'amxa yalbanil jantak eb anima c'am is yobtakil max e mak'camok.

⁵ Yetok c'apaxok, max e watx'nej wal aj altar bay che yak' tz'a eb e yuninal yin xajanbalil bay Baal. Che yunen wal tzet yetal tol mayinnak max wak' e yunej, tamwal max ec' yin in nabal jun tzet che yun tu'.

⁶ Yuj tu' xan, ayin wal caw Jehová in chi wala' tol ok apnok wal jun c'ual tol a jun jobe ti' manxa ok yik Tofet, tamwal jobeal yet Ben-hinom, palta tol ok yik jobeal cambal anima.

⁷ A bay jun jobe ti' ok wak' etax el tzet nabil e yuj ex aj Judá, c'al ex aj Jerusalén. Ok ex wak' ayc'ay satak eb ajc'ul chi yochej chex mak'on camok, axa e mimanil ok oc is chibejok no ostoc c'al no chiwajwom no' xolak te'.

⁸ Ok occan jun e conob ti' yin tz'inan tx'otx'al, cax buchbejal ok yuncanok. A mactxel okto ec' cayti', toxac'al ok c'aycan aj c'ul, c'al buchwajcan aj yuj tzet ok yuncantok.

⁹ Ok wak' e yunej, tol ok e chilej aytok e ba, c'al e chilen aytok e yuninal yuj wajil yet ok oc oyan eb ajc'ul yin e conob, ẍi Jehová, cachi bay eb.

¹⁰ A wal yet ok lajwok alon masanil juntzan ti', cax ok a mak'on poj jun tx'otx' moc tu' satak eb anima ajun etok tu',

¹¹ cax chalon bay eb: Axca wal ti' yalon Jehová, Cham Yajaw yin Masanil: Ok wak' lajwok jun conob ti' axca wal chi yun mak'lay poj junok tx'otx' moc, tol c'amxa chi je' ca watx'nelay junelxa. A ton bay Tofet ti' ok e mukaytok eb e camnak, yujtol c'amxa bay okto je' e mukoni.

¹² Ayin wal caw Jehová in chi wala', tol axca wal tu' ok wut jun conob ti', c'al yetok jantak ex cajan ex bay; lajan wal ok e yuncan axca Tofet.

¹³ Masanil na bay Jerusalén ti', c'al is despacho eb reyal Judá c'al pananil yibanlak na bay chi ak'lay tz'a incienso bay masanil tzektebalej chi jilajtok bay satcan c'al bay che secay vino yin ofrendail bay tx'ok diosal, masanil juntzan tu', yajbejtakxac'al ok yuncanok, axca ok yuncan Tofet, ẍi Jehová, cachi, ẍi Cham ayin.

¹⁴ Max lajwi yunen cham Jeremías juntzan tu xin, cax max meltzojtek cham bay Tofet, bay max yalcan el is k'anej Jehová. Max octok waan bay yul templo, max yalon bay masanil eb conob axca ti':

¹⁵ A Jehová co Diosal, Cham Yajaw yin Masanil chi alon axca ti': Ok watok yailal yiban jun e conob ti', c'al yiban juntzanxa conoblak ay e cawilal; ok jayoc masanil juntzan yailal mayal wal ti' e yiban, yujtol max e pitnejxac'al e ba, c'amxa che yikej tzet chi wala', ẍi Jehová ẍi cham Jeremías.