Is 9 - A Txꞌan Biblia Yin Kꞌanjobal 1989

Cham Yajawil junc'ulal

¹ Palta man tojbalk'inalok ok ayjok eb xol k'ekk'inal, a ton eb lanan yetnen c'ul tinani'. A yet yichbanil max ilay ay Galilea, is tx'otx'al Zabulón c'al yet Neftalí ay bay tilak a' Jordán, c'al bay tilak a' mar, junej ay yetok eb man israelok. Axa ok yunej, ok ilay aj can eb yuj Cham.

² A jun conob cajan ec' nan xol k'ekk'inal tu', ok yil jun miman sakk'inal. Ok chaw jun sakk'inal tu' bay eb cajan ec' xol k'ekk'inal tol ay is may.

³ Mamin, max e aj can bisil anima bay co conob, yel miman jun tzalojc'ulalil max ak'a'. Chon tzaloj co masanil a satak. Axca wal tzalojc'ulal yet wajoj sat awoj, ma axca wal tzalojc'ulal yet eb soldado chi pojcan ec' mimek beyomal xol eb, axca tu' jun tzalojc'ulal max ak' ayon ti'.

⁴ Yujtol ach max a c'aycan el jun conob anej oc a conob yin mosejal, c'al yin yatakilal. Max a c'aycan el eb axca max ot a c'ayon el conob Madián yet yalantok.

⁵ A is xanab eb soldado, c'al an pichilej bonbil yuj chic', ok tz'acan ayok, ok lajwok ay yuj k'ak'ej.

⁶ Yujtol winak unin max alji ayon. A Dios max ak'on jun unin ti' ayon; a jun unin ti', ok ak'lay yikbej yoc yajawil. Tixtakc'al is bi ok yik ti': Cham C'ayubtakxac'al yin ak'oj nabalej, Cham Dios tol miman is mayk'ak'al, Cham Mamej c'am yichbanil cax c'am lajubal, Cham Yajaw ak'om junc'ulal.

⁷ Ok yak' Cham reyalil q'uexelok cham rey David. Ok yak' cuenta bay masanil lugar, cax man ok tancan el junc'ulal yin tojbalk'inal. Ok yi yip is yajawil tu' sic'libil, yuj beyc'ulnen yin watx'c'ulal, c'al yin tojolal. A jun ti' ok yunej, yujtol nabil yuj Jehová Cham Yajaw yin Masanil.

Yowal c'ul Jehová yin conob Israel

⁸ Max yal Jehová yuj tzet ok jay yiban Israel, is conobal Jacob.

⁹ Xan masanil eb conob yul yet Efraín cajan bay Samaria, ok nachaj el yuj eb, tol yet Cham jun ok uj tu'. Yuj is maynejbail, c'al ch'aanil eb, xan chi yal eb axca ti':

¹⁰ Ta mayal ay bulnaj xan na, ayon ok co ca watx'nej aj yetok ch'en ch'en josbil. Ta mayal tzoc'lay coj te patzab sicómoro, axa te c'ute' ok jaoc q'uexelok, ẍi eb.

¹¹ Palta a Jehová ok yitek juntzan yajc'ul cham Rezín yin eb, ac'al oc Cham ok ak'on yun eb yin yak'on eb owal yin Israel.

¹² A bay yichcan ok tit eb aj Siria, axa bay yayubc'u ok tit eb filisteo. Junxanej ok yun c'aylay el Israel yuj eb. Caxc'al mi axca tu' ok yunej, palta c'amtoc'al chi oc wanaj yowal c'ul Jehová, lanantoc'al yaon oc yailal yin is conob.

¹³ Palta a eb conob tu xin, maj wal meltzoj eb bay Dios caxc'al max alay oc yailal eb yuj Cham. Majc'al yaoc ba eb yul k'ab Jehová, Cham Yajaw yin Masanil.

¹⁴ Yuj tu' xan a Cham ok yut wal Israel axca junok no no' chi tzoc'lay el ne c'al jolom yuj junok mactxel, axca bay chi k'aklay aj an palma, c'al te aj yin junnej c'ual.

¹⁵ (A jun jolomej tu', a ton eb yicham winakil conob, c'al eb ayoc yin yajawilal chi yala'; axa neej tu', a ton eb chekbej Dios chi yala', a ton eb chi cuywaj yin lek'tial.)

¹⁶ A eb ikbajwom bay jun conob ti', lek'ti eb. Axa eb conob ti', chi ikbelay c'aytok yuj eb.

¹⁷ Yuj wal tu' xan manxa ok ok' is c'ul Jehová yin eb ach'ej, tamwal okto cus c'ul yin eb unin c'amxa is mam, tamwal yin eb xal ix camnakxa yichamil. Yujtol a masanil eb anima ti', junelnej c'am Dios yul sat eb, cax yobxac'al elok, yobal k'anejxac'al chi yal eb masanil. Caxc'al mi axca tu' ok yunej, palta c'amtoc'al chi oc wanaj yowal c'ul Jehová. Lanantoc'al yaon oc yailal is conob.

¹⁸ A yobtakilal conob, caw wal miman tzet chi yetnejtok, axca wal junok bolob chi yak' tz'atok an sak q'uix c'al te q'uix, chi tz'a c'apaxtok mimek k'akte' yuj, cax chi yoyon ba cakxuchumal yaj xol mub.

¹⁹ A wal yuj yowal c'ul Jehová, Cham Yajaw yin Masanil, xan lanan lajwi ay conob, c'al lajwi ay eb anima, axca chi yun lajwi ay junok tzet yetal yuj k'ak'ej. C'am jabok ok na eb yin yet animail.

²⁰ Yalxac'al tzet yetal jabok ok chaloj yuj eb, ok loon aytok eb. Caxc'al mi axca tu' ok yut ba eb, palta manxa ok ec'tok is wajil eb. Toltax ok chi aytok eb yuninal.

²¹ A Manasés yetok Efraín lanan yak'len lajwok ay ba eb, ac'ala' is ca makanil eb chi toj eb yin Judá. Caxc'al mi axca tu' chi yun eb, palta c'amtoc'al chi oc wanaj yowal c'ul Jehová. Lanantoc'al yaon oc yailal yin is conob.