Jeremías 14 - A Txꞌan Biblia Yin Kꞌanjobal 1989

Jun miman majilal aej

¹ Yuj wal jun miman majilal aej, xan max k'anjab Jehová bay cham Jeremías, cax max yalon axca ti':

² Chi ok' eb aj Judá yuj cusc'ulal, c'amxa yip is conoblak eb, toxac'al ayay eb sat tx'otx'. Axa eb aj Jerusalén xin, chi aj yaw yuj yailal.

³ A eb beyom, chi chektok eb is chekbej ioj aej; chi toj eb yilon a' bay yulak olan, palta c'amxa tzet, xan chi meltzoj eb yin tol c'am aej yul moc. Toxac'al chi makchej el eb sat yuj q'uixwilal.

⁴ Toxac'al chi jataj tx'otx' tx'otx' yuj takinal. Yuj tu' xan a eb mulnajwom caw wal chi tac' c'ul eb, chi makchej el eb is sat.

⁵ Toltax no tx'ucchej bay xolak te' chi bekcan no' yune' tolto chi alji, yujtol c'amxa ac'un chi lo no'.

⁶ C'al no xolakteal burro, atac'al bay jolomlak witz mayayi chi tit waan no'. Axac'al cak'ek' chi yuctok no' axca no ok. Toxac'al k'ekk'olinak chi yil no', yujtol c'amxa an ac'un watx' chi lo', ẍi Jehová.

Is tewilal Jeremías yuj eb conob

⁷ ¡Mamin Jehová! caxc'al miman txequel yayji co mul, palta colwajan jin on yet watx' c'am chach al-lay yobal. Xiwil el pit on ayach, cax chi oc co yobtakil ayach.

⁸ Asannej ach ayach oc yipok co c'ul, asannej ach c'apax co Colomal ayji yet ayon oc yin yatakilal. ¿Tzet yuj xan axcaxac'al tx'ok conobal chot a ba bay yul conobal ti', axcaxac'al junok ec'jabwom tol junnej ak'bal chi ec' wayok?

⁹ ¿Tzet yuj xan tol lajan achxac'al axca junok soldado chi mitx'lay yin tol man naanok yuj, xan c'amxa chi je' colwaji? Palta Mamin, ti' wal ayach pax ec' co xol on. Masanil anima yojtak tol a conob on. Manchak on a bekcan xin.

¹⁰ A ton jun ti' max yal Jehová yin conob Israel: A wal jun conob ti', caw wal ay is tzalojc'ulal yin yec'jabtok. Chi toj bay jun, chi toj bay junxa. Yuj tu' xan c'am jabok chi tzaloj in c'ul yin. A tinani' ok in natek is yobtakil eb, cax ok in beyc'ulnen el is yunben eb, ẍi Cham.

¹¹ Max yalon Jehová ayin axca ti': C'am chach tewi oc win yuj is watx'ilok jun conob ti'.

¹² Caxc'al chi oc eb yin c'ajbanc'ulal, palta man ok in tak'wok bay eb. Caxc'al xiwil xajanbal chi yak' tz'a eb, c'al xiwil satlak awoj chi yitek eb yin ofrendail, palta man ok in tzalojbok oc yin eb. Ok wak' c'ayil eb yuj owal, yuj wajil, c'al yuj ilya', ẍi Cham ayin.

¹³ Cax max in tak'wi bay Cham axca ti': Palta Mamin Jehová, a eb a chekbej, chi yal eb bay eb conob, tol c'am owal ok ocok. C'am wajil ok ec'ok. Chi yal eb tol ach ok ak'c'al junc'ulalil bay cajan on ti', quin chi.

¹⁴ Axa tak'wi Jehová ayin axca ti': Ta axca tu' chi yun yalon el eb chekbej tu' yin in bi, lanan yak'on eb lek'tial chi yal tu', yujtol mayinnak max in chek eb. C'am junok chekbanilej max wak' bay eb, tamwal max in k'anjab bay eb. A juntzan chi yal eb tu' tol max wak' yil eb, man yelok, xan c'am yelapnok. Yul yet juntzan chekbej tu' chi yalon ajok.

¹⁵ Ayin Jehová in chi wal yin juntzan chekbej chi tec'baj ba yalon el yin in bi tol c'am owal, c'am wajil ok ec' bay jun nación ti', palta mayinnak chin chek yal eb: A juntzan chekbej tu' ok cam eb yuj owal c'al yuj wajil.

¹⁶ Ac'ala' eb conob bay chi yal eb tu', ok cam eb yuj owal c'al yuj wajil, yetokc'al yistzil eb c'al yetok yuninal eb. Toxac'al ok ec'can teljab is mimanil eb bay yulak calleal conob Jerusalén. C'amxa mactxel okto mukon eb. Axca wal tu' ok yun tojlanen el eb is mul max yaocok.

¹⁷ Xan al juntzan ti' bay eb conob axca ti': C'amokab chi lajwi yel yal in sat yet c'ualil c'al yet ak'balil, yuj yailal ayxa is may max jay yiban in conob, yuj yailal bay chi yasjitok eb.

¹⁸ A yet chin eltok bay chi oc mulnajil cax chi wiloni, tol ay mimanilej aycan bay tu' yuj owal. Chin oc paxtek xol conob, chi wiloni, tol lanan cam anima yuj wajil. Axa eb chekbej, c'al eb sacerdote, mayal ilaytok eb bay tx'ok conobal man yojtakok eb, cachi, ẍi Cham ayin.

A is tewilal Jeremías

¹⁹ Mamin Jehová, ¿tom junelnej wal max ecan el eb anima aj Judá yin a c'ul? ¿Tom mayal entaknej el conob Sión? ¿Tzet wal yuj max on ak' yasjok yin tol c'amxa chon anchaji? Chi co na' tol ok on aj can jaloni, palta c'am tzet yetal watx' max jayoc ayon. Max co na' tol watx' ok yun co beytok, palta asanc'al ay is mayil max jay jin.

²⁰ Mamin, ti wal chi co natek co yobtakil on xin, yetokc'al is yec'nakilal eb jichmam on. Caw wal max oc co mul on ayach.

²¹ Yuj wal ebanilal aj can xin, manchakxa on entaknej elok. Manchak entaknejcan el jun conob ti' bay ayic' a trono tol mimanbil. Natek a trato max ak' jetok on. Tokwal man ok ak' yunej.

²² Tokwal ay junok comon dios, is diosal eb tx'ok conobal ok je' yak'on tit nab. Tokwal chi yatek satcan yax nab yul yet. C'amak Mamin Jehová, co Diosal ach, asannej ach chatek. Yuj tu' xan chach jaoc yipok co c'ul, quin chi bay.