Is 60 - A Txꞌan Biblia Yin Kꞌanjobal 1989

Is mimanbilal Jerusalén yet yajtok tu'

¹ Axca ti' yalon Jehová: Ex aj Jerusalén, ajanek wanok, caw watx' e yet yujtol a in tzekekial ayoc e yiban.

² A juntzanxa nación, ok makaycantok yuj k'ekk'inal, axa ayin Jehová in ok ex in tzektanej, caw wal miman txequel in tzekekial e yin.

³ A juntzanxa nacionlak tu', ok jayoc eb bay sakk'inal tu', yetokc'al eb rey, ok jayoc eb ul yilon e tzekekial lanan txecloj tu'.

⁴ Ajanek t'ananok, cax che yilon bay e yinlak. Masanil eb e yet conob, chi wajbaj ba eb, cax chi jayoc eb ayex, axa eb e c'ajol ok tit eb bay najat, c'al eb e cutz'in, lacbil ok yun tit eb.

⁵ A wal yet ok e yilon axca tu', caw wal ay e miman tzalojc'ulal, caw wal ok ex aj can yin tzalojc'ulal. Ok yitek eb ayex jantak beyomal nacionlak; toltax juntzan nación bay k'axepal a' mar, ok yi c'apaxtek is beyomal.

⁶ Ok nojcan el masanil sat e tx'otx' ti' yuj no camello chi tit bay Madián c'al bay Efa. Ok jay c'apax oc masanil eb aj Sabá, ibil oc oro c'al incienso yuj eb, cax ok yalon el eb yabixal wunben c'ayubtakxac'al yoqui.

⁷ Masanil no calnel ay bay Cedar, e yet ok yuncan no'. Yetokc'al masanil no' ay bay Nebaiot, ocokab yopiso no' e yuj yet che yak'on no' yin xajanbalil ayin, yin ofrenda tol chabejtak. Ok wut axca tu' yuj yilay aj can in templo.

⁸ ¿Tzet yetal juntzan axcaxac'al asun chi ec' tu', axcaxac'al toj no paloma bay is wayub?

⁹ A juntzan tu', barco chi tit bay k'axepal a' mar, babel juntzan chi tit bay Tarsis. Chin yaoc juntzan nacionlak tu' yipok c'ul, yuj tu' ibilxa oc eb e yuninal yuj eb, yetok oro c'al plata, yuj wilay aj can ayin Jehová e Diosal in, tol Asanxanej in Ocok, yujtol ayin ok wak' e mimanbilal.

¹⁰ A anima tx'ok conobal, a ok ca watx'nen aj e muralla; axa eb rey ok ex ak'on serbil. Caxc'al max wak' yailal e yin yetok yowal in c'ul, axa tinani' xin, yetok wal in camc'ulal chi cusoc in c'ul e yin.

¹¹ A puertalak e conob ok canc'al jakanok. Manc'al ok makay yet c'ualil c'al ak'balil, yet chi je' yilaytek is beyomal nacionlak ayex, yetokc'al eb is reyal.

¹² A juntzan nacionlak tol man ok ex ak'on serbil, ok ak'lay lajwok elok.

¹³ A jantak watx'ilal ay bay Líbano ok ilaytek ayex: te taj, te k'uk'taj, c'al yetok te q'uisis, yet ok oc is watx'jubalok yili in templo, axca tu' caw mimanbil ok wut bay ok in ayjok.

¹⁴ A masanil jantak is yinatil eb max ex etneni, ok jayoc eb yin ayilal ayex. Masanil eb max ex intaknen elok, ok jayoc eb yin ul yay jajan ayex, cax ok yalon eb e yin tol in conob ex ayin Jehová in ti'; ok yal eb tol aj Sión in conob, ayin e Diosal tol Asanxanej in Ocok.

¹⁵ C'amxa yechel ok ex can e tx'oklil c'al yak'lay yobc'ulalil e yin, palta tol ok wak' in watx'c'ulalil ayex yin tojbalk'inal, cax c'amxa lajubal tzalojc'ulal.

¹⁶ A nacionlak, yetokc'al eb is reyal ok ex ak'on serbil, axca wal chi yun yak'on serbil junok ix txutxej yune'. Yuj tu' ok nachaj el e yuj tol ayin Jehová e Diosal in, c'al e Colomal in. Tol ayin, ayin oc yipomalok Jacob, ayin chi wak' e bekbanil.

¹⁷ A oro ok wak' q'uexelok bronce, axa plata ok wak' q'uexelok hierro. A bronce ok wak' q'uexelok te te', axa hierro ok wak' q'uexelok comon ch'en. Manxa ok ex etax yuj eb e yajawil, yujtol ok wak' yajawbok eb yin tojolal c'al yin junc'ulal.

¹⁸ A bay e tx'otx'al tu', c'amxac'al bay ok ablay k'umal mak'lay cam anima. C'amxa mactxel ok uchwajok, c'al yuchon lajwok yul e makbej ti'. A colbanilej chi wak'a', a ton wal jun tu' a caw e muralla yayji ocok, axa e mimanbilal chi wak'a', a wal caw ayoc e puertaok.

¹⁹ A yet tu', manxa yowalilok tol a yakan c'u ok ex tzektanen yet c'ualil, tamwal tol ato yakan xajaw ok ex tzektanen yet ak'balil, yujtol ayin Jehová in, e sakk'inal wayji yin tojbalk'inal. Ayin e Diosal in ok ex wiaj can.

²⁰ Man ok lajwok e sakk'inal; ok oc yopiso e yuj q'uexelok yakan c'u c'al xajaw, tamwal ok ay tananok, yujtol ayin Jehová in, e sakk'inal wayji yin tojbalk'inal. A yet tu', a tiempoal yet ayex oc yin cusc'ulal, ok lajwokcan ec'ok.

²¹ Masanil anima cajan bay e conob ti', watx'xac'al ok yun is nabal eb, yet-xac'al eb yayji e nación ti' yin tojbalk'inal. Lajan wal eb axca yajol junok awoj tol ayin wal caw max wawa'; a jun mulnajil tu', ayin wal caw max in watx'nej yuj wilay can.

²² A jun makan anima txennej bisil e xol ti', ok aj can is bisil eb, caw wal tec'an ok yun eb axca junok nación. A yet ok apnok tiempoal, ayin wal caw Jehová in ok wak' yun juntzan ti' yin aymanil, ẍi Cham.