Is 8 - A Txꞌan Biblia Yin Kꞌanjobal 1989

A reyal Asiria chi jayi

¹ A Cham Jehová max alon ayin: Say junok miman litx'an un cax chach tz'ibli yin tx'an. Yin mimek letrail chot a tz'ibeni: Maher- salal-hasbaz.*fn*

² Ok watok cawanok in testigo watx', yuj yalon eb tol ach max a tz'ibej, a ton sacerdote Urías, c'al Zacarías, c'ajol Jeberequías, ẍi Cham ayin.

³ Lanan wal tu', max in way yetok xal wetbi tol chekbej Dios yayji, max oc unin yin xal, cax max jay jun winak unin. Axa yalon Jehová ayin: Ak'ek yik Maher-salal-hasbaz.

⁴ Yujtol a yet manto je' yalon jun unin tu' mam c'al txutx, cax ok tok masanil is beyomalil eb aj Damasco, c'al eb aj Samaria yuj cham reyal Asiria, ẍi Cham.

⁵ Max yalon Cham Jehová ayin yet cayelal:

⁶ Yujtol chi tzaloj jun conob ti' yuj tzet max utlay Rezín, c'al is c'ajol Remalías tu', cax c'am chi yochej eb a' aej Siloé, tol c'ojanc'ulal bey a',

^7-8 yuj tu' ok witek a' miman aej Éufrates yiban eb. Ok elcan a' yul is be a', ok pulcan el a' is tilakil, ok apnoktac'al bay Judá, cax ok yak'on noj masanil sat tx'otx'. Ok ajapnok a' tac'al bay tel nuk'ej. (A jun aej chi binaj ti', a reyal Asiria yetok masanil is soldado chi yala'.) A' ok tokxac'al jenan yiban masanil a tx'otx' ach Emanuel, ẍi Cham.

⁹ Wajek e ba ex mimek conoblak cax chex tit yin owal; palta ok ex ayc'ayok. Abek jun k'anej ti', ex conoblak tol najat ayex. Tzetc'al e yion e mitx'k'ab yet owal, toc'alta ok ex ayc'ayok.

¹⁰ Ok ton e na' tzet ok e yunej; palta ok uchlay c'ay ayex, caxc'al ay tzet che wajan alnej, palta man ok yunej, yujtol a Dios ayic' jetok.

Asan bay Cham Yajaw chon xiwi

¹¹ Yin wal ipejal max oc mitx'an Jehová win, max yalon ayin: Manchak a beybalnej is beybal juntzan anima ti'.

¹² Manchak a waj alnej yetok eb et conob ti' yin e k'anon is colwal Asiria, tamwal chach xiw bay chi xiw eb.

¹³ Ayin Jehová Yajaw in yin Masanil, a yul a sat Asanxanej inokab Ocok. A ayin moj chach xiwi. Watx' tatol ay welapnok yul a sat.

¹⁴ Axa ayin ok in oc a cajlobalok bay chi je' a colon a ba. Palta a bay eb aj Israel, c'al eb aj Judá, axca wal ch'en chipbal akanej wayji. Axca wal wayji, a tu' ok michchaj el eb aj Jerusalén ti'.

¹⁵ Xiwil eb ok chipil yakan, ok ayc'ay eb, c'al k'ajtok eb, xiwil eb ok oc yul yal, cax ok michchajok, ẍi Cham.

Is cuyoj Isaías bay eb is cuywom

¹⁶ Ex in cuywom, a jun in cuyoj ti', watx'okab chi yun cancan e yuj, yet watx' c'am chi toj c'ayc'ulal.

¹⁷ Caxc'al mi chi yebaj el ba Jehová ayon, mac on yinatil Jacob on ti', palta chi waoc Cham yin in c'ul, tol asan wal Cham ayoc yipok in c'ul.

¹⁸ Tix in ti', yetok eb in c'ajol max yak' Jehová ayin. A ton Cham Yajaw yin Masanil, tol cajan ec' Cham bay witz Sión, max yak' co bi yin cuybanilejal bay eb jet israelal.

¹⁹ Ok mi laj yal eb anima ayex axca ti': K'anlej e yabix bay eb tz'akan c'ul yaloni, c'al bay eb chi k'umej camnak, a ton juntzan eb chi sajsoni cax chi c'ununi eb, ẍi mi eb ayex. Tokwal man ok k'anlej junok conob is nabal bay is Diosal. ¿Watx' mi tol chi k'an eb iquis nabalej bay eb camnak yin tzet chi yun eb?

²⁰ Ilek tzet ẍi ley, c'al cuybej yet Dios. Ta man lajanok chi yun yalon juntzan anima ti', ti tol ayto oc eb xol k'ekk'inal chi yal tu'.

²¹ A eb anima ti', ok ec' c'ac'on eb yuj witz'anil, c'al yuj wajil. Yuj wal wajil tu', ok caktzaj aj eb, ok bajoncan el eb is reyal, c'al is Diosal. Catawal tu' ok aj t'anan eb satcan,

²² c'al yay t'anan eb sat tx'otx', palta asan cusc'ulal, c'al k'ekk'inal ok ilchaj yuj eb, axca tol a k'ekk'inal makchenen ay eb yin junelnej.