Is 65 - A Txꞌan Biblia Yin Kꞌanjobal 1989

Queja yin eb pit

¹ Max yalon Jehová axca ti': Ay eb c'am chin k'anlen ec'ok, palta max quin ilchaj yuj eb. Yetok c'apax bay eb c'am chi yal ba ayin, max in tx'ox in ba bay eb. Axa max yun xin, a bay eb tol c'am chin k'anlen ec' tu', a tu' max wala': Tix in ti', quin chi.

² Masanil tiempo batxanc'altok in k'ab yin wawten jun conob yelxac'al pit, tol lanan tojcan bay yul jun be yelxac'al yob, asanxanej yintak yochwan chi tzakloji,

³ tol in satak wali, cax chi yaonc'al oc eb is mul. Yujtol chi yak' wal eb xajanbal bay juntzan tx'ok diosal xolak awoj, cax chi yak'on tz'a eb incienso yiban altar ladrillo ayoc yin.

⁴ Tol chi ay chotan eb xol mukbanil camnak. Chi ec' ak'bal yuj eb bay ewantak. Chi chi eb chibejal txitam, cax chi yak'on wal noj eb is sec' yuj yal no chibej tol man watx'ok yayji, atac'ala' ley.

⁵ Cax chi yalon eb axca ti': Watx' ayji bay tu', manchak ach oc lacan jin, tol co pojnakxa el co ba on en, ẍi. A wal juntzan anima tu', lajan wal eb axca junok k'ak'ej c'am chi tani, cax chi tojc'al mubal yul in txam.

⁶ Palta a masanil juntzan is yobtakil eb tu', tz'ibc'al yayji in satak, man toc'alok ok wiloc axca tu'. Ok in paktzej wal bay eb axca wal is mojalil.

⁷ Mawal axca yuj is yobtakil eb, c'al yuj yet is yichmam eb, tol max yak' tz'a eb xajanbal jolomlak witz, cax max oc is mul eb ayin bay tzalanlak. Babel ok in beyc'ulnej eb, cax ok in paktzen bay eb axca wal is mojalil, ẍi Jehová.

Chi yak' is ti' Jehová yin yak'on watx'ilal

⁸ Max yalon Jehová axca ti': A yet ay yal junok chaan uva, c'am chi yetnej el eb anima jun tu', yujtol ayto watx'il yin chi yil eb. Axca tu' ok wun yuj is watx'ilal eb in chekbej, man ok wak' c'ayil masanil nación.

⁹ Cax ok wak'onc'al ayjok ec' is yinatil Jacob, yet watx' ayc'al anima cajan bay siquilal tx'otx' yul yet Judá. A wal eb sic'bil el wuj, ok ayjok eb bay sat in tx'otx', c'al eb in chekbej ok cajay ec' eb bay tu'.

¹⁰ Caw wal ok nojil bay jobeal yet Sarón yuj calnel, c'al bay jobeal yet Acor, ok low no wacax, a ton bay is jobbejal no' jun conob ok oc ayilal ayin.

¹¹ Palta man cayok tu' ok yun ayex, mac ex tol che pojcan el e ba wintak, cax chi tojcan c'ayc'ulal e yuj jun tzalan bay chi oc ayilal ayin, axac'al bay juntzan dios chi nabalnen tzet ok on junjun anima e yaloni, a ton Gad c'al Meni, a bay juntzan tu', che yak' loj, c'al vino yin xajanbalil.

¹² Palta ayin chin nabalnej pax el tzet ok ex onok, tol yobxac'al tzet yetal lanan quex yechbaneni, espada ok ex ak'on cam wuj, tol ok ex ay jajanok, cax ok ilay el e jolom. Yujtol max ex wawtej, palta maj ex tak'wok ayin, max in k'anjab ayex, palta c'am che cha e yabej. A ti' e yet tol max e yun juntzan yobtakil in satak, max ex tzakloj yintak juntzan tzet yetal c'am chi cha in c'ul.

¹³ Yuj wal tu', a eb in chekbej ay is lobej eb, axa ayex ti' ok ex cam yuj wajil. Ay tzet ok yuc' eb, palta ayex ti' ok ex cam yuj takintial. Tol ok tzalojbok eb, palta ayex ti' q'uixawtakxac'al ok e yuncantok.

¹⁴ A eb ti' ok bitnok eb yuj tzalojc'ulal; axa ayex ti', tol ok ex ok' yuj cusc'ulal, c'al yuj yatakilal.

¹⁵ A eb sic'bil el wuj tu', ok ex yak' binaj eb yin buchon junokxa anima. Ayin ok ex wak' cam ayex ti', palta ok wak' jun ac' biej bay eb in chekbej yet chi yak' binaj eb.

¹⁶ Tzanc'al mactxel bay jun nación ti' chi k'an junok watx'c'ulal yiban, a ayin ok k'ana', ayin Dios in, tol chi wun tzet chi wala'. Tzanc'al mactxel tol chi yak' c'apax is ti' yin junok tzet yetal, ayin ok in yak' binajok. A yet tu', a jantak yatakilal maxax eq'uelok, ok tojcan c'ayc'ulal, c'amxa bay txequel ay yul in sat.

¹⁷ Abek xin, tol ok wesnej aj jun ac' satcan, c'al jun ac' tx'otx'. A jantak tzet yetal ec'nakxa elok, ok tokcan c'ayc'ulal, tok ayto mactxel okto naontek juntzan tu'.

¹⁸ Tzalojanek yin tojbalk'inal yuj tzet yetal ok in watx'nej ajok, yujtol ok wak' is tzalojc'ulal conob Jerusalén; axa eb anima cajan bay tu' ok tzalojbok c'ul eb wuj.

¹⁹ Ayin wal caw ok in tzaloj yin Jerusalén tu', caw wal watx'xac'al ok wab yuj in conob tu'. C'amxa bay ok ablay yel yaw eb anima yuj yailal bay tu'.

²⁰ A bay tu', c'am eb unin ok cam yin jayeb ch'an c'ual ok ec'ok, tamwal ok cam eb icham anima tol man ok tz'aknaj yabilal. Ta ay mac ok cam yin cien abil is k'inal, unin anima chi yal tu'. A mactxel ok cam yin man ok ajapnok is k'inal yin cien abil, a yuj yailok is yobtakil xan ok pet camok.

²¹ Ok watx'nej aj eb in conob yatut, cax ok cajay ec' eb yul. Ok yaw eb yuva, cax a wal caw eb ok loon sat an.

²² Manxa ok yun tol ok watx'nej aj eb is na, cax tx'okxa pax mac chi cajay yul. Ma ok yaw eb yawoj, tx'okxa pax mac chi loon pax aytok sat. A eb in conob tu', caw wal najat ok yun is k'inal eb, axca wal is k'inal te te'. A eb sic'bil el wuj, ok yak' tzalojbok eb is c'ul yetok is mulnajil yin mimantak yabilal.

²³ A yet tu', man nabaok ok mulnaj eb in conob, man ok cam is yuninal eb yin tol c'amto chi ajapnok c'ual cami. Yujtol a in conob ti', yinatil eb anima tol max wak' in watx'c'ulal yin, ayin Jehová in ti'. Caytu' ok yun c'apax yuninal eb.

²⁴ A yet c'amto chin yawtej eb, lananxa in tak'wi bay eb, a yet c'amtoc'al chi lajwi k'anjab eb, mayal wab tzet chi yal eb.

²⁵ A no ok yetok no calnel, junnejxac'al ok low no'; ac'ala' no coj, a an ac'un ok lo no' axca no wacax. Yetok c'apax no labaj, a pokok ok lo no'. Ayin wal caw Jehová in chi wala', tol c'am tzet yetal ok yetnejtok juntzan no no' tu' bay tzalan bay chi oc ayilal ayin, ẍi Cham.