Is 45 - A Txꞌan Biblia Yin Kꞌanjobal 1989

Ayoc ikbej yul k'ab Ciro yuj Jehová

¹ A Jehová ok sic'on oc Ciro yin reyal, a wal caw ok ak'on yip is watx' k'ab, yet watx' chi yak' ayc'ay nacionlak, c'al yion el yikbej eb rey. A c'apax Jehová ok ak'on jakchaj is puertalakil mimek conob satak Ciro, tamwal ay junokxa ok je' makcheni. Axa tinani', chi yal Jehová axca ti':

² Ayin wal caw ok in babjok a satak, ok wak' pananbok be bay jobq'uixtak, cax ok in mak'on poj puertalak tol bronce, c'al in coc'bijnentok ch'en hierro ayoc yijulok.

³ Cax ok wak'on ayach juntzan beyomal tol c'uban el bay ewantak, yet watx' chojtaknej elok, tol ayin ton Jehová in, Diosal in Israel, max ach wawtej yin wak'on binaj a bi.

⁴ Yuj wal in camc'ulalil yin eb in chekbej yinatil Jacob, a ton conob Israel sic'bil el wuj, max ach wawtej yin wak'on binaj a bi. Caw miman a binaj wuj, caxc'al man ojtakbilok in oj.

⁵ Asannej in Jehová in, c'am junokxa. C'am junokxa Dios, asannej in. Ayin ok wak' ep, caxc'al man in ojtakok,

⁶ yet watx' chi ojtaknelay el yuj masanil anima, tac'al bay yichcan, masantac'al bay yayub c'u, tol asannej in Jehová in, cax c'am junokxa Dios.

⁷ Ayin max wesnej aj sakk'inal, c'al k'ekk'inal, ayin chi wak' pitzc'oj aj junc'ulal, cax ayin chi wak' c'apax pitzc'oj aj yatakilal. Ayin Jehová in chi wun masanil juntzan ti'.

Yelxac'al ec'ban is yipalil Dios

⁸ Ayokabtek tojolal bay satcan, axca chi yun tit nab xol asun. Chaokab tx'otx' tx'otx' jun tu', yet chi aj can colbanilej, c'al tojolal axca ch'ib an ac'un. Ayin Jehová in ok wak' yun axca tu', ẍi Cham.

⁹ Ok'bal wal c'ul mactxel chi yak' owal yetok Cham is watx'nemal. A jun cambejal anima tu', lajan wal yayji axca tz'akbejal tx'otx' c'un poji. Tokwal chi yal tx'otx' tz'akbejal tx'otx' bay mac chi tz'akon tu' axca ti': ¿Tzet yetal chonej? Ach ti' man ojtakok chach mulnaji, man ẍiok.

¹⁰ Ok'bal wal c'ul mac chi yal bay is mam, ma bay is txutx: ¿Tzet yuj xan caytu' max in e yut axca ti'? ta ẍi.

¹¹ A Jehová Cham Diosal Israel tol Asanxanej Ocok, a ton Cham is tz'unumal chi alon axca ti': ¿Tom ay tzet ok e yal win yin tzet ok wun yetok eb wuninal yet yajtok tu'? Tokwal ayex ok e yal tzet ok wunej.

¹² Ayin max wesnej aj tx'otx' tx'otx' ti', yetokc'al masanil mac cajan bay. Ayin max in jenbajtok satcan ti', cax max waloni tol chi pitzc'oj aj masanil waycan.

¹³ Ayin ok in jak nabal Ciro yet chi yun tojolal, cax ok in jichlonej masanil be satak. A ok ca watx'nen aj in conob Jerusalén cax ok yak'on bekchaj el in conob tol preso yayji, yin tol c'amc'al tojol, tamwal paktzebal ok ak'lay bay, ẍi Jehová Cham Yajaw yin Masanil.

¹⁴ Chi yalon Jehová bay Israel axca ti': A jantak beyomal eb aj Egipto, c'al eb aj Etiopía, e yetc'al ocok. A eb winak aj Sabá tol mimek is tel, ok yaoc ba eb yul e k'ab, cax ok occan eb e chekbejok. C'alan eb yetok cadena, yet ok tok eb e yintak, ok ay jajan eb e satak, cax ok yalon eb axca ti' ayex: Wal yel ayic' Dios e yetok ayex ti', c'am junokxa Dios, palta asannej oc Cham, ẍi eb, ẍi Jehová bay Israel.

¹⁵ Yel ton wali ach ton Dios ach, tol c'am chach nachaj el juj, ach Dios co Colomal ach ayon Israel on ti'.

¹⁶ A masanil eb chi watx'nen juntzan yechelej tol dios yalon eb, q'uixawtakxac'al eb, ayoc eb yin somc'ulal, ok elcan besesok eb.

¹⁷ A pax Israel xin, a wal caw Jehová ok colon yin junelnej. C'am yechel tol yaynakil ok yunej, tamwal q'uixwi ajok.

¹⁸ A Jehová Dios max esnen aj satcan, a max watx'nen tx'otx' tx'otx' ti', caw wal watx' max yutej. Max watx'nej, man yujok tol toc'al ayic'ok, palta a yuj cajlayi. A' chi alon axca ti': Asannej in Jehová in, c'am junokxa Dios.

¹⁹ Ayin ti' man yinok ewantakil chin k'anjabi, tamwal bay k'ekk'olinakil yulak c'ul tx'otx' tx'otx'. C'amc'al tzet max wal bay eb yinatil Jacob axca ti': Awtej in ec' yin nabac'al, man quin chiok. Ayin Jehová in ti' a tzet yetal jichan, c'al yel, a chi wala', quin chi.

Jehová yetok juntzan yechelej bay Babilonia

²⁰ Chi yal Jehová axca ti': Wajek e ba cax titanek, mac ex elnak ex aj bay e conob, a ton ex c'am e nabal tol te' chi oc e diosalok, che batxon ec'ok, cax chex oc ayilal bay juntzan dios tol c'am chi je' colwaji.

²¹ K'anjabanek cax che yalon e nabal, jun lajan chi yun e lajtinen e ba. ¿Mactxel max alon el juntzan ti' yettaxc'al yichbanil? ¿Mac max alon el yettaxc'al payxa? ¿Mayin mi nak Jehová in max wal juntzan ti'? C'am junokxa Dios in satak. Tok ay junokxa Dios tojol chi colwaji.

²² Meltzojanektek ayin. Ayin ok ex in colo', jantak ex cajan ex bay tilakil el tx'otx' tx'otx', yujtol asannej in Dios in, c'am junokxa.

²³ Ayin caw chi wala' cax chi wak'on in ti'. Yel tzet chi wala', man ok in q'uex in k'anej. Tol ok ay jajan masanil anima in satak, cax masanil eb ok yak' ti' ayin.

²⁴ Ok yalon eb masanil win axca ti': Asannej Jehová tojol, cax ay yipalil, ẍi eb. Axa masanil eb yob c'ul win, toxac'al ok q'uixwok can aj eb.

²⁵ Asan win ok yi' eb yinatil Israel tojolal, ok yak' tzalojbok eb c'ul, ẍi Jehová.