Is 54 - A Txꞌan Biblia Yin Kꞌanjobal 1989

Is camc'ulal Dios yin Israel

¹ Axca ti' yalon Jehová: A Jerusalén,*fn* lajan wal axca junok ix ix tol c'amc'alta' yune', bekbilcan yuj yichamil. Axa tinani', moj tol chi awji, chi bitni yin tzalojc'ulal, yujtol xiwilxa yune' ok yila', yintak junok ix ix c'amc'al bay max beklaycan yuj yichamil.

^2-3 Axca chi yut leon junok ix ix yul is mantiado, chi jokbanej is tx'anil, caw chi yutay yestacail, axca tu' moj chi yun conob Jerusalén, tol miman ok yun yel leeok bay is watx' c'al bay is q'uexan. A eb aj conob ok yican eb is tx'otx'al xiwil naciónlak, cax ok cajon eb juntzan conob bay c'amxa anima.

⁴ Ex aj Jerusalén, manchak ex xiwi. Manxa ok el e q'uixwil, manxa ok ex utlay yin yaynakilal. Manxa ok e natek q'uixwilal max yun e conob yet payxa, yet max in e bekoncanok, axca junok ix ix c'amxa yichamil.

⁵ Yujtol ayin e watx'nemal in ti', axca ichamilej wayji e yuj. A in bi Jehová Yajaw in yin Masanil. E Colomal wayji, e Diosal in, tol Asanxanej in Ocok. Ok al-lay win tol is Diosal in masanil yulyibank'inal.

⁶ Lajan wal yayji e conob axca junok ix k'opoj ix tol bekbilcan yuj yichamil, tol ayoc yin cusc'ulal, caytu' yayji. Axa tinani', chi awtelay junelxa yuj yichamil tu'.

⁷ Ex aj Jerusalén, yin txennej tiempoal max ex in bekcanok, axa pax tinani' xin, yin mimek camc'ulalil chex in chaon paxok.

⁸ Junnej wal txolan max tit wowal, majxa in tx'ox in sat ayex; palta ayin ton Jehová e Colomal in chi wala', tol chi ok' pax in c'ul e yin, yin ex in camc'ulnen yin tojbalk'inal.

⁹ Axca wal max yun wak'on in ti' bay Noé, tol c'amxa yechel ok yak' junokxa owal aej mukwajwom yin yetnentok tx'otx' tx'otx', axca wal tu' chi yun wak'on in ti' tinani', tol manxac'al ok tit wowal junelxa e yin, tamwal okto ex in tzu' junelxa.

¹⁰ Ayin wal caw Jehová in, ay in camc'ulal e yin, xan chi wala' tol caxc'al chi q'uexchaj bay ayic' mimek witz, cax chi ay bulnaj tzalanlak, palta a in camc'ulal e yin, manxa ok lajwok, tamwal ok lajwok in trato e yetok, palta tol ayc'al junc'ulal co xol.

Ac' Jerusalén

¹¹ Ok'bal ex c'ul ex aj Jerusalén, ya' max ex ec' yuj mimek yailal, tokwal ay pax mac chex mimanc'ulneni. Axa tinani', ok wacan ay yich e conob yiban ch'en ch'en watx' yili.

¹² A yetok ch'en rubíes ok in watx'nej aj is torreal, axa ch'en berilo ok waoc yin satlak murallail bay chi oc puerta, axa masanil ch'en ch'en caw wal watx' yili ok waoc yin is murallail.

¹³ Ayin ok ex in cuy e masanil ayex ti', tol watx' ok ex eloc e masanil wuj.

¹⁴ Yujtol ok e beybalnej tojolal c'al watx'ilal, a yuj tu', caw wal tec'an ex, c'amxa xiwc'ulal, tamwal ayto mactxel ok ex etnenok, xan manxac'al ok ex xibtelay yuj.

¹⁵ Ta ayto mac ok yak' yowal e yin, mayinxanak ay wet jun tu', palta ok ayc'ay jun mac chi yak' owal e yin tu' e yuj.

¹⁶ Ilab xin tol ayin max in watx'nej nak tenom ch'en, chi yaoc k'ak'al tzak'ak', cax a yetok k'ak' tu' chi watx'nej mitx'k'abej yet owal. Ayin max in watx'nej c'apax nak chi je' mitx'k'abnen ch'en ch'en yet owal tu', yuj yak'on lajwok masanil.

¹⁷ Palta c'am junok mitx'k'abej yet owal ok je' yak'on low e yin. A eb chex ak'on queja, tok ayto tzet ok yal eb e yuj. Ayin chi wut axca tu', yuj e watx'ilok ex in chekbej. Ayin ok ex in colilok, quin chi, ẍi Jehová.