Is 51 - A Txꞌan Biblia Yin Kꞌanjobal 1989

K'anej yet mimanc'ulnebilal Jerusalén

¹ Axca ti' yalon Jehová: A mac ex che yochej chex beytok yin tojolal, c'al e jayoc ayin, abek wal tzet ok wala': Ilek wal bay max quex tita, tzetbil wal yayji e yichmam.

² Ilab e yichmam Abraham, c'al e txutx ixnam Sara, c'am yuninal eb yet max wawten Abraham tu', palta max wak' yaxilal bay, xan xiwil max yun yinatil.

³ Ok wak' in watx'c'ulalil bay Sión, a ton eb cajan bay conob uchbil ayok. A masanil takin tx'otx'lak, lajanxac'al ok yuncan el wuj axca wal junok awoj manxa watx'ilok, axca wal jun awoj max waw bay Edén. A bay tu', asanxanej tzalojc'ulal ay, asanxanej bit c'al aloj watx' k'anej ayin, ok ujok.

⁴ Ex in conob, taynejek e yab tzet ok wala': Tol ok walil chekbanilej, c'al cuybanilej ok ikban conoblak.

⁵ Cawilxa ay c'ual wak'on paktzebal, a ton c'ual yet chin colwaji. A yetok masanil wikbej ok in yajawbok yiban conoblak. A conoblak ayic' bay tilak a' mar, ok yaoc nabal win. A in mayk'ak'al ok oc yipok c'ul eb.

⁶ Ajanektok t'anan bay satcan, cax ayanek t'anan c'apax sat tx'otx' ti'. A satcan tu', ok c'aycan aj axca wal c'ayaj mub, axa sat tx'otx' ti' ok ichambok axca chi yun yichambi pichilej, cax ok c'aylay c'apax el eb anima bay yiban tx'otx' ti' axca no us. Axa ayin ti' ok ex in col yin junelnej. A in colwal tu', c'am yechel ok lajwok.

⁷ A ayex e yojtakxa tojolal, ex che ya wal oc in chekbanil yin e c'ul, abek xin. C'am chex xiwaj yuj eb chi buchwaji; manchak cabax aj e c'ul yuj yob k'anej chi yal eb,

⁸ yujtol ok lajwok el eb axca junok icham pichilej tol ijtakxac'al, axca lana pichilej chi c'uxlaytok yuj no ij. Axa in tojolal, c'al in colwal ayc'al yin tojbalk'inal, ẍi Jehová.

⁹ Ajan wan Jehová, ajan wan yetok a mayk'ak'al, yetok wal masanil epalil, axcac'alta' chon yet payxa. A yet payxa tu', ach max ak' lajwok Rahab, max ak' yasjok no dragón tu'.

¹⁰ Ach max ak' c'apax tanaj a' mar, c'al a' aej tol najat yich, axa bay najatil yich a' mar tu', axcaxa be max otcantok yet chi ec'tok eb colbil el oj.

¹¹ Axca ton wal tu' ok yun meltzoj eb colbilxa el oj Mamin Jehová. Chi bitni eb, cax ok jayoc eb bay Sión, toxac'al ok tzetzon eb yuj tzalojc'ulal; axa ok'ilal c'al bilc'ulal ok c'ayajok.

¹² Axca ton ti' yalon Jehová: Ayin toni, ayin chex in mimanc'ulnej, ¿macto wal bay ok ex xiwok? ¿A mi bay eb winak tol cambejal yayji, tol lajanc'al eb axcac'al an ac'un?

¹³ Ayin Jehová e watx'nemal in. Ayin max in jenbajtok satcan cax max in watx'nej ay tx'otx' tx'otx' ti'. ¿Tom mayal in tojcan c'ayc'ulal e yuj, xan che yak' xiwaj e c'ul bay mac chex etneni, yet lanan nalayi tol ok ex c'aylay elok? ¿Tzetto wal chi oc yowal c'ul jun etnewom tu'?

¹⁴ A mac chi yab yail bay chi etnelay tu', ayman ok col-lay elok. Man ok cam yul preso, tamwal ok majax is lobej.

¹⁵ Ayin Jehová e Diosal in, a in bi tu' a ton Jehová Cham Yajaw yin Masanil. Ayin chi wiaj can sat a' mar, cax chi wak'on bil a'.

¹⁶ Ayin max in jenbajtok satcan, c'al in watx'nen ay tx'otx' tx'otx' ti'. Ayin chi wak' e yalil in k'anej, cax chex in colon el yetok wipalil, cax chi walon bay Sión: Ayex ti' in conob ex, quin chi bay, ẍi Jehová.

¹⁷ Iek el e wayan ex aj Jerusalén, ajanek wanok. Mayal e yab yail is yowal c'ul Jehová, axca wal mac chi uq'uen an, masantac'al chi c'aycan el c'ul yuj.

¹⁸ A xol jantak eb e yuninal, c'am junok eb max ex ikban ec'ok. C'al masanil eb unin max e yil ch'ibok, c'am junok eb max ex nic'oni.

¹⁹ A ton cab tzet yetal max tit e yiban ti': Tol max uchlay lajwok e conob ti', c'al wajil max on cam eb cajyom bay yuj owal. ¿Macto ok cusoc c'ul e yin? ¿Macto ok ex mimanc'ulnenok?

²⁰ Mayal pax yip eb e yuninal, mayal ayc'ay eb axca no tx'ucchej chi can yul tx'an yal, toxac'al max cancan teljab eb bay txiquinlak calle. Yastakxac'al eb yuj yowal c'ul Jehová, yuj is yak'bal cuenta Cham.

²¹ Ex aj Jerusalén, etnejc'ulal e yayji, axcaxac'al tol uq'uem ex an, palta man yujok vino. Chi cam wal e yaben tzet ok yal Cham.

²² Chi yal axca ti': Ayin Jehová e Diosal chex in colo', ayin ton chi wal axca ti': Ok wican ec' yechbalil yowal in c'ul yul e k'ab, cax majxa e yuc' junelokxa.

²³ A bay eb max ex etneni, a tu' ok wak'a', a ton eb max alon ayex axca ti': Ayanek telan sat tx'otx', tol ok on eq'uel e yiban, ẍi eb. Axa e yay telan sat tx'otx' tu', max ex tec'ontok eb axca pokok, quin chi, ẍi Jehová.