Is 49 - A Txꞌan Biblia Yin Kꞌanjobal 1989

A is chekbej Jehová sakk'inal yayji bay nacionlak

¹ Axca ti' yalon Cham is chekbej Jehová: Ex conoblak bay tilak a' mar, abek tzet ok wala'. Ac'ala' ex nacionlak, tol najat ayex, taynejek e yabej. A Jehová max quin awten yet c'amtoc'al chin alji. Max yalcan el in bi yet mojbil intoc'al aj yuj in txutx.

² A in k'anej max yutcan aj axca wal espada el yayji ye, max in is c'ubaj cawilal is k'ab. Max in yuten axca junok julbalej tol lupupixac'al, cax max in is c'ubaj yul tz'umal is julbal.

³ Max yalon ayin axca ti': Ach ti' Israel tol in chekbej ach, yujtol oj wali, xan ok in al-lay watx'il, ẍi Jehová ayin.

⁴ Palta max wala' tol nabac'al max in mulnaji, c'am jabok tzet max wi' yin. Nabac'al max el wip, tokwal ay tzet max wi', quin chi. Asan xin, ti wal txequel wayji satak Jehová, a in paktzebal yin jun ti', yul k'ab Cham ayic'ok.

⁵ Axa tinani' xin, mayal in cha' in mimanbilal satak Jehová in Diosal, ac'alta' Cham chi ak'on wip. A Cham max in ak'on ch'ib yin in txutx yet chin oc is chekbejok, yuj wion meltzoj Israel is conobal Jacob junelxa bay.

⁶ Max yalon Cham ayin: In chekbej ach toni, palta man asanok yuj a ca watx'nen pax aj yinatil Jacob, cax cheon meltzoj eb iquisto bay Israel, palta yuj c'apax ach waon oc yin sakk'inalil bay juntzanxa nación, masantac'al bay lajubal tx'otx', yuj eontok colbanilej chi wak'a', ẍi Cham ayin, ẍi is Chekbej Jehová.

⁷ A Jehová Cham Dios chi ak'on bekchaj el Israel tol Asanxanej ocok, a' chi alon axca ti' bay jun tol intaknebil elok, c'al tol yajbil yuj masanil nacionlak, a ton jun chekbej yayji bay eb rey: A yet ok ach yilon eb rey, ok aj wan eb, axa yay nojan eb a satak tu', yujtol ayin Jehová, Diosal in Israel, Asanxanej in Ocok, max ach in siq'uilok, cax chi wunenc'al bay max wak' in ti', ẍi Cham.

Is ca watx'nebilal Jerusalén

⁸ Max yalon Jehová axca ti': A yet max ajapnok tiempoal in tx'oxon in watx'c'ulal, max waben a tewilal. A yet max ajapnok c'ual colbanilej max in oc etok. Ok ach in taynej, ok ach waoc yuj ak'on yi ba in trato yetok in conob, yet chi ca watx'nelay aj jun conob tu', yet watx' chi yi pax is satak bay tx'otx' tz'ininixac'al max yuncanok,

⁹ yet watx' chal bay eb presowom axca ti': Elanektek, cachi; c'al bay eb cajan ec' bay xol k'ekk'inal: Elanektek bay sakk'inal, cachi. A eb in conob, lajan ok yun eb axca no calnel chi ec' il-lay low tilak be, c'al bay jolomlak witz bay c'am teal.

¹⁰ C'amxa wajil c'al takintial, c'amxa yail ok yab eb yuj k'ak'al yakan c'u, yujtol a Cham ay camc'ulal yin eb, cax ok ikbelaytok eb yuj, bay nuk'lak aej.

¹¹ Ok in pojtok jun be bay jolomlak witz, caw wal watx'xac'al ok yun in watx'nen beal in conob, ẍi Cham.

¹² Ilek wali, tol a bay najat, ay mac chi tit bay norte, ay c'apax juntzanxa chi tit bay yayub c'u, yetok c'apax juntzanxa chi tit bay conob Asuán.

¹³ Awjokokab satcan yin tzalojc'ulal. Nojokab el tx'otx' tx'otx', c'al weklabiokab witzlak yin tzalojc'ulal, yujtol a Jehová lanan mimanc'ulnen is conob; mayal cusoc c'ul Cham yin, yujtol ayoc is conob tu' yin yailal.

¹⁴ Chi yal Jehová: Axa eb aj Sión xin, chi yal eb axca ti': Max on beklaycan yuj Jehová, max on tojcan c'ayc'ulal yuj Cham Jajawil, ẍi eb.

¹⁵ Palta xin, ¿xin ta wal chi toj c'ayc'ulal yune' junok xal txutxej yuj? Caxc'al chi toj c'ayc'ulal yuj xal xin, palta in ayin ti' man ok ex tok c'ayc'ulal wuj.

¹⁶ Axca tol tz'ib yayji bi conob Sión yul in k'ab, xan naanc'al jun conob tu' wuj.

¹⁷ Yin wal aymanil ok jay eb, ok ca watx'nen aj murallail conob tu', a pax eb ajc'ul chi uchon ay tu' c'al c'ayon elok, lananxa yelaj eb.

¹⁸ Ilektowaltok bay e yinlak, cax che yiloni tol lanan wajon ba eb tojnak yin presoal yet chi jayoc eb ayex. Ayin Jehová in tol ayinc'al ec' yin tojbalk'inal, chi wak' in ti' ayex, tol ok e maynej e ba yuj eb e yet conob chi jayoc ayex, axca chi yun maynen ba junok ix ix watx'xac'al yoc yelbub is pichil yet lanan toj nupayok.

¹⁹ Yujtol a conob caw wal uchchajnaktok, tz'ininixac'al yayji canok. Axa tinani' xin, manxa ok yab tx'otx' bay ok cajay anima. A eb max uchon lajwok tu', najattac'al ok tokcan eb.

²⁰ A eb e yuninal max alji bay tx'ok conobal, ok yal eb ayex axca ti': A chon cajay ti', yelxac'al txennej ayon, ak' mimanbok co satak bay chon ayji, ẍi mi eb.

²¹ Axa ayex ti', ok e na yul e c'ul axca ti': ¿Mac ay yuninal juntzan ti'? Yujtol a eb jet max lajwi ayok, c'amxa juninal chi jay ayon ti', tol uktebil on elok, ec'jabwom on bay junxa conob. ¿Mac wal txel max ilon ch'ib juntzan eb ti' xin? Yujtol bekbil on can co tx'oklil. ¿Baytal max ca titoc juntzan eb ti'? quex chi mi.

²² Ayin Jehová in, ok wal bay nacionlak, cax ok wion aj in bandera yil eb, axa yiontek eb eb e winak unin tu'; axa eb e ix unin, jolomxic'nebil ok yun tit eb ix.

²³ A eb cham rey ok ilon ch'ib eb e yuninal, axa eb xal reina ok ikon ec' eb; ok ay nojan eb yajaw tu' sat tx'otx', yelxac'al yaynakil ok yun eb e satak. A yet tu' ok e yojtaknej elok tol ayin ton Jehová in. A mac chi yaoc c'ul win, man ok cancan yin q'uixawc'ulalil, ẍi Cham.

²⁴ ¿Chi mi je' yilay ec' bay junok winak tol caw wal tec'an, tzet yetal max yi' yin owal? ¿Chi mi je' yilay ec' junok aj preso bay junok yajaw yelxac'al ow?

²⁵ A Jehová chi alon axca ti': A bay junok winak tec'an, ok ilay ec' junok aj preso, a bay junok yajaw tol ow, ok ilay ec' tzet yetal max yi' yin owal. Yujtol ayin ok in oc satak eb ajc'ul oc e yin. Ayin wal caw ok in colcan el eb e yuninal tu'.

²⁶ Ayin ok wak' yunej tol ok mak'lej cam ba eb chex etneni, axcaxac'al uq'uem an ok yun eb yuj is chichonc'ulal, axca tol ok yuc'lej eb is chiq'uil. Yuj tu xin, masanil anima ok ojtaknen elok tol ayin ton Jehová e Colomal in, ayin chex wak' bekchajok. Ayin ton is Diosal in Jacob, tol chi je' wuj masanil, ẍi Jehová.