Is 61 - A Txꞌan Biblia Yin Kꞌanjobal 1989

Max al-lay el yabixal colbanil Israel

¹ A Yespíritu Jehová Cham Yajaw ayoc win, a Cham max quin sic'on elok. Max in cheklaytek yuj, yet chi ul walcan el watx' abix bay eb meba', c'al ul wak'on watx'jok c'ul eb ayoc yin yailal, c'al walon el bekbanilej bay eb ibiltok yin mosejal, c'al bekchaj el eb preso yayji,

² c'al walon elok tol mayal jay c'ual jun colbanilej chi yak' Jehová co Diosal, c'al c'ual paktzen bay eb ajc'ul is yobc'ulalil eb. Max in cheklaytek yuj yet chi ul in mimanc'ulnej eb ayoc yin cusc'ulal,

³ yet chi ul wak' bay eb ayoc yin cusc'ulal bay Sión jun corona watx' yili, is q'uexelok tik'ak'il tan chi yajtok eb yin is jolom, c'al tzalojc'ulal q'uexelok ok'il; axa bit yet aloj watx' k'anej chi occan q'uexelok bilc'ulal. Lajan ok yun eb axca junok te ji' tol a wal caw Jehová max awoni. Ok yun eb tojolal yuj yilay aj can Cham.

⁴ Ok ca watx'nej aj eb juntzan conob uchchajnaktok yettax yalantok.

⁵ Ex wet conob, a eb tx'ok conobal ok taynen e calnel, c'al e yawoj uva.

⁶ Axa ayex ti' ok e yik sacerdote yet Jehová yuj eb, chekbej ex Cham co Diosal. Ok tzalojbok e c'ul yetok is beyomal juntzanxa nacionlak, watx'xac'al e yili yuj tzet yetal watx' yili ay bay eb.

⁷ Ayex ti', tz'akanxac'al max yun e yaben yail q'uixwilal c'al e buchlayi; palta axa tinani' xin, tz'akan ok yun e chaon beyomal bay yin e tx'otx', c'amxa lajubal e tzalojc'ulal.

⁸ Yujtol a wal tojolal chi yochej Jehová, caw wal ow yin elk'an c'al yin etnej anima, xan caw wal watx' ok yun paktzen ayex yuj bay max ex etaxi, cax ok watx'nen jun trato e yetok yin tojbalk'inal.

⁹ Caw wal miman ok yun binaj e yinatil xol masanil nacionlak. A masanil mactxel ok ex ilonok, a eb tu' ok nachaj el yuj eb tol a Jehová chi ak'on watx'c'ulalil ayex.

¹⁰ Caw wal max yak' Jehová tzalojbok aj in c'ul, caw wal chi aj can in tzalojc'ulal yuj in Diosal, yujtol caw wal watx' max in yut yetok colbanilej c'al tojolal, axca chi yun watx'nen ba junok nak ach'ej, ma junok ix k'opoj yet chi toj nupayok.

¹¹ Axca wal tx'otx' tx'otx' bay awbil awoj bay chi yak' ajol tx'otx' inat awbil bay, axca wal tu' ok yun yak'on txecloj aj Jehová Cham Yajaw is tojolal satak nacionlak, yuj yilay aj can Cham.