Is 64 - A Txꞌan Biblia Yin Kꞌanjobal 1989

¹ Matawal chi nic'chaj satcan oj cax chach aytek. Matawal chi el yin a c'ul, cax chak'on bil mimek witzlak a satak,

² axca chi yun bil yuki aj a' aej yuj k'ak'ej caw wal ow yoqui. Ayantek yet watx' chach yojtaknej el eb ajc'ul oc en, c'al bilaj nacionlak eb tu' a satak.

³ A wal yet max onen tzetak yetal tol c'ayubtakxac'al yoqui, tol man naanok el juj, max ach aytek, a juntzan mimek witz max bilaj a satak.

⁴ Yettax yichbanil, c'amc'al bay max ablayi, tamwal ay bay max il-layi, tatol ay junokxa dios a satak tol chi yun juntzan tzet yetal chon ti', yet chi oc is watx'ilok eb chi yaoc c'ul en.

⁵ Ach ti' cha cha' eb tol watx'c'al tzet chi yun yin tzalojc'ulal, cax naanc'al yuj eb yuneni, axca wal tzet chochej. A tinani', caw wal ow ach jin on, yujtol max oc co mul on ayach, ayxataxc'al c'oli yoc co yobtakil on ayach. ¿Chi tom wal je' co colchaji?

⁶ Co masanil ayon ti', lajan on yul a sat axca mac man watx'ok, atac'ala' ley. A masanil co watx' unben jaloni, lajan wal yetok junok tz'il k'apej. Yuj wal co yobtakilal on, xan lajan on wal axca takin xak te' chi xulay bey yuj cak'ek'.

⁷ Tok ayto junok on chach jawtej, tamwal chito co natek co k'anon a colwal. Yuj tu' xan max a c'ubaj el a ba ayon, max on a bekoncan yul k'ab co yobtakil.

⁸ Palta ach ti' Mamin Jehová, co Mam achc'alta'a. Ayon ti' tx'otx'ej on, ach max on a tz'aka'; co masanil ach max on a watx'nej.

⁹ Mamin, manokab yelxac'alok chi tit owal jin on. C'amokabxa cha natek jantak co yobtakil on. Ilab wali tol a conob on.

¹⁰ A wal juntzan a conob et yayji oc ti', mayal occan yin tz'inanil, mayal uchchajtok Jerusalén, c'amxa mac cajan bay.

¹¹ Mayal lajwi ay co templo tz'atok, tol et yayji, manxa watx'ilok yili, bay max oc eb jichmam on yin ayilal ayach. Masanil wal juntzan caw wal ochebil juj on, mayal etaxtok.

¹² A yet chelon masanil jun ti' Mamin Jehová, ¿tom c'am wal jabok tzet ok onej? ¿Tom ok ach ec'xac'al yiban aon oc yailal jiban on?