Is 38 - A Txꞌan Biblia Yin Kꞌanjobal 1989

Max jay c'ul cham Ezequías

¹ A yet jun tiempoal tu', caw wal ow max yun yabi ay Ezequías. Axa cham chekbej Dios chi yik Isaías, c'ajol Amoz, a max bet ilonok, max yalon bay axca ti': —Caywal ti' yalon Jehová: Alxac'al canok, tzet ok yun cancan ekbej c'al yetok masanil tzet yetal ay ayach, yujtol ok ach camxac'al, cax manxa ok jay a c'ul, ẍi Jehová, ẍi Isaías.

² Axa Ezequías xin, max meltzoj octok acan bay yich is tx'at, max txajli bay Jehová axca ti':

³ Chin tewi ayach Mamin, natek tzet max yun ach wak'on serbil wal yin masanil in c'ul, max wunc'al tzet yetal max cha a c'ul, ẍi. Cax max jichchaj c'ul yok'i.

⁴ Axa yalon Jehová bay cham Isaías tu'

⁵ tol chi toj yal bay Ezequías junelxa axca ti': A Jehová Cham is Diosal echmam David chi yal axca ti': Mayal wab a txaj, mayal wil c'apaxok, tol chach ok'i, yuj tu' xan ok wak' junokxa olajoneb abil a k'inal.

⁶ Ok ach in col yetok conob Jerusalén ti' yul k'ab reyal Asiria. Ayin wal ok in colc'al jun conob ti', ẍi Jehová, cachi.*fn*

²¹ Max chek cham Isaías watx'nelay jabok te higo, cax max alay oc yin sat bay ayoc jun yailal tu' yin cham rey. Caytu' max yun jay c'ul cham.

²² Lajwi tu' max k'anlej Ezequías bay cham Isaías: —¿Tzet wal ok yun nachaj el wuj xin, tatol ok je' in toj junelxa bay templo Jehová? ẍi.

⁷ Max tak'wi cham Isaías axca ti': —A ton jun yechelej ok tx'ox Jehová ti', tol yel ok yun tzet max yala':

⁸ A yin is reloj Acaz ok yak' meltzoj Jehová lajonebok makan yenel c'u tol mayal ec'ayok, ẍi Isaías. Yuj tu' xan max meltzoj lajonebok makan yenel yakan c'u mayal ec'ay tu'.

⁹ A yet mayal jay c'ul cham Ezequías reyal Judá, max watx'nej cham jun bit ti'.

¹⁰ Ayin ti' max in na' tol yin in tec'anil chin cami. Maxax al-lay ayin tol chin toj bay yul makbej camich, c'amxa chin na tol okto tz'aknaj wabilal.

¹¹ Max in na' tol majxac'al wil en Mamin Jehová bay yulyibank'inal ti'; manxa ok wil c'apax yin junok mactxel cajan bay yulyibank'inal ti' waloni.

¹² A wiquisal t'inan chi lajwi ayok axcac'al yuchlay ay mantiado yet eb ilom calnel, ma axcac'al chi yun lot'lay el an tx'al yet chi lajwi chemlayi. Chi wabc'al yail oj yet chi ec' c'u, c'al yet chi ec' ak'bal.

¹³ Caw wal chi el waw chi ec' ak'bal, axcaxac'al tol lanan c'uxon poj no coj in bakil. Caw wal chi wabc'al yail oj chi ec' c'u, c'al yet chi ec' ak'bal.

¹⁴ C'ojanc'ulalxac'al yel waw axca no q'uisom satcan, chin k'akwi axca no paloma. Caw wal chi c'unbixac'al in sat waj t'anan bay satcan. Mamin, caw wal ok'bal in c'ul chi wabej, tak'wan ayin, quin chi.

¹⁵ Axa tinani' xin, ¿tzetto wal ok wut walon yuj diosal? Max yun wal bay max ak' a ti'. Yinxac'al yaynakilal ok yun wec' tinani' yet mayal ec'tok jun in yailal ti'.

¹⁶ Mamin Wajawil, chi je' yiquisbi ec' eb anima yuj tzet chonej, a wanimail chi iquisbi ec' oj. Ach max ak' in cawil, c'al ak'on meltzoj wiquisal.

¹⁷ Ilabi max jayoc jun yailal ti' wiban yuj in watx'ilok. Max el yin a c'ul tol max in a colcan el bay c'aybanilal, yujtol max tojcan in yobtakilal c'ayc'ulal oj, axca tol max a k'okcantok entak.

¹⁸ A mactxel ayxa ec' bay mukbanil camnak, c'amxa chi je' yalon watx' k'anej ayach. A eb camnak tu', c'amxa chi je' ach yion aj can. A mactxel mayal aytok bay yul olan, c'amxa chi yaoc eb alben yipok is c'ul.

¹⁹ Asan mactxel iquis chi je' yalon watx' k'anej ayach, axca wal chi yun walon ayach ti' tinani'. A eb mamej txutxej, chi yal eb bay yuninal tol a tzet chala', a ton chonej.

²⁰ A Jehová ayic' wetok yuj in is coloni, xan ok co txalek co arpa, cax chon bitniek bay is templo yak'ban iquis on ec'ok, ẍi cham Ezequías.