Is 57 - A Txꞌan Biblia Yin Kꞌanjobal 1989

¹ A yet chi cam eb anima watx' nabal, tokwal ay mac chi oc il yuj eb. A eb watx'c'ul, toc'al chi c'ayaj eb. Tok ayto mac chi nachaj el jabok yuj, tol a yet chi cam eb, c'amxa yalon yet eb yin yailal.

² A eb asan watx'ilal max beybalnej, chi xew eb yuj camich, cax chi apni eb bay c'amxa bilc'ulal.

Ay yowal c'ul Dios yin ayilal bay yechelej

³ Axca ti' yalon Jehová: Titanek ayin yet watx' chex in beyc'ulnej ex yobtakwom, lajan e beybal yetok eb tz'akan ay c'ul, yetok eb ajmul winak, c'al eb ajmul ix.

⁴ ¿Mac yin chex buchwaj ayex ti'? ¿Mac yin chex etz'waji? Ayex ti' tenomtak ex, lek'ti' ex.

⁵ A bay yichlak te ji' bay xiwil xak te', a wal bay tu' che yun ajmulal yuj e yion can e diosal, cax che yak'on eb e yuninal yin xajanbalil xolak ch'en ch'en bay tilak aej.

⁶ Chi yal Jehová: A wal ayex ti' ex aj Israel, caw wal chi cha e c'ul chex oc yin ayilal bay ch'en ch'en ay yulak aej. A juntzan tu' max e sic'can el e diosalok. A wal bay che secay vino yin xajanbalil, c'al e yak'on masanil satlak awoj bay, ¿chi tom laj e na' tol okto ex wak' mimanc'ulal?

⁷ A bay jun witz caw wal can ayaj is tel, a tu' che watx'nej e wayub, a bay tu' chex aj c'apaxtok e yak'on e xajanbal.

⁸ A bay yetc'ulal e puerta, a tu' che yaoctok e diosal yajbejtak. A pax ayin xin, chin tojcan c'ayc'ulal e yuj. Che t'irban el e ba bay tu', chex ay telan bay jun e miman tx'at. Che yak'on e trato yetok eb nak winak chi yochej e c'ul chi yun mul e yetok tu', cax chex oc t'anan yin is winakil eb nak tu'.

⁹ Che bon e ba yetok aceite c'al perfume, cax chex toj lemnaj bay jun yechelej chi yik Mélec. Che chektok eb e chekbej najat, yet chi toj saylaytek juntzanokxa e diosal. Toltax che yak' sayic' eb xol pixan eb camnak.

¹⁰ Toxac'al chex c'unbi aj yuj chex toj najat, palta c'am wal jabok chi nachaj el e yuj, tatol c'am jabok yopiso tzet che yun tu'. Chi ilchaj e yuj tzet chi yun e yion e yip junelxa, xan c'am chi ispay el e yuj.

¹¹ ¿Mactxel juntzan dios bay chex xiwi, c'al miman yelapnok yul e sat tu', tol max quin e bekcanok, xan chin tojcan c'ayc'ulal e yuj? ¿A mi yujtol ayxa tiempoal c'am tzet chi wala', xan c'amxa welapnok yul e sat?

¹² Axa tinani' ok in tx'oxil juntzan e beybal, tol caw wal watx' e naoni. C'am tzet ok e yi' yin juntzan e diosal max e watx'nej tu'.

¹³ A yet ok el e yaw e k'anon colwal, colwajokab jun bulan e diosal tu' e yetok. A masanil juntzan tu', toxac'al ok xulay bey eb yuj cak'ek'. Toc'al ok xulay c'ayaj eb. Axa pax mactxel chi yaoc c'ul win xin, ok cajayc'al ec' bay jun conob ti', cax ok ayjokc'al ec' bay in tzalan bay chi oc ayilal ayin, ẍi Jehová.

Mimanc'ulnebilal eb chi na ba c'ul

¹⁴ Ok ablay yal-lay axca ti': Watx'nejek junok be, caw wal panan che yutej, iek el tzetak yetal ayoc yul, yet watx' chi ec'tok in conob, ẍi.

¹⁵ Yujtol a Cham Axac'al Ocok, Cham tol iquisc'al ec' yin tojbalk'inal, a ton Cham chi yik Asanxanej Ocok, a chi alon axca ti': Ayin ti', cajan in bay yelxac'al can ayajok tol wet yayji ocok; palta ayin c'apax ec' yetok eb tol yaynakil chi yut ba, a ton eb chi na ba c'ul; cax chi wak' is tec'anil eb.

¹⁶ Manxa owok in bay in conob ti', tamwal tol ow inc'al yin, talaj chi cabax aj c'ul eb anima ti' win, tol ayin max in watx'nej eb.

¹⁷ A yuj is mul Israel tol asan yet yul yet chi saya', xan ow in yin jun tiempoal. Max waoc yailal yiban, max in bekoncanok, palta max pitnejxac'al ba yin tojxac'al bay chi yochej c'ul.

¹⁸ Max cam wal wilon is beybal, palta xin, ok wantej. Ok wikbaj cax ok in mimanc'ulnen eb chi cusc'ul yuj is yobtakil.

¹⁹ Cay wal tu' ok yun yalon eb watx' k'anej ayin. Ok walon axca ti': Ayokab e junc'ulal mac ex najat ayex ec'ok, yetokc'al mac ex cawil ayex, quin chi. Ayin ok wantej in conob, quin chi.

²⁰ A pax eb yobtakwom xin, lajan wal eb axca wal chi yun yaj wan sat a' mar, tol c'amxa chi je' yoc wanajok, cax chi yionc'altek jantak tzet yetal tz'iltak.

²¹ A eb yobtakwom, c'am jabok watx'il yet eb, ẍi in Diosal.