Is 52 - A Txꞌan Biblia Yin Kꞌanjobal 1989

Chi al-lay el bekbanilal Jerusalén

¹ Iek el e wayan ex aj Sión, ajanek wanok, tec'bajek e ba ex aj Jerusalén, tol conob ex Dios. Tx'oxek el e yikbej ak'bil ayex yuj Dios, c'amxa yechel ok octok eb tx'ok conobal tol tx'ok is diosal bay e conob ti' yin ex yak'on ayc'ay junelxa.

² Ajanek wan xin, ex aj conob Jerusalén, mak'ek el pokok e yin, iek e yikbej yin e yak'on yajawilal, ex cajyom bay Sión. Iek el e c'albanilal ayoc yin e nuk'.

³ Chi yal Jehová axca ti': C'am tumin max in cha e yin yet max quex ilaytok yin mosejal. Ac'ala' tinani', c'am c'apax tumin ok wak' yet chex wion paxtek junelxa, ẍi Cham.

⁴ Yujtol axca wal ti' yalon Jehová Cham Yajaw: A in conob ti', max tojcan bay Egipto yet payxa, cax max ayji ec' eb bay tu' yinc'al ec'jabwom animail. Axa yintakilal max etax eb yuj eb aj Asiria yin tol c'am yujal.

⁵ Axa tinani' xin, ¿tzet yetal ok wun cayti'? Yin wal c'am tzet yujal max ilaytok in conob bay Babilonia. A wal eb chi yajawbi yiban tu', chi buchwaj eb, c'amc'al chi bek eb quin buchoni.

⁶ Yuj wal tu xin, ok ajapnok c'ual, cax ok in yojtaknen el in conob ti', tol ayin ton Jehová in max in k'anjab bay, cax ayin ec' yetok, ẍi Jehová.

⁷ A wal yet chi jilon bay chonlak tzalan, xiwil watx'il yili yet chi jayoc nak chi alon watx' abix, a yabixal junc'ulal ibil oc yuj, a ton chi alon el yabixal bekbanilal, cax chi yalon axca ti': Ex aj Sión, a e Diosal ayxa oc yin Reyal, ẍi.

⁸ Abek, a eb taynemal e conob, chi el yaw eb. Jun lajan chi yun yaj bulnaj eb yel yaw yuj tzalojc'ulal, yujtol a wal caw eb chi iloni, tol mayal meltzoj pax Jehová bay Sión.

⁹ Bitnanek yin tzalojc'ulal ex cajan ex bay Jerusalén, tol uchquiltakxac'al yayji, yujtol a Jehová mayal wal cus c'ul yin is conob, mayal yak' colbanilej bay Jerusalén junelxa.

¹⁰ Mayal tx'ox Jehová is yipalil tol Asanxanej Ocok bay satak masanil nacionlak. Masanil yulyibank'inal ok yojtaknej elok tol a Dios max on coloni.

¹¹ Elanek, elanek bay Babilonia ex inej oc mitx'k'abej yet Jehová. Manchakxa e mitx' tzetak yetal tol man watx'ok, c'amxa che yatok e ba xol yobtakil.

¹² Man yinokxac'al aymanil ok yun e yeli, man toc'alok ok ex elajok, yujtol a Jehová e Diosal babel e satak, tzakan c'apax e yintak, cax taynebil ex yuj.

Yailal is Chekbej Jehová

¹³ Axca ti' yalon Jehová: A in chekbej ok ujc'al yuj, yelxac'al miman ok yun yilay aj can.

¹⁴ Xiwil mac ok c'ayaj c'ul yin, caw wal tol tx'okxa yili ok yil eb, manxa animaok ok yun yili, yuj tzet ok utlayok.

¹⁵ Axa yet yajtok tu', xiwil nacionlak ok c'ayaj c'ul yuj. A wal yet ok yilon oc eb rey, c'amxac'al tzet ok yal eb yuj, yujtol ok yil eb, c'al nachaj el yuj eb tzet yetal tol c'amc'alta' bay max yab eb k'umal, ẍi Jehová.