Is 66 - A Txꞌan Biblia Yin Kꞌanjobal 1989

Lek'ti' ayilal

¹ Max yal Jehová axca ti': A satcan tu' in trono yayji, axa sat tx'otx' ti' axca tol batxlubal wakan yayji. Yuj tu' xan ayex ti', ¿tzetto wal nail ok e watx'nej aj ayin? ¿Tzetto wal xewbalej ok e watx'nej ayin bay ok in xewok?

² Ayin wal caw Jehová in chi wala' tol ayin max in watx'nej masanil juntzan tzet yetal ti', caytu' max yun pitzc'oj aj masanil. Palta ayin ok in taynej eb yaynakil tol chi cus c'ul yuj yobtakil, eb tol ay yelapnok in k'anej yul sat.

³ Ay mactxel tol a wal beybalej chi cha c'ul, a chi yunej, cax chi tzalojbi wal c'ul yoc yin ayilal tol yajbejtak. Caxc'al chito mak'cam junok no wacax yin xajanbalil, lajan wal yul in sat axca tol a junok anima chi yaoc yin xajanbalil. Ta chi mak'cam no calnel yin xajanbalil, lajan wal axca tol chi pak'il is nuk' junok no tx'i'. Ta chi yak' satlak awoj yin ofrendail, lajan wal axca tol a chiq'uil txitam chi yak'a'. Ta chi yak' tz'a incienso, lajan wal yul in sat axca tol chi yal watx' k'anej bay comon dios.

⁴ Mayal in nabalnej el yailal ok jayoc yiban eb. A wal tzet chi xiw eb bay, a ok wak' bay eb, yujtol max wawtej eb, palta maj tak'wok eb ayin. Max in k'anjabi, palta maj cha eb yabej; a ti' yet eb, tol max yun eb juntzan yobtakil in satak, max tzakloj eb yintak juntzan tzet yetal tol c'am chi cha' in c'ul, ẍi Jehová.

Beyc'ulal c'al bekbanilal

⁵ Abek wal is k'anej Jehová, mac ex wal tol ay yelapnok Cham yul e sat: Ay juntzan e yet conob tol chi chichon oc c'ul e yin, cax chi ocxac'al eb ajc'ulal e yin yujc'al tol ayin chin e yawtej e yetok. Cax chi yalon eb axca ti' ayex: Tx'oxokab Jehová tu' is mayk'ak'al yin ex coloni, chi jochej chi jil e tzalojc'ulal, ẍi eb. Cay wal tu' chex yut buchon eb. Palta a eb tu', toxac'al ok q'uixwokcan aj eb, ẍi Jehová.

⁶ A wal jun chi bil tit bay conob tu', jun toxac'al nilili bil tit bay templo, a jun tu' a Jehová chi bil tita, yuj yak'on paktzebal bay eb ajc'ul, atac'ala' is mojalil.

⁷ Chi yal Jehová: A conob Sión lajan wal axca junok ix ix jun wal bek max jay yune'. Yet c'amtoc'al yail chi yabej, max jayi.

⁸ ¿Mactxel maxax abeni, ma yilon junok lajan wal axca jun ti'? ¿Tom chi je' yalji aj junok nación yin junnej c'ual? Palta a Sión tu', txennej ok yut yaben yail, cax nacionxa ok yuncanok.

⁹ ¿Tokwal ok in tenoc waan jun aljil tol ayin chi wak' yunej? quin chi ayin Jehová e Diosal in ti'.

¹⁰ Tzalojanek yetok Jerusalén, a mac ex ay e camc'ulal yetok. Junanejek e ba yin tzalojc'ulalil, mac ex tol max ex ok' yuj.

¹¹ Yujtol lajan wal axca junok txutxej, ok ex mimanc'ulnelay yuj, masantac'al chex can yin tzalojc'ulalil yuj is miman yaxilal.

¹² Yujtol ayin Jehová in chi wala': Ok wi wal aj can tzet yetal tol ok mayjok ayex. A is beyomal nacionlak, ok jayoc ayex, axca wal junok aej tol c'am yechel chi tani. Yuj tu' xan ayex ti', lajan ex axca junok unin chi ak'lay txutxwok yuj is txutx, tol ochebil, cax chelbil.

¹³ Axca wal junok xal txutxej tol chi mimanc'ulnej yune', axca wal tu' ok ex wut in mimanc'ulneni. Cay wal tu' ok yun e yion e mimanc'ulalil bay Jerusalén, ẍi Jehová.

¹⁴ A wal yet ok e yilon juntzan ti', toxac'al ok tzalojbok aj e c'ul. Ok ak'lay yip e mimanil junelxa, axca chi yun yaxbi aj an ac'un. Yujtol ok tx'ox wal Jehová is yipalil xol eb is chekbej, axa yowal c'ul ok tx'ox xol eb ajc'ul oc yin.

¹⁵ A nan xol k'ak'ej ok apnok oc Jehová, a is carro Cham lajan axca junok cakxuchum. Ok yiel yowal c'ul yin eb ajc'ul axca chaw xak k'ak'ej.

¹⁶ A yetok k'ak'ej, c'al yetok yespada ok beyc'ulnej Jehová masanil anima bay yulyibank'inal ti', cax xiwil mactxel ok cam yuj.

¹⁷ A wal caw Jehová chi alon axca ti': A mactxel chi yaxac'al oc ba yin yoc yin ayilal bay comon dios xol junok awoj, cax chi tzakloj eb yunen axca chi yun junok mactxel ayoc nan xol eb tu', yin chion eb txitam, c'al chion eb no tx'ow, c'al juntzanokxa no' tol yajbejtak, junelnej ok lajwok el eb tu' masanil.

¹⁸ Yujtol wojtakxa is nabal eb, c'al is beybal eb, xan ok in jayoc ul in wajban oc masanil conoblak, c'al tiejlak yin in beyc'ulneni, axa jayoc eb ul yilon in mayk'ak'al tu'.

¹⁹ Ok in tx'oxil in c'ulbal xol eb. Okto elcan juntzanokxa eb wuj xol eb ok beyc'ulnelay tu', cax ok in chekontok eb bay juntzanxa nación. A ton bay Tarsis, bay Libia c'al bay Lidia, a ton eb aj nación tu' caw wal yojtak eb chi julwaji. Axa pax eb bay Tubal, c'al bay Grecia. A juntzan nacionlak ti' najat ayil yinlak a' mar, c'am bay chi ablay in binaji, tamwal ay bay chi yil eb jabok in mayk'ak'al. A eb chekbiltok wuj tu' ok alon yabixal in mayk'ak'al bay xolak nación tu'.

²⁰ Ayin wal caw Jehová in chi wala', tol ok tit masanil eb e yet conob bay masanil nacionlak yuj eb. Ok tit eb yiban chej, yul carruaje, c'al yiban batxbalej, yiban mula, c'al yiban camello. Axca wal junok ofrenda ok yun jayoc eb bay tzalan bay chi oc ayilal ayin bay Jerusalén. Axca chi yun yiontek eb in conob junok ofrenda yul junok net caw wal sak bay in templo, axca tu' ok yun yilaytek eb.

²¹ Ayin wal caw Jehová in chi wala', tol a xol juntzan eb maxto elcan wuj, a ok in siq'uil eb ok oc yin sacerdoteal, c'al yin levitail, ẍi Cham.

²² Chi yalon c'apax Jehová axca ti': Axca wal ac' satcan, c'al ac' sat tx'otx' tol ok wesnej ajok, ok ayjokc'al ec' yin tojbalk'inal, caytu' ok yun e binaj ayex ti' yetok e yinatil yin tojbalk'inal.

²³ Ayin wal caw Jehová in chi wala', tol junjunc'al el yet chi alji xajaw, junjunc'al semana yet c'ual xewilal, ok jayoc masanil anima ul ay jajan ayin.

²⁴ A yet ok jay eb tu', ok yilon oc eb mimanil eb camnak, a ton eb max meltzoj oc win yuj tenomtakil. A no patz chi chiontok eb tu', c'am chi camil no', a k'ak'ej chi ak'on tz'a eb, c'am chi tani. Yajbejalxac'al ok yun yili yul sat masanil anima, ẍi Jehová.