Is 50 - A Txꞌan Biblia Yin Kꞌanjobal 1989

¹ Max yalon Jehová axca ti' bay Israel: Tatol max in pojlej in ba yetok e txutx, ¿baytal ay junok un yet pojlejbail chi alon tinani'? Tatol ayin max ex in txontok yin mosejal, ¿mactxel bay ay in jec, xan tol max ex in txonilok? Ayex ti' max ex ilaytok yin mosejal; palta yuj e mul, c'al yuj e yobtakil tu' xan max ex uktelaytok.

² ¿Tzet yuj xan a yet max in jayi, c'am mactxel max ilchaj wuj, axa yet max ex wawteni, c'am mactxel max tak'wi? ¿Chi mi e na' tol c'am chi je' wuj ex in coloncan elok? ¿Chi mi e na' c'apaxok, tol man ok je' wuj ex wak'on bekchaj elok? K'okbilc'al asan junok k'anej chi wala', cax chi tanaj a' mar, cax tz'ininixac'al chi yuncan a' mimek aejlak. Axa camcan el no txay yuj takintial tu', cax chi k'atok no', yuj c'amxa aej.

³ Ayin chi wak' k'ekbok el satcan tu', cax toxac'al cusiltak chi yun yili, ẍi Jehová.

Yikemal Cham Chekbej Jehová

⁴ Axca ti' yalon Cham Chekbej Jehová: A Jehová Cham Yajaw max quin ak'on jelanbok yin in k'anjabi, yet watx' chi je' wak'on yipc'ulal eb ayoc yin c'unbilal. Junjunc'al k'inibalil chi yak' Cham wochej aj wabeni, tzet ok yak' in cuyu'.

⁵ A Jehová max jakon in nabal, maj in oc yin tenomtakilal, tamwal max quin el acan bay.

⁶ Max wacbajtok wichin yet chin is mak'on eb ajc'ul, bekan in c'ul jatzon el eb xil in ti'. Maj in c'ubaj el in sat bay eb chin buchoni c'al tzubli oc eb yin in sat.

⁷ A Jehová Cham Wajawil chi colwaj wetok. Yuj tu' xan maj cabax aj in c'ul yuj tzet max in yut eb. Yuj tu' xan tec'anc'al in waay axca junok miman ch'en, wojtak wali tol man ok el in q'uixwil.

⁸ A Cham chin coloni, cawilc'al ayic' in c'atan. ¿Mac wal txel ok je' in yak'on queja? Toj jil-lej oc co sat satak Cham juez, ¿Mactxel jun ajc'ul oc win tu'? Titokab in c'atan ti', cax chi yaloni.

⁹ A ton Jehová Cham Yajaw chi colwaj wetok. ¿Mactxel ok je' yak'on low win? A masanil eb ajc'ul oc win, ok lajwok ay eb axca icham pichilej tol ijtakxac'al, ẍi Cham Chekbej Jehová.

¹⁰ A mac ex tol ay yelapnok Jehová yul e sat ti', cax che yaben tzet chi yal is Chekbej: Tatol chex bey xol k'ekk'inal yin tol c'am jabok e tzektebal, aek oc Jehová yipok e c'ul cax ayjanekc'al oc yin Cham.

¹¹ Axa mactxel ex che yaoc k'ak'ej, c'al e watx'nen e tzektebal yul e yet, beyanek yetok e tzektebal tu xin. A Jehová ok aontek jun paktzebal ayex; toxac'al ok ex aycan telan xol miman yailal yuj.