Jeremías 10 - A Txꞌan Biblia Yin Kꞌanjobal 1989

Yechelej c'al ayilal bay Dios

¹ Max yalon Jeremías: Ex wet conob Israel, abek wal k'anej chi yal Jehová.

² A wal Cham chi alon axca ti': Manchak e beybalnej is beybal juntzanxa nacionlak, tamwal chex xiwaj yuj juntzanok tzet yetal chi tx'ox ba bay satcan, axca chi yun juntzan nación tu'.

³ A is beybal juntzan conob tu', c'am wal jabok yelapnok. Chi tzoc'aj eb junok te k'oj bay xolak te k'akte'. A junok josom te' chi joson yetok is mitx'k'ab.

⁴ Lajwi tu' cax chi yaon oc plata c'al oro yelbubok. Chi mak'on oc lawuẍal yetok martillo, yet chi cawbi, yet c'am chi el c'otnajok.

⁵ A juntzan yechelej tu', lajan wal axca xibtebal tz'iquin bay junok awoj. C'am chi je' k'anjabi, yowalil chi iklay ec'ok yujtol c'am chi je' beyi. C'amokab chex xiw bay juntzan tu', yujtol c'am chi je' yak'on yobc'ulalil tamwal watx'c'ulalil, ẍi Cham.

⁶ Mamin Jehová, c'am junokxa lajan etok, yujtol yelxac'al miman ayji ocok, yujtol caw wal mimanbil a binaji. Masanil chi je' oj.

⁷ ¿Tok ay mactxel man mojok chi xiw ayach, tol reyal ach masanil nacionlak? Moj wal tol miman elapnok yul sat masanil anima. Xol eb jelan, c'al eb rey bay yulyibank'inal ti', c'am junokxa mactxel lajan etok.

⁸ Masanil eb anima tu' c'am is nabal eb, c'am wal is jelanilal eb. ¡Tok ay wal jabok tzet chi je' yak'on junok bijan te te' tu' co cuyu'!

⁹ A juntzan yechelej tu' naba plata ibiltek bay Tarsis, c'al ch'en oro, a tu' ibiltek ch'en bay Ufaz, watx'nebil yuj eb tenom ch'en. Ayoc k'ap morada yili, c'al cak k'ap is pichilok. Masanil juntzan tu', watx'nebil yuj eb anima aj nabal yin watx'nen tzetak yetal.

¹⁰ Axa pax Jehová, a wal caw Dios iquis, cax Yajaw yin tojbalk'inal. A yet chi tit yowal, chi bil tx'otx' tx'otx' ti' yuj. C'amxa chi je' tec'ban ba nacionlak satak yowal c'ul Cham.

¹¹ (A ayex israel ex ti', alek bay eb tx'ok conobal axca ti': A juntzan comon dios, manak eb max watx'nen satcan c'al sat tx'otx', yuj tu' xan yowalil ok c'ayaj eb bay yulyibank'inal ti'. C'amxa junok juntzan tu' okto cancanok, quex chi.)

Jun bit yuj aloj watx' k'anej bay Dios

¹² Max watx'nej Jehová tx'otx' tx'otx' yetok is yipalil; a yetok is jelanil max watx'nej yulyibank'inal ti'. Ac'ala' yetok is jelanilal tu' max watx'nej c'apax satcan.

¹³ A yet chi bil yul is nuk', cax chi bilaj a' aej bay satcan, chi aj wan asun yuj. Bay lajubal tilak tx'otx' tx'otx', chi aj jopnaj rayo yuj, xol owal yaxnab, cax chi yion eltek cak'ek' bay wajan ec' yuj.

¹⁴ Masanil eb anima chi yaoc yechelej yipok is c'ul, c'am is nabal eb, c'am tzet yojtak. A masanil eb tenom ch'en, toxac'al chi q'uixwican aj eb yuj juntzan yechelej chi watx'nej aj eb. A juntzan yechelej tu' c'am yelapnok, tokwal ay yiquisal.

¹⁵ A juntzan tu' c'am tzet chi oqui, moj chi tzeyelayi. A yet ok jay yiban yuj Jehová, toc'al ok lajwok ayok.

¹⁶ Caw wal miman is q'uexanil co Diosal ayon yinatil Jacob on ti'; tol a co Diosal max watx'nen masanil tzet yetal. A' max sic'on el co conob Israel ti' yuj yoccan yetok. A Jehová Cham Yajaw yin Masanil axca ton wal tu' is bi Cham.

Yailal t'inan jayi

¹⁷ —Ex aj Jerusalén oybil exxa ajok, wajbajek aj masanil e tzet yetal.

¹⁸ Yujtol chi yal Jehová axca ti': A yet junel ti', ok wuktejtok masanil eb cajyom bay jun nación ti' najat. Caw wal ok wak'xac'al waj ba yailal e yin masantac'al ok yal e michchaji ẍi Cham.

¹⁹ ¡Ok'bal in c'ul, lanan in lajwi ayok! C'amxa chi anchaj in yas. Max in naoni tol wetc'alta yayji jun yailal ti', xan ok wak' techajok.

²⁰ Mayal uchchaj ay in mantiado, mayal nic'chajtok masanil is tx'anil. Mayal in beklaycan yuj eb wuninal, c'amxa ec' eb. C'amxa mactxel chi watx'nen aj in mantiado junelxa. Tok ayto mactxel chi litx'bantok wenel wiban.

²¹ A eb yilomal jun conob ti', caw wal c'am is nabal eb. C'am chi k'an eb is jelanil bay Jehová. Yuj tu' xan max ayc'ay eb, masanil anima chi saklemcantok.

²² ¡Abek xin! Ti wal chi apni oc jun abix. A jun conob bay norte nililixac'al bil tita. A jun tu' ok q'uexponen oc conoblak Judá yin tz'inanil. Asanxanej no ok ok ayjok bay tu'.

²³ Mamin Jehová, wojtak wali tol man yulok co k'ab ayon anima on ti' ayoc tzet ok yun jelocok. C'am wal jabok jikbej yin tzet ok jayoc co satak.

²⁴ Ak'on cuenta axca wal yayji oc a tojolal, cax manokab yetok yowal a c'ul, talaj chon ak' lajwok ayok.

²⁵ Bekay yowal a c'ul yiban juntzan tx'ok conobal, yiban juntzan conob tol c'am chach yojtaknej elok. A ton juntzan conob c'am chi yal ba ayach, yujtol max c'aylay el co conobal ayon yinatil on Jacob ti' yuj eb. Junelnej max on c'aylayxac'al el yuj eb; toxac'al max uchchajcantok co nación ti' yuj eb.