Jeremías 11 - A Txꞌan Biblia Yin Kꞌanjobal 1989

C'aybanilal el trato

¹ Max k'anjab Jehová ayin, Jeremías in ti', max yalon axca ti':

² Ab wal tzet chi yal in trato, cax chalon c'apax bay masanil eb anima aj Judá yetokc'al bay eb cajan bay Jerusalén.

³ Cax chalon bay eb tol ayin Jehová is Diosal in eb, chi wala' tol catabnebil mactxel c'am chi iken tzet yetal chi yal jun trato ti';

⁴ a ton jun trato max in watx'nej yetok eb e yichmam, yet max wion eltek eb bay Egipto, a ton jun nación tu' tol lajan wal yayji bay eb axca wal junok horno bay chi tz'a ch'en hierro. Max wal bay eb: Ikejek ayin; watx'nejek masanil tzet yetal chi wala'. Ta caytu' che yunej, ayex ti' in conob ex, ayinxa e Diosal in, quin chi.

⁵ Ta ayex ti' ok e yikej ayin, ok wak' yun bay max wak' in ti' bay eb e yichmam, yin wak'on jun e tx'otx', a ton tx'otx' yax sat bay ayex ec' ti' tinani', ẍi Jehová, cachi, ẍi Cham. Xan max in tak'wi bay Cham: Yunokab Mamin Jehová, quin chi.

⁶ Yuj tu' xan max yal Jehová ayin axca ti': Al jun k'anej ti' bay conoblak yul yet Judá, c'al bay yulak calleal Jerusalén. Al bay eb anima: Abek wal tzet chi yal jun trato ti', cax che yikeni, cachi.

⁷ A yet max wion eltek eb e yichmam bay Egipto, max cam walon bay eb tol chi cha eb yab tzet chi wala'. Ataxc'al yet tu' masantac'al tinani' lananc'al waloni.

⁸ Palta maj cha yab eb, tamwal max yikej eb; palta tol max yak' pitbok eb c'ul. Max bekonxac'al eb c'ulok toj yin yobtakilal. Majxac'al yal c'ul eb max yikej bay tzet max wala'. Yuj tu' xan max wak' tit yailal yiban eb, axca yayjican yin jun trato tu', ẍi Cham.

⁹ Maxtoc'al yal Jehová ayin axca ti': A eb aj Judá, yetokc'al eb cajyom bay Jerusalén, chi lajtinej eb yion el ba yul in k'ab.

¹⁰ Lananc'al toj eb yintak mulej max beybalnej eb e yichmam. A ton eb tu' maj iken tzet max wala', tol max yac'al oc eb nabal yin juntzan comon dios, max oc eb yin ayilal bay. Maj yikej eb israel, yetokc'al eb yet Judá in trato max in watx'nej yetok eb e yichmam tu'.

¹¹ Yuj wal tu' xan ayin wal caw Jehová in chi wala' tol ok watok jun yailal yiban eb, tol manxa ok uj yel eb bay. Caxc'al ok el yaw eb, ok k'anon eb in colwal, palta manxac'al ok in tak'wok bay eb.

¹² Catatu' a eb aj Judá, c'al eb cajyom bay Jerusalén, ok tok eb k'an colwal is diosal bay chi yak' tz'a eb incienso tu'; palta man ok je' yuj juntzan tu' colon el eb bay jun yailal ok jay tu'.

¹³ A wal eb aj Judá tu', xiwilxa is diosal eb. Lajanxac'al bisil axca bisil is conoblak eb. Ac'ala' c'apax eb aj Jerusalén, mayal watx'nej aj eb xiwil altar, axcaxac'al calleal conob bay chi yak' tz'a eb incienso bay Baal, jun comon dios tol yajbejtak.

¹⁴ A yuj tu xin, xan ach Jeremías, manchak ach txajli yuj jun conob ti'; tamwal a tewi ayin yuj eb, yujtol ayin ti', man ok in tak'wok bay eb, caxc'al mi ok k'an eb in colwal nan xol is yailal.

¹⁵ ¿Tzetto wal chi ul yun in conob camc'ulnebil wuj ti' bay in cajlobal. Ilab tol mayal tojc'al eb yunen yobtakil? ¿Chi mi na' eb tol a yuj ok yak' eb xajanbal ayin, xan man ok jayoc yailal yiban eb? Matawal axca tu' chi yunej, tzalojc'ulal mi yet eb.

¹⁶ Yujtol a yet yalantok, lajan in conob ti' axca junok te olivo manxa watx'ilok xak. Caw wal nojnak el yuj sat. Palta a tinani' xin, ok wak' lajwok ay axca chi yun lajwi ay junok te te' chi el k'ablak yuj owal cak'ek' nab, cax chi tz'atok yuj rayo.

¹⁷ Ayin Jehová, Yajaw in Yin Masanil, max in tz'un conob Israel c'al conob Judá. Palta mayal wala' tol ok jay yailal yiban eb yujc'al jantak yobtakilal chi yun eb. Max tx'em eb yowal in c'ul, yujtol max yak' tz'a eb incienso bay Baal, ẍi Jehová.

Eb ajc'ul yin Jeremías bay Anatot

¹⁸ A Jehová max ak'on wojtaknej elok tol ay eb ajc'ul lanan naon eb yak'on yobc'ulal win. A Cham max jakon in nabal yet chi nachaj el wuj.

¹⁹ Yinc'al tzalojc'ulal ayin ec'ok, axcac'al junok no calnel chi ilaytok bay chi mak'lay camok, caw wal man wojtakok tzet yetal lanan naon eb win. Chi yal eb axca ti: Co mak'ek camok, yet watx' c'amxa mactxel chi naontek, axca wal chi yun tzoc'lay aj junok te te' elnak wal satni, ẍi eb.

²⁰ Yuj tu' max in tewi bay Jehová axca ti': Mamin Jehová, Yajaw ach yin Masanil, Juez ach yin tojolal. Caw wal ojtak tzet yetal ay yin co nabal on. Ak' wal wil tzet ok yun aon oc yailal yiban juntzan anima ti'. Yujtol mayal wabenej oc tzet chi nalay win ti' yul a k'ab, quin chi.

²¹ A eb anima bay Anatot, max na eb tzet watx' chi yun in cami. Max yalon eb tol chin is mak'cam eb, tatol ac'ala' walon k'anej Jehová.

²² A Jehová Yajaw yin Masanil max yal yin eb: Ay tzet ok in watx'nej yayji yetok eb. A eb ach'ej ok cam eb xol owal, axa eb winak unin, c'al eb ix unin, ok cam eb yuj wajil.

²³ C'amxa junok eb tu' ok cancanok, yujtol ok jay c'ual ok in beyc'ulnen el eb yuj is yunben. Masanil eb anima bay Anatot ok watek junok yailal yiban eb, ẍi Jehová.